تالعار پوليتەحنيكالىق كوللەدجىندە «جۇمىسشى ماماندىقتار جىلىنا» وراي, تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى اراسىندا «مەن – كاسىپكەرمىن» اتتى وبلىستىق گراند-تۋرنير ءوتتى, دەپ جازادى Egemen.kz.
كوللەدج ستۋدەنتتەرىنىڭ كاسىپكەرلىك باستامالارىن قولداۋ جانە دامىتۋ ماقساتىندا ۇيىمداستىرىلعان تۋرنيرگە ءبىلىم بەرۋ ۇيىمدارىنان قۇرىلعان 23 كوماندا بويىنشا 58 ستۋدەنت 10 باعىت بويىنشا ءوزارا سىنعا ءتۇستى.
باسەكەلى جارىس بارىسىندا كەلەشەكتە كاسىپكەرلىكتى دامىتۋعا نيەتتى ستۋدەنتتەر ساۋدا, قىزمەت كورسەتۋ, ءوندىرىس, شوۋ بيزنەس, مادەنيەت, كرەاتيۆتى يندۋستريالار, تەحنولوگيالىق كاسىپكەرلىك جانە ينتەللەكتۋالدى تەحنولوگيالار, مەديتسينا, تۋريزم, باسقا دا ماڭىزدى باعىتتار بويىنشا ءبىلىم-بىلىكتەرى مەن ءىس-تاجىريبەلەرىن ورتاعا سالدى.
ءتۋرنيردىڭ العاشقى كەزەڭىندە قاتىسۋشىلاردىڭ ۆيزيت كارتوچكاسى ارقىلى وزدەرىن تانىستىرۋ ەرەكشەلىكتەرى, ساحنا مەن ءتىل مادەنيەتىنە قويىلاتىن تالاپتاردىڭ ساقتالۋى, ۋاقىتتى ۇتىمدى پايدالانۋى نازارعا الىندى.
ال ەكىنشى كەزەڭدە بيزنەس جوبالاردىڭ نەگىزگى اسپەكتىلەرىن كورسەتەتىن Canvas مودەلىن قولدانا وتىرىپ, بيزنەس يدەيالارىن ۇسىندى. بۇل كەزەڭدە بايقاۋعا قاتىسۋشى ستۋدەنتتەر اتالعان ستراتەگيالىق جوسپارلاۋ قۇرالىنىڭ دۇرىس تولتىرىلۋى, جوبانىڭ وزەكتىلىگى مەن ىسكە اسىرىلۋ قادامدارى, سونداي-اق شىعىندار قۇرىلىمى, كىرىس اعىندارى, تۇتىنۋشىلارمەن قارىم-قاتىناس, بەينەباياندارى باعالاندى.
تۋرنيرگە قاتىسۋشىلاردىڭ جۇمىستارىن ساراپتاۋ ءۇشىن ارنايى قازىلار القاسى قۇرىلىپ, ستۋدەنتتەر ەڭبەگىنىڭ ءادىل باعالانۋىن قاداعالادى. ولاردىڭ قاتارىندا وبلىستىق كاسىپكەرلەر پالاتاسى, جۇمىسپەن قامتۋ, ءبىلىم بەرۋ باسقارماسى مەن جۇمىس بەرۋشى كومپانيا وكىلدەرى قاتىستى.
ء«داستۇرلى تۇردە تەحنيكالىق جانە كاسىپتىك ءبىلىم بەرۋ ۇيىمدارىنداعى ستۋدەنتتەردىڭ كاسىپكەرلىك باستامالارىن قولداۋ مەن دامىتۋ ماقساتىندا وتكىزىلەتىن بۇل ءتۋرنيردىڭ ماڭىزى زور. جۇمىسشى ماماندىقتار جىلى اياسىندا 100-دەن استام شارا وتكىزىلدى. ءبىلىم بەرۋ ۇيىمدارىنىڭ الدىندا تۇرعان ماڭىزدى مىندەتتىڭ ءبىرى – ستۋدەنتتەرگە ەڭبەك نارىعىنداعى سۇرانىسقا يە ماماندىقتاردى ۇسىنۋ عانا ەمەس, سونداي-اق, كاسىپكەرلىك باستامالارعا قولداۋ كورسەتۋ», – دەدى تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ, كۇردەلى جوندەۋ ءبولىمىنىڭ باس مامانى, قازىلار القاسىنىڭ مۇشەسى ەربول جاڭبىروۆ.
وڭىردەگى كوللەدج ستۋدەنتتەرىنىڭ ىزدەنىستەرى مەن جەتىستىكتەرى وراسان زور. سونىڭ ءبىرى, مامىر ايىندا وتكەن «بيزنەس ارۋى – 2025» وبلىستىق بايقاۋىنا 10 وقۋ ورنىنان 11 كوماندا قاتىسىپ, وزا شىققان الماتى ەكونوميكالىق كوللەدجىنىڭ قىزدارى رەسپۋبليكالىق بايقاۋدا جۇلدەلى 2-ورىندى يەلەنىپ, كاسىپكە بەيىمدىلىكتەرىن دالەلدەگەن.
تۋرنير قورىتىندىسى بويىنشا جەڭىمپاز كوماندالار سەرتيفيكاتتارمەن ماراپاتتالدى.