مەن 2022 جىلدان بەرى جاڭا رەفورما اياسىندا حالىقتىڭ تىكەلەي سايلاۋىمەن وسى قىزمەتكە تاعايىندالدىم. اۋىلدىق وكرۋگ وبلىس ورتالىعىنان 45 شاقىرىم, اۋدان ورتالىعىنان 35 شاقىرىم جەردە, باتىس ەۋروپا – باتىس قىتاي حالىقارالىق ءدالىزىنىڭ بويىندا ورنالاسقان.
بۇگىن ۇيىمداستىرىلعان ديالوگ-پلاتفورماسىندا پرەزيدەنتكە تىكەلەي سۇراق قويۋعا مۇمكىندىك تۋدى, سونداي-اق قويىلعان سۇراقتاردىڭ ناقتى جاۋابىن ەستۋ مۇمكىن بولدى. مەملەكەت باسشىسى الداعى جىلدارى اكىمدەردىڭ جۇمىسىن جەڭىلدەتۋگە, جەرگىلىكتى باسقارۋدى كۇشەيتۋگە باعىتتالعان زاڭنامالىق وزگەرىستەر تۋرالى ايتتى. سونىڭ ىشىندە ءتورتىنشى دەڭگەيلى بيۋدجەتكە قاتىستى ماسەلەلەر ەرەكشە اتالدى. ياعني اۋىلداردىڭ ءوز-ءوزىن قامتاماسىز ەتۋى ءۇشىن تۇسەتىن سالىقتاردىڭ ءبىر بولىگى اۋىل دەڭگەيىندە قالۋعا ءتيىس ەكەنى ايتىلدى.
بۇرىن ءىرى كورپوراتسيالاردان تۇسەتىن ەكولوگيالىق جانە كورپوراتيۆتىك سالىقتار وبلىس نەمەسە رەسپۋبليكالىق دەڭگەيدە قالىپ قوياتىن. پرەزيدەنت بۇل سالىقتاردىڭ بەلگىلى ءبىر بولىگىن اۋدان مەن اۋىل دەڭگەيىندە قالدىرۋدى تاپسىردى. سونداي-اق پروپورتسيونال تۇردە ءادىل ەسەپتەۋ كەرەكتىگى دە باسا ايتىلدى. مەنىڭ قويعان سۇراعىم دا وسى ماسەلەگە قاتىستى بولدى. ءبىزدىڭ اۋىلدىڭ ماڭىندا «ايس» دەپ اتالاتىن ءسۇت وندىرەتىن ءىرى تاۋارلى-فەرما بار. ولار بىزگە وتە از مولشەردە – تەك تابىس سالىعىنىڭ 0,5 پايىزى كولەمىندە عانا تولەم جاسايدى. جەر سالىعى مەن تابىس سالىعى دا جەڭىلدەتىلگەن رەجىمدە بولعاندىقتان, اۋىل بيۋدجەتىنە ايتارلىقتاي قارجى تۇسپەيدى. قىزمەتتىك كولىكتەر مەن تەحنيكالاردان تۇسەتىن سالىقتاردىڭ دا شاعىن بولىگى عانا اۋىلعا قالادى. باسقا سالىقتار مۇلدەم تۇسپەيدى.
وسى سەبەپتى ءبىز تابىس سالىعىنىڭ بەلگىلى ءبىر پايىزىن اۋىل دەڭگەيىندە قالدىرۋ تۋرالى ماسەلەنى كوتەردىك. ەگەر اۋىلعا تۇسەتىن سالىقتىق ءتۇسىم مولشەرى ارتسا, كوپتەگەن قاجەتتى جۇمىس پەن ماسەلەلەردى ءوز كۇشىمىزبەن شەشۋگە مۇمكىندىك بولار ەدى. پرەزيدەنت بۇل ماسەلە بويىنشا ۇكىمەتكە تىكەلەي تاپسىرما بەردى. مەنىڭ ويىمشا, وسى سۇراقتىڭ ءوزى-اق اكىمدەر ءۇشىن, اۋىلعا بارىپ جۇمىس ىستەۋگە ۇلكەن سەرپىن بەرەدى.
مەدەت بەكجانوۆ,
تاڭىربەرگەن اۋىلدىق
وكرۋگىنىڭ اكىمى
اقتوبە وبلىسى,
مارتوك اۋدانى