بۇگىن قاراعاندى وبلىستىق «سارىارقا» حوككەي كلۋبىنىڭ كوماندا بازاسىندا وتكەن جيىندا ۇجىمعا جاڭا ديرەكتور – بەرىك بولات ۇلى تۋياماشەۆ رەسمي تۇردە تانىستىرىلدى. ءىس-شاراعا قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى سەرىك ساپيەۆ جانە قاراعاندى وبلىسىنىڭ حوككەي فەدەراتسياسىنىڭ پرەزيدەنتى ايبەك جۇمابەكوۆ قاتىستى, دەپ حابارلايدى Egemen.kz كلۋبتىڭ ءباسپاسوز قىزمەتىنە سىلتەمە جاساپ.
جيىن بارىسىندا باسشىلىق الداعى ماۋسىمداعى نەگىزگى مىندەتتەردى اتاپ ءوتىپ, كوماندانىڭ جانكۇيەر كۇتكەن ناتيجەلەرگە قول جەتكىزۋى ءۇشىن بار جاعداي جاسالاتىنىن اتاپ ءوتتى. بەرىك بولات ۇلى – سپورت سالاسىندا تاجىريبەسى مول, حوككەي مەنەدجمەنتىن جاقسى مەڭگەرگەن مامان.
ءبىلىمى:* 2009–2011 جج. قازتۇتىنۋوداعى قاراعاندى مەملەكەتتىك ۋنيۆەرسيتەتى («قۇقىقتانۋ»);* 2011–2013 جج. ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى («دەنە شىنىقتىرۋ جانە سپورت»);* 2013 ج. «بولاشاق» باعدارلاماسىمەن رەسەي حالىقارالىق وليمپيادالىق ۋنيۆەرسيتەتى («سپورتتىق مەنەدجمەنت»);* 2011 ج. ماسكەۋدە وتكەن تمد جاستار كۇندەرىندە قر بعم اتىنان قازاقستان دەلەگاتسياسىن باسقارعان.
ەڭبەك تاجىريبەسى: * 2012–2013 جج. استاناداعى «بارىس» سپورتتىق-جاتتىعۋ كەشەنىنىڭ ديرەكتورى;* 2014–2015 جج. قۇرامىندا «استانا» حوككەي كلۋبى بار «استانا سپورت كلۋبى» جشس باسشىسى.
سوڭعى جىلدارى بەرىك تۋياماشەۆ ايماقتا بۇقارالىق سپورتتى دامىتۋعا ەلەۋلى ۇلەس قوسىپ كەلەدى. ەندى ول تاجىريبەسىن قاراعاندىنىڭ باستى حوككەي كومانداسىن جاڭا بيىككە شىعارۋ جولىندا جۇمساماق. سونداي-اق, جاڭا باسشىنىڭ وسى ماۋسىمداعى باستى ماقساتى – كلۋبتىڭ كوپتەن كۇتكەن چەمپيوندىق تيتۋلىن قايتارۋعا بار كۇش-جىگەرىن سالۋ ەكەندىگىن اتاپ ءوتتى.