قازاقتىڭ باس اقىنى ا.قۇنانباي ۇلىنىڭ 180 جىلدىعى اياسىندا اباي وبلىسى اكىمدىگىنىڭ قولداۋىمەن وتكەن «اباي اندەرى» اتتى رەسپۋبليكالىق ءداستۇرلى انشىلەر بايقاۋىنىڭ جەڭىمپازدارى انىقتالدى.
حاكىم ابايدىڭ ءان مۇراسىن ناسيحاتتاۋعا باعىتتالعان بايقاۋعا ەلىمىزدىڭ تۇكپىر-تۇكپىرىنەن دارىندى جاستار قاتىسىپ, باقتارىن سىنادى. ونەرپازدار ونەرىن رامازان ستامعازيەۆ, تولعانباي سەمباەۆ, گۇلميرا سارينا, ارداق يساتاەۆا, قايرات قابىشەۆ, ەركىن شۇكىمان, سەرجان مۇسايىنوۆ سىندى ەلىمىزگە بەلگىلى انشىلەر باعالادى.
بيىل العاش ۇيىمداستىرىلعان «اباي اندەرى» بايقاۋىنىڭ باس جۇلدەگەرى ۇلى اقىن اتىن العان وبلىستىڭ تالانتتى ونەرپازى تاڭات مۇقاشەۆ بولدى. ءبىرىنشى ورىن اباي وبلىسىنان قاتىسقان ساۋلەت امانعازينعا بۇيىردى. ەكىنشى ورىن يەگەرلەرى – جاڭاباي اقجول (الماتى وبلىسى) جانە اسەم ابدىعاني (شىمكەنت قالاسى). ال ءۇشىنشى ورىندى ابدۋرراحمان ەستاي ۇلى, ومىرزاق شەشحان ۇلى جانە قۇرمانعازى نۇرعابىل (الماتى قالاسى) ءبولىستى. بايقاۋ بارىسىندا ەرەكشە ونەر كورسەتكەن ورىنداۋشىلارعا ارنايى اتالىمدار بويىنشا قۇرمەت كورسەتىلدى. الماعامبەت قاپسالام ۇلى اتىنداعى ارنايى جۇلدەگە ۇلىتاۋ وبلىسىنىڭ وكىلى فارحاد جاكىش لايىق دەپ تانىلدى. شاكىر ابەنوۆ اتىنداعى ارنايى جۇلدە استانا قالاسىنان كەلگەن تاڭشولپان باعداتقىزىنا بەرىلدى. شاكارىم قۇدايبەردى ۇلى اتىنداعى ارنايى جۇلدە الماتى قالاسىنىڭ ونەرپازى التىنبەك تۇرعامباەۆقا تابىستالدى. سونىمەن بىرگە ايدا سرايل (الماتى قالاسى), ىڭكار نۇپتەكە (استانا قالاسى) جانە نۇرتۋعان ابىلاي ۇلى (الماتى قالاسى) بايقاۋدىڭ ديپلومانتتارى اتاندى.
ابايدىڭ مۋزىكالىق مۇراسىن دارىپتەۋگە ارنالعان بايقاۋ جىل سايىن ءداستۇرلى تۇردە وتەدى دەپ جوسپارلانىپ وتىر.
اباي وبلىسى