فيلوسوفيا, ساياساتتانۋ جانە ءدىنتانۋ ينستيتۋتىنىڭ ۇجىمى كورنەكتى قوعام قايراتكەرى, الەمدىك دەڭگەيدەگى عالىم, فيلوسوفيا عىلىمدارىنىڭ دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى جابايحان مۇباراك ۇلى ءابدىلديننىڭ ومىردەن وزۋىنا بايلانىستى مارقۇمنىڭ وتباسى مەن تۋعان-تۋىستارىنا ورنى تولماس قايعىسىنا ورتاقتاسىپ كوڭىل ايتادى.
جابايحان مۇباراك ۇلى – قازاق عىلىمىنىڭ دامۋىنا ولشەۋسىز ۇلەس قوسقان, وتاندىق فيلوسوفيا مەكتەبىنىڭ جاڭا باعىتتارىن قالىپتاستىرعان, عىلىمي ويدىڭ بيىك دەڭگەيىن ايقىنداعان اسا كورنەكتى تۇلعا. ونىڭ باسشىلىعىمەن جۇزەگە اسقان ىرگەلى ەڭبەكتەر, سونىڭ ىشىندە «ديالەكتيكالىق لوگيكا» سياقتى كوپتومدىق زەرتتەۋلەر ەلىمىزدىڭ عىلىمى تاريحىندا وشپەس مۇرا بولىپ قالدى.
ول ۇزاق جىلدار بويى ءبىزدىڭ ينستيتۋتقا باسشىلىق ەتىپ, قازاقستاندىق فيلوسوفيانىڭ وركەندەۋىنە جول اشتى, جاس عالىمداردى تاربيەلەۋگە جانە جاڭا عىلىمي يدەيالاردىڭ قالىپتاسۋىنا زور ۇلەس قوستى. مارقۇمنىڭ تەرەڭ پاراساتى, ۇستازدىق بولمىسى, عىلىمعا دەگەن ادالدىعى مەن قايسار ەڭبەگى بارشا ارىپتەستەرىنە ۇلگى بولدى.
جابايحان مۇباراك ۇلىنىڭ عالىم عانا ەمەس, مەملەكەت جانە قوعام قايراتكەرى رەتىندە اتقارعان ەرەن ەڭبەگى ءاردايىم قۇرمەتپەن ەسكە الىنادى. ونىڭ سانالى عۇمىرىن ارناپ, سوڭىندا قالدىرعان مول رۋحاني-عىلىمي مۇراسى كەلەر ۇرپاققا قىزمەت ەتە بەرمەك. وسىنداي اسىل ازاماتتىڭ قازاسى – ونىڭ وتباسىنىڭ عانا ەمەس, بۇكىل عىلىمي قوعامداستىقتىڭ ورتاق قايعىسى.
مارقۇمنىڭ جانى ءجانناتتا, جاتقان جەرى جايلى بولسىن. وتباسى مەن جاقىندارىنا سابىر, ءتوزىم جانە كۇش-قۋات تىلەيمىز.
فيلوسوفيا, ساياساتتانۋ جانە ءدىنتانۋ ينستيتۋتىنىڭ ۇجىمى