اقتاۋ بيىل تۇركى الەمىنىڭ مادەني استاناسى اتانىپ, وسىنىڭ اياسىندا كوپتەگەن ءىس-شارا وتكەنى بەلگىلى. كەشە وسى شاھارداعى سالتاناتتى جيىندا اتاۋلى جىل قورىتىندىلاندى. وعان تۇركسوي-عا مۇشە ەلدەردىڭ مادەنيەت مينيسترلەرى مەن ءتيىستى سالا وكىلدەرى, سونداي-اق تۇركى مەملەكەتتەرى ۇيىمى اقساقالدار كەڭەسىنىڭ توراعاسى بينالي يىلدىرىم قاتىستى.
سالتاناتتى راسىمدە ءسوز العان ەلىمىزدىڭ مادەنيەت جانە اقپارات ءمينيسترى ايدا بالاەۆا مادەني استانا مارتەبەسى ءوڭىر ءۇشىن قۇرمەت قانا ەمەس, سونىمەن بىرگە تۇركى الەمىنىڭ باي مۇراسىن كەڭ اۋديتورياعا تانىستىرۋعا مۇمكىندىك بەرگەنىن اتاپ ءوتتى.
«تاريحي قالا وسى جاۋاپكەرشىلىكتى ابىرويمەن اتقارىپ, وزىنە جۇكتەلگەن مىندەتتى جوعارى دەڭگەيدە ورىندادى دەپ نىق سەنىممەن ايتا الامىز. جوبانىڭ تابىستى جۇزەگە اسۋىنا پرەزيدەنتىمىزدىڭ تۇركى مەملەكەتتەرىنىڭ بىرلىگىن نىعايتۋعا, گۋمانيتارلىق ىنتىماقتاستىقتى دامىتۋعا باعىتتالعان تۇراقتى مادەني ساياساتى ايرىقشا ءرول اتقاردى. ەل پرەزيدەنتىنىڭ مادەنيەت, عىلىم مەن ءبىلىم, جاستار الماسۋى سالالارىنداعى ناقتى باستامالارعا نەگىزدەلگەن تۇركى ينتەگراتسياسى جونىندەگى ماڭىزدى ۇستانىمى بۇكىل تۇركى الەمىندە كەڭ قولداۋ تاۋىپ, جوعارى باعالاندى. اقتاۋدا جۇزەگە اسقان تۇركسوي جوبالارى مەملەكەت باسشىسى باستامالارىنىڭ ناقتى ناتيجەگە اينالىپ, باۋىرلاس حالىقتاردى بۇرىنعىدان دا جاقىنداستىرا تۇسكەنىن ايقىن كورسەتتى», دەدى مينيستر.
ايتۋلى جىل اياسىندا اقتاۋدا مىڭداعان عالىم مەن ونەرپازدى, قوناقتاردى بىرىكتىرگەن 30-دان استام ءىرى حالىقارالىق ءىس-شارا ءوتتى. ولاردىڭ قاتارىندا مۋزىكا, ەپوس, فولكلور جانە بي فەستيۆالدارى, شىعارماشىلىق سيمپوزيۋمدار مەن عىلىمي كونفەرەنتسيالار, سونداي-اق بالالار مەن جاستارعا ارنالعان ءتۇرلى بايقاۋلار بار.
سونىمەن قاتار جىل شەڭبەرىندە وتكەن ماڭىزدى ءىس-شارالاردىڭ ءبىرى – 7 ەلدەن كەلگەن 9 تەاتر قاتىسىپ, ءۇش مىڭنان استام كورەرمەن تاماشالاعان III حالىقارالىق تەاتر فەستيۆالى. سونداي-اق 47 كونكۋرستىق فيلم ۇسىنىلىپ, تۇركى كينەماتوگرافيستەرى ءۇشىن شىعارماشىلىق الاڭعا اينالعان «قورقىت اتا» حالىقارالىق كينوفەستيۆالى دە انشلاگپەن ءوتتى. «كوشپەندى قۋىرشاعى» اتتى ءبىرىنشى حالىقارالىق قۋىرشاق تەاترلارى فەستيۆالى دە كورەرمەنگە ايرىقشا اسەر قالدىردى.
ءوز كەزەگىندە سالتاناتتى ءىس-شارانىڭ ارنايى قوناعى, تۇركى مەملەكەتتەرى ۇيىمى اقساقالدار كەڭەسىنىڭ توراعاسى بينالي يىلدىرىم ماڭعىستاۋ جۇرتىنىڭ قوناقجايلىعى مەن اقتاۋ قالاسىنىڭ باي مادەنيەتىنە ەرەكشە توقتالدى.
«قازاقستان – تۇركى الەمىنىڭ تۇراقتىلىعىن قامتاماسىز ەتىپ تۇرعان تىرەك ەلدەردىڭ ءبىرى عانا ەمەس, ونىڭ قۋاتتى ورتالىعى. تۇركى مەملەكەتتەرى ۇيىمىنداعى سىندارلى ءرولى, ەكونوميكالىق ورنىقتىلىعى, باي مادەني مۇراسى جانە تۇراقتى دامۋى – قازاقستاندى تۇركى ەلدەرىنىڭ اراسىندا كوشباسشى دەڭگەيگە كوتەرىپ وتىر. قازاقستان پرەزيدەنتى قاسىم-جومارت كەمەل ۇلى توقاەۆتىڭ كورەگەندىگى مەن كوشباسشىلىعى وڭىرلىك بەيبىتشىلىكتى نىعايتۋعا, كوپۆەكتورلى ديپلوماتيانى دامىتۋعا جانە تۇركى الەمىنىڭ بىرلىگى يدەياسىن ىلگەرىلەتۋگە وراسان ۇلەس قوسىپ كەلەدى. بۇگىنگى سالتاناتتى ءىس-شارا – وسى ءبىرىزدى ساياساتتىڭ جانە قازاقستاننىڭ ينكليۋزيۆتىلىك ءداستۇرىنىڭ جارقىن كورىنىسى», دەدى ب.يىلدىرىم.
اقتاۋدا جۇزەگە اسىرىلعان جۇمىس حالىقارالىق دەڭگەيدە جوعارى باعاسىن الدى. تۇركسوي باس حاتشىسى سۇلتان راەۆ قالا بۇكىل تۇركى قاۋىمداستىعى ءۇشىن باۋىرلاستىقتىڭ جانە جاڭا مۇمكىندىكتەردىڭ رامىزىنە اينالعانىن ايتتى.
«بۇگىن ءبىز كاسپيدىڭ كوگىلدىر تولقىنىنا كوز تاستاپ تۇرىپ, ءبىر جىلدىڭ تاريحىن, بىرلىكتىڭ شەجىرەسىن وي ەلەگىنەن وتكىزىپ تۇرمىز. بۇل جىل – جۇرەكتەردى جاقىنداتقان, باۋىرلاستىقتى بيىكتەتكەن قاسيەتتى جىل بولدى. كۇن استىندا كوك تۋ جەلبىرەپ, جەر بەتىندە باۋىرلاس جۇرتتىڭ اۋەنى شىرقالدى. جىر مەن كۇي, بي مەن ءسوز – ءبارى دە ورتاق رۋحىمىزدىڭ ءۇنىن جەتكىزدى», دەدى س.راەۆ.
سالتاناتتى ءىس-شارا گالا-كونتسەرتپەن جالعاستى. وعان ازەربايجان, قازاقستان, قىرعىزستان, تۇركيا جانە وزبەكستاننان 300-دەن اسا ءارتىس قاتىسىپ, كورەرمەندەرگە ۆوكالدىق جانە بي قويىلىمدارىن ۇسىندى. كونتسەرت باعدارلاماسى تۇركى ەلدەرىنىڭ ساحنالىق ونەرىنىڭ عاجايىن سان الۋاندىعىن كورسەتىپ, مەرەكەلىك كوڭىل كۇي مەن شىعارماشىلىق بىرلىك اتموسفەراسىن قالىپتاستىردى. كونتسەرتتەن كەيىن اقتاۋ قالاسىنىڭ اكىمى «تۇركى الەمىنىڭ 2026 جىلعى مادەني استاناسى» اتاعىن وزبەكستاننىڭ ءاندىجان قالاسىنىڭ حوكيمىنە تاپسىردى.