بيىل 6654 اسكەري ءبولىمنىڭ كينولوگيا ورتالىعىندا اسىل تۇقىمدى 40-تان استام كۇشىك بولاشاقتا ەل تىنىشتىعىن قامتاماسىز ەتۋگە ۇيرەتىلەدى, دەپ حابارلايدى Egemen.kz.
ۇلتتىق ۇلاننىڭ كينولوگيا ورتالىعىندا تۋعان بەلگيالىق, گوللاندىق جانە نەمىس وۆچاركالارى كەلەشەكتە جەدەل-قىزمەتتىك مىندەتتەرگە تارتىلاتىن جوعارى دايىندىقتان وتەدى. جىل باسىنان بەرى وسىرىلگەن 12 كۇشىك وزگە اسكەري بولىمدەرگە جونەلتىلگەن. قازىر ورتالىقتا 30-عا جۋىق جاس يت تاربيەلەنىپ جاتىر.
«العاشقى 45 كۇندە كۇشىكتەر ەنەسىنىڭ سۇتىمەن قورەكتەنەدى, كەيىن قۇرعاق ازىققا كوشىرىلەدى. ودان سوڭ ولاردى قورشاعان ورتاعا بەيىمدەۋ جۇمىسى جۇرگىزىلەدى. ءۇش اي تولعاندا ءتۇرلى كەدەرگىلەر الاڭىنا شىعارىلادى. بۇل كەزدە ولاردىڭ ەستۋ داعدىسىن دامىتۋ ماڭىزدى, سوندىقتان ارقايسىنا ەسىم بەرىلەدى. كەيىن «وتىر», «تۇر», جات» سەكىلدى پارمەندەر ۇيرەتىلەدى. بۇدان كەيىن تاپسىرمالار كۇردەلەنىپ, ءيىس ارقىلى زات ىزدەۋ كەزەڭىنە وتەدى», دەدى كينولوگيا ورتالىعىنىڭ وفيتسەرى مايور جانتورە مەنديورازوۆ.بۇگىندە ۇلتتىق ۇلاندا شامامەن مىڭعا جۋىق قىزمەتتىك يت بار. تەك بيىلدىڭ وزىندە ولاردىڭ قاتىسۋىمەن 120-دان استام قۇقىقبۇزۋشىلىقتىڭ جولى كەسىلگەن. كينولوگيا ورتالىعىندا ءوسىپ جاتقان جاڭا بۋىن سول ءداستۇردى جالعاستىرىپ, ەل قاۋىپسىزدىگىنە قىزمەت ەتپەك.