پرەمەر-مينيستر ولجاس بەكتەنوۆ شۆەيتساريانىڭ ۆيتسە-پرەزيدەنتى گي پارمەلانمەن كەزدەستى.
دەلەگاتسيالار قازاقستان پرەزيدەنتى قاسىم-جومارت توقاەۆپەن كەلىسسوزدەر قورىتىندىسى بويىنشا قول جەتكىزىلگەن ۋاعدالاستىقتار شەڭبەرىندە ساۋدا-ەكونوميكالىق قاتىناستاردى دامىتۋ ماسەلەلەرىن تالقىلادى.
ينۆەستيتسيالىق بايلانىستاردى كەڭەيتۋگە, ونەركاسىپتەگى, اۋىل شارۋاشىلىعىنداعى, ەنەرگەتيكاداعى, تسيفرلىق, كولىك-لوگيستيكالىق, سۋ سالالارىنداعى جانە تاعى دا باسقا ءوزارا ءىس-قيمىلعا نازار اۋدارىلدى.
شۆەيتساريا – ەلىمىزدىڭ تۇراقتى ەكونوميكالىق سەرىكتەسى ءارى ەكىجاقتى ساۋدا كولەمى بويىنشا 15 جەتەكشى ەلدىڭ قاتارىنا كىرەدى. بيىل 9 ايدا بۇل كورسەتكىش شامامەن 1,1 ملرد دوللارعا جەتتى. بىلتىر ءوزارا تاۋار اينالىمى 26,2%-عا ۇلعايىپ, 1,7 ملرد دوللاردان اسقان ەدى. وتاندىق ءونىم ەكسپورتى 30,6%-عا ءوستى.
تاراپتار ينۆەستيتسيالىق ىنتىماقتاستىقتى دامىتۋعا ارنالعان باسىم باعىتتارعا دا توقتالدى. 2025 جىلدىڭ ءبىرىنشى جارتىجىلدىعىندا شۆەيتساريادان قازاقستانعا تارتىلعان تىكەلەي ينۆەستيتسيا كولەمى 34,2%-عا ۇلعايىپ, 568 ملن دوللاردى قۇرادى.
كولىك-لوگيستيكا سالاسىندا حالىقارالىق مارشرۋتتاردى, تەڭىز پورتتارىن, لوگيستيكالىق ورتالىقتاردى جانە ەكسپورتتىق-لوگيستيكالىق وندىرىستەردى دامىتۋ بويىنشا ىنتىماقتاستىق الەۋەتى تالقىلاندى. ءساتتى مىسال رەتىندە Stadler Kazakhstan جولاۋشىلار ۆاگوندارىن شىعارۋ جوباسى كەلتىرىلدى. قازاقستاننىڭ اۆياحابتاردى دامىتۋ بويىنشا جۇرگىزىپ جاتقان جۇمىستارى شەڭبەرىندە اۆياتسيا سالاسىنداعى مۇمكىندىكتەرى اتاپ ءوتىلدى.
نەگىزگى باعىت بولىپ ونەركاسىپتىك كووپەراتسيا قالا بەرەدى. بىرلەسكەن جوبالار پۋلى شامامەن 3,3 مىڭ جۇمىس ورنىن اشۋعا مۇمكىندىك بەرەتىن 1,6 ملرد دوللارلىق بىرقاتار ءىرى جوبانى قامتيدى. ونەركاسىپ سالاسىنداعى تەحنولوگيالار ترانسفەرى ايتارلىقتاي الەۋەتكە يە.
IT-تەحنولوگيالار سالاسىندا ەلىمىزدىڭ تسيفرلىق كۇن تارتىبىمەن سايكەس كەلەتىن ورتاق مۇددەلەر بەلگىلەندى. ىنتىماقتاستىقتىڭ الەۋەتتى باعىتتارى مەديتسيناعا, ونەركاسىپكە, «اقىلدى» قالالاردىڭ تسيفرلىق ينفراقۇرىلىمىنا, تاعى دا باسقا سالالارعا جي-شەشىمدەردى ەنگىزۋ ماسەلەسىن قامتيدى.
اۋىل شارۋاشىلىعى سالاسىندا ىرىمشىك پەن باسقا دا پرەميۋم-كلاستى ءسۇت تاعامدارىن ءوندىرۋ ءۇشىن ءسۇت ونىمدەرىن قايتا وڭدەۋ سالاسىندا شۆەيتساريالىق وزىق تەحنولوگيالاردى پايدالانا وتىرىپ, بىرلەسكەن كاسىپورىندار قۇرۋ مۇمكىندىگى تۋرالى اتاپ ءوتىلدى.
سونداي-اق سۋ رەسۋرستارىن باسقارۋ سالاسىنداعى ارىپتەستىك ماسەلەلەرى تالقىلاندى. ولاردى ۇتىمدى پايدالانۋعا ءارى وزىق ينجەنەرلىك شەشىمدەردى ەنگىزۋگە باسا نازار اۋدارىلدى.
قارجى, الەۋمەت, ەنەرگەتيكا سالالارىنداعى, سونداي-اق شوب-تى قولداۋ بويىنشا ءوزارا ءىس-قيمىلدى كەڭەيتۋگە قاتىستى ۇسىنىستارمەن Economiesuisse سىرتقى ەكونوميكالىق بايلانىستار جونىندەگى شۆەيتساريالىق كاسىپورىندار قاۋىمداستىعىنىڭ پرەزيدەنتى كريستوف مەدەر, «SWISSMEM» كومپانياسىنىڭ باس ديرەكتورى شتەفان برۋپباحەر, شۆەيتساريالىق ەكسپورتتىق تاۋەكەلدەردى ساقتاندىرۋ (SERV) ديرەكتورلار كەڭەسىنىڭ توراعاسى باربارا حايو, Switzerland Global Enterprise باس ديرەكتورىنىڭ ورىنباسارى انيا فيدلەر, Stadler Rail AG ديرەكتورلار كەڭەسىنىڭ توراعاسى پەتەر شپۋلەر, بىرىككەن ساۋدا پالاتاسىنىڭ (JCC) پرەزيدەنتى مارسەل پاۆليچەك, شۆەيتساريا كونفەدەراتسياسى ۇلتتىق كەڭەسىنىڭ مۇشەسى جانە قازاقستان-شۆەيتساريا پارلامەنتتىك دوستىق توبىنىڭ مۇشەسى رولاند رينو بيۋحەل, شۆەيتساريا كونفەدەراتسياسى ەكونوميكاسىنىڭ مەملەكەتتىك حاتشىلىعىنىڭ ەۋروپا جانە ورتالىق ازيامەن ەكىجاقتى ىنتىماقتاستىق ءبولىمىنىڭ كەڭەسشىسى يوحەن يانسەن ءسوز سويلەدى.
قازاقستان تاراپىنان پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, كولىك ءمينيسترى نۇرلان ساۋرانباەۆ, ونەركاسىپ جانە قۇرىلىس ءمينيسترى ەرسايىن ناعاسپاەۆ, سونداي-اق «اتامەكەن» ۇكپ تورالقا توراعاسى رايىمبەك باتالوۆ پىكىر ءبىلدىردى.
كەزدەسۋ قورىتىندىسى بويىنشا تاراپتار ىنتىماقتاستىقتى ءىس جۇزىندە كەڭەيتۋگە جانە ەكىجاقتى قاتىناستاردى ودان ءارى تەرەڭدەتۋگە بەيىل ەكەندىكتەرىن راستادى.