دەنساۋلىق ساقتاۋ ءمينيسترى اقمارال ءالنازاروۆا الماتىدا جول اپاتىنان قازا تاپقان 23 جاستاعى فەلدشەر ناسيبا جاڭاباەۆانىڭ جاقىندارىنا قايعىرا كوڭىل ءبىلدىردى, دەپ حابارلايدى Egemen.kz.
مينيستر الەۋمەتتىك جەلىدەگى پاراقشاسىندا ناسيبا جاڭاباەۆانىڭ وز مىندەتىنە جاۋاپتى, ارقاشان كومەك كورسەتۋگە دايىن مەديتسينا قىزمەتكەرى بولعانىن ايتتى.
«جەدەل مەديتسينالىق جاردەم فەلدشەرى ناسيبا مۇحتارقىزى جاڭاباەۆانىڭ قىزمەتتىك مىندەتىن اتقارۋ كەزىندە قازا تاپقانى تۋرالى قارالى حاباردى تەرەڭ كۇيزەلىسپەن قابىلدادىم. ناسيبا نەبارى 23 جاستا ەدى, ءتورت اي بۇرىن عانا الماتى قالاسىنىڭ جەدەل جاردەم قىزمەتىنە جۇمىسقا تۇرعان بولاتىن. وسى قىسقا ۋاقىت ىشىندە ول ءوز مىندەتىنە جاۋاپتى, ادال, جاناشىر, ارقاشان كومەك كورسەتۋگە دايىن مەديتسينا قىزمەتكەرى رەتىندە تانىلدى. ناسيبا مۇحتارقىزىنىڭ تۋعان-تۋىستارىنا, جاقىندارىنا, ارىپتەستەرىنە جانە الماتىنىڭ بۇكىل مەديتسينالىق قاۋىمداستىعىنا قايعىرىپ كوڭىل ايتامىن», دەپ جازدى ا.ءالنازاروۆا.
ايتا كەتەيىك, 2025 جىلدىڭ 3 جەلتوقسانىنا قاراعان ءتۇنى الماتىدا جەدەل جاردەم كولىگىنىڭ قاتىسۋىمەن جول اپاتى بولدى. اپات سالدارىنان جەدەل جاردەم كولىگىندەگى 2002 جىلى تۋعان فەلدشەر ناسيبا جاڭاباەۆا قازا تاپتى.