استاناداعى مەديتسينالىق ۇيىمداردا, ونىڭ ىشىندە جەكەمەنشىك كلينيكالاردا پاتسيەنتتەر مىندەتتى الەۋمەتتىك مەديتسينالىق ساقتاندىرۋ ء(مامس) اياسىندا ساپالى وفتالمولوگيالىق كومەك الا الادى. بۇل تەك مامانداردىڭ كەڭەستەرىن عانا ەمەس, كوزگە جاسالاتىن جوعارى دالدىكتەگى وپەراتسيالاردى دا قامتيدى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
جەلتوقسان ايىنىڭ باسىندا قالا كلينيكالارىنىڭ بىرىندە 69 جاستاعى پاتسيەنتكە وتا جاسالدى. وتا الدىندا ونىڭ كوز بۇرشاعىنىڭ بايلانىستىرعىش تىندەرىندە السىزدىك انىقتالعان, بۇل وپەراتسيانى قيىنداتۋى مۇمكىن ەدى. بۇدان بولەك, كاتاراكتامەن قاتار پاتسيەنتتەن گلاۋكوما دا انىقتالعان. سوعان قاراماستان وپەراتسيا ءساتتى ءوتتى.
وفتالموحيرۋرگ ءاسيا ابىلحاكىموۆانىڭ ايتۋىنشا, مۇنداي وپەراتسيالار ادەتتە اۋىرتپالىقسىز وتەدى, نەبارى 15-20 مينۋتقا سوزىلادى جانە مىندەتتى الەۋمەتتىك مەديتسينالىق ساقتاندىرۋ اياسىندا جۇرگىزىلەدى.
«كوبىنەسە جاسى ۇلكەن ناۋقاستار كاتاراكتا بويىنشا جۇگىنەدى. سونىمەن بىرگە ءمامس بويىنشا تاۋلىك بويى ستاتسيوناردا ۆيترەورەتينالدى وپەراتسيالار, ياعني تورقابىقتىڭ اجىراۋى نەمەسە جىرتىلۋى كەزىندە مەديتسينالىق كومەك كورسەتەمىز», دەدى ءاسيا ابىلحاكىموۆا.
دارىگەردىڭ ايتۋىنشا, كاتاراكتانى مىنا بەلگىلەر ارقىلى انىقتاۋعا بولادى: ادامنىڭ بۇرىن انىق ءارى جارىق كورگەن زاتتاردى كەيىنىرەك تۇمان نەمەسە بۋلانعان اينەك ارقىلى كورگەندەي قابىلداۋى.
ونىڭ سوزىنشە, العاشقى بەلگىلەر بايقالعان ساتتە-اق مامانعا قارالۋ قاجەت, سەبەبى كاتاراكتانى باستاپقى كەزەڭدە وتا جاساۋ حيرۋرگ ءۇشىن دە, پاتسيەنت ءۇشىن دە الدەقايدا جەڭىل, ءارى قالپىنا كەلۋ ۋاقىتى تەز بولادى.
كەمىندە جىلىنا ءبىر رەت دياگنوستيكادان ءوتىپ, كورۋ قابىلەتىن تەكسەرتىپ تۇرۋ قاجەت.