6 شىلدە كۇنى وبلىستا 83 نارەستە دۇنيەگە كەلىپ, ولاردىڭ كوبىسىنە نۇرسۇلتان, استاناي, نۇراي ەسىمدەرى بەرىلدى
ء“ومىردىڭ ءبىر قىزىعى بالا دەگەن”. شىنىندا دۇنيەگە شىر ەتىپ نارەستە كەلگەن ساتتەن ارتىق قۋانىش جوق. وعان اكە دە, انا دا, اتا دا, اجە دە, بالا دا, باۋىر دا قۋانادى. قۋانىشتىڭ سوڭى “ال ەندى بۇل شاقالاقتىڭ ەسىمىن كىم قويامىز؟” دەگەن تاتۋ-ءتاتتى پىكىرتالاسقا ۇلاسادى.
ءبىزدىڭ ەلىمىزدە 6 شىلدە كۇنى دۇنيەگە كەلگەن ۇل-قىزعا, مەنىڭشە, اتا-انالار مەن اتا-اجەلەر “مۇنىڭ اتىن كىم قويامىز؟” دەپ كوپ ويلانىپ, كوپ تولعانبايتىن سياقتى. ويتكەنى, بۇل ەلوردامىز – استانا قالاسىنىڭ تۋعان كۇنى! ول از دەسەڭىز, تاۋەلسىز قازاقستاننىڭ تۇڭعىش پرەزيدەنتى – نۇرسۇلتان نازارباەۆ تا ءدال وسى كۇنى ىڭكار دۇنيەنىڭ ەسىگىن ىڭگالاپ اشىپتى.
سوندىقتان بولار, جامبىل وبلىستىق ىسكەر ايەلدەر اسسوتسياتسياسىنىڭ ءتورايىمى گۇلدارا نۇرىموۆا باستاعان جايساڭ قىز-كەلىنشەكتەر وسى كۇنى وبلىستىق پەريناتالدىق ورتالىقتى بەتكە الدى. بەتكە العاندا, سابيلەر ءىڭگالاعان عيماراتتىڭ تابالدىرىعىنان باعالى سىي-سياپاتتارمەن اتتادى.
6 شىلدە كۇنى وبلىستىق پەريناتالدىق ورتالىقتا 17 نارەستە ءدۇنيەگە كەلىپتى. ال 7 جاس انا ەلوردا مەن ەلباسىنىڭ تۋعان كۇنى دۇنيەگە كەلگەن نارەستەلەرىنىڭ اتىن نۇرسۇلتان دەپ قويامىز دەپ تاڭداپ تا ۇلگەرىپتى. سونداي-اق, قىزدارىنىڭ ەسىمدەرىن استاناي, نۇراي, نۇرايىم دەپ قويۋدى ويلاستىرىپ وتىرعان انالار دا تابىلدى. ياعني, ەندى بايزاق اۋدانىنىڭ تۇرعىنى رايحان امانباەۆا, جامبىل اۋدانىنىڭ تۇرعىنى جۇلدىز جۇماباەۆا, قورداي اۋدانىنىڭ تۇرعىنى ايگۇل جۇمانوۆا, جۋالى اۋدانىنىڭ تۇرعىنى ناريما قازىمحانوۆا, تۇرار رىسقۇلوۆ اتىنداعى اۋداننىڭ تۇرعىنى اينۇر ەرتاەۆالاردىڭ ۇلدارىنىڭ اتى ەلباسى ەسىمى قۇرمەتىنە – نۇرسۇلتان دەپ اتالاتىن بولادى.
ال جامبىل اۋدانىنىڭ تاعى ءبىر تۇرعىنى ايگەرىم بەكبولوۆا قىزىنىڭ ەسىمىن استاناي دەپ قويعىسى كەلسە, لۋگوۆوي بەكەتىنىڭ تۇرعىنى نۇرگۇل قارابوتاەۆا نۇراي دەپ اتاۋدى قالاپتى.
جالپى بۇل كۇنى وبلىس بويىنشا 83 ءسابي دۇنيەگە كەلىپ, ونىڭ 43-ءى ۇل, 40-ى قىز بولىپ شىقتى. تاراز قالاسىنداعى №1 قالالىق پەرزەنتحانا شاڭىراعى دا اقار-شاقار قۋانىشقا تولى. مۇندا 6 شىلدە كۇنى 22 نارەستە دۇنيەگە كەلىپتى. ال قورداي اۋدانىندا – 12, مەركى اۋدانىندا 7 ءسابي ءومىر ەسىگىن اشقان. وبلىستىڭ باسقا اۋداندارىندا دا كوپتەگەن ءنارەستەلەر جارىق دۇنيەمەن ىڭگالاي سالەمدەسىپتى. البەتتە, ولاردىڭ اتا-انالارى دا پەرزەنتتەرىنە ەلدىڭ ارعى-بەرگى تاريحىنداعى ەڭ قالاۋلى ۇل-قىزدارىنىڭ سۇيىكتى ەسىمدەرىن قوياتىنى ءسوزسىز.
كوپ بالا – كوبەيۋدىڭ كەپىلى. ءوسىپ-ءونۋدىڭ ءورىسى. “اتادان التاۋ تۋعاننىڭ, جۇرەگىنىڭ باستارى التىن مەنەن بۋ بولار, اتادان جالعىز تۋعاننىڭ, جۇرەگىنىڭ باستارى سارى دا جالقىن سۋ بولار, جالعىزدىق سەنى قايتەيىن. جاعاما قولدىڭ تيگەنىن, جالعىزدىق سەنەن كورەمىن, جاماۋلى كيىم كيگەنىم, جارلىلىق سەنەن كورەمىن. اتادان تۋدىم جالقى بوپ, جاقىننان كوردىم تالقى كوپ, جاسىم جەتپەي ون بەسكە, قورعايتىن جان ادام جوق, جاسىم جەتىپ ون بەسكە, كىرەر مە ەكەم كەڭەسكە, بۇعانا قاتىپ, بەل بەكىپ, ەرەگىسكەن دۇشپانمەن, شىعار كۇن تۋسا كۇرەسكە”, دەگەن قايران اقتامبەردى جىراۋ نە دەگەن كورەگەن, نە دەگەن دانا ەدى!..
ال اتا جىراۋ ارمانىن ەل دەڭگەيىندە پايىمدار بولساق, جامبىل وبلىسىنداعى مىنا جاقسى ءداستۇر سول ارماننىڭ ورىندالا باستاعانىن اڭعارتسا كەرەك.
كوسەمالى ساتتىباي ۇلى, جامبىل وبلىسى.