قىزىلوردادا ءوڭىر تۇرعىندارىن سۇيىتىلعان گازبەن قامتاماسىز ەتۋ ماسەلەسى تالقىلانعان ءماجىلىس ءوتتى. جاۋاپتى سالا باسشىلارى قاتىسقان جيىندا وبلىس اكىمى نۇرلىبەك نالىباەۆ كاسىپكەرلەر تومەندەتىلگەن باعامەن الىپ وتىرعان الەۋمەتتىك گاز تەك حالىققا ساتىلۋى كەرەكتىگىن تاپسىردى.
– وسىعان دەيىن سۇيىتىلعان گازدى ارزان باعامەن ساتىپ العاننىڭ ارقاسىندا پايداعا كەنەلگەندەرىڭىزدى بىلەمىز. بىراق بۇلاي جالعاستىرا بەرۋگە بولمايدى, بىلتىر دا قاتاڭ ەسكەرتتىم – الەۋمەتتىك گازدى تەك حالىققا ساتۋ كەرەك. ال كوممەرتسيالىق گازدى ءوز قاراجاتتارىڭىزعا الىڭىزدار. ءتىپتى تۇرعىنداردى تولىق قامتاماسىز ەتۋ ءۇشىن قىمبات بولسا دا, باسقا كوزدەردەن كوممەرتسيالىق گازدى جەدەل جەتكىزىپ, حالىققا الەۋمەتتىك باعامەن ساتىڭىزدار. وسى سالاداعى كاسىپكەرلەر ايماققا بولىنگەن گازدى ونەركاسىپ نىساندارىنا, باسقا وڭىرلەرگە ساتىپ, تاپشىلىقتى قولدان جاساپ وتىر. تاعى دا ايتامىن – ارزان گاز اۋەلى وسى ءوڭىر تۇرعىندارىنىڭ قاجەتتىلىگىن تولىعىمەن وتەۋگە جۇمسالۋى كەرەك. سول تۇرعىدا ءتيىستى شارالار قابىلداڭىزدار, – دەدى وبلىس باسشىسى.
بۇگىندە وبلىستاعى 16 وپەراتور 144 اۆتوگاز قۇيۋ ستانساسى, 6 گاز ساقتاۋ قويماسى ارقىلى سۇيىتىلعان گاز ساتۋمەن اينالىسادى. وڭىردە ارزانعا الىپ, قىمباتقا ساۋدالايتىن الىپساتارلىق ارەكەتتەرگە جول بەرمەۋ ماقساتىندا وبلىس شەكاراسىنا كەزەكشىلىك ورناتىلدى. زاڭدى تۇردە تىركەلمەي, اۆتوكولىكتەرگە سۇيىتىلعان گاز قوندىرعىلارىن ورناتۋ فاكتىلەرىن انىقتايتىن رەيدتىك تەكسەرۋلەر جۇرگىزىلىپ, ءتيىستى شارالار قابىلدانا باستادى.
وبلىستىق پوليتسيا دەپارتامەنتى ايماققا بولىنگەن گازدىڭ باسقا وڭىرلەرگە شىقپاۋىن قاداعالاۋ ءۇشىن تاۋلىك بويى جۇمىس ىستەيتىن باقىلاۋ بەكەتتەرىن «قارابۇتاق – قىزىلوردا – شىمكەنت» اۆتوجولىنىڭ ارال اۋدانىنداعى 1363-903-شاقىرىمىنا, وسى كۇرەجولدىڭ جاڭاقورعانداعى 1998-268-شاقىرىمىنا, «قىزىلوردا – جەزقازعان» جولىنىڭ 12-شاقىرىمىنا ورنالاستىردى.
جانار-جاعارماي مەن گاز تاپشىلىعىن بولدىرماۋ ماقساتىندا جەرگىلىكتى اتقارۋشى ورگان, ەكونوميكالىق تەرگەپ-تەكسەرۋ, مەملەكەتتىك كىرىستەر جانە باسەكەلەستىكتى قورعاۋ دەپارتامەنتتەرى وكىلدەرىنەن قۇرىلعان وڭىرلىك شتاب جۇمىس ىستەيدى. قازىرگى ەسەپ بويىنشا وبلىستا سۇيىتىلعان مۇناي-گازىنىڭ قورى شامامەن 892,1 توننا.