بۇگىن استانادا اۋىل اكىمدەرىنىڭ ديالوگ-پلاتفورماسى ءوتىپ جاتىر. جيىندا مەملەكەت باسشىسى قاسىم-جومارت توقاەۆ ءسوز سويلەدى, دەپ جازادى Egemen.kz.
مەملەكەت باسشىسى اۋىل اكىمدەرىمەن وسىنداي اۋقىمدى فورماتتاعى كەزدەسۋ العاش رەت ۇيىمداستىرىلىپ جاتقانىن اتاپ ءوتتى.
«بۇگىنگى جيىننىڭ ءمان-ماڭىزى ايرىقشا. ەلىمىزدەگى بارلىق دەڭگەيدەگى اتقارۋشى بيلىك وكىلدەرى وسى جەرگە ارنايى شاقىرىلدى. اۋىل اكىمدەرىنىڭ باسىم كوپشىلىگى, ياعني 80 پايىزى وسىندا. جالپى, وسىنداي اۋقىمدى قۇراممەن العاش رەت باس قوسىپ وتىرمىز.
شىن مانىندە, تاقىرىپ – وتە وزەكتى. اۋىلدىڭ جاعدايى – ەلىمىز ءۇشىن ستراتەگيالىق ماڭىزى بار ماسەلە. سەبەبى حالقىمىزدىڭ تامىرى – اۋىلدا. اۋىلدارىمىز مىقتى بولسا, ەلىمىز دە بەرەكەلى بولماق.
سوندىقتان اۋىل اكىمدەرىنە قويىلاتىن تالاپ تا, ولارعا جۇكتەلەتىن مىندەت تە ءاردايىم ەرەكشە. اكىم – ەڭ الدىمەن, حالىقپەن تىكەلەي جۇمىس ىستەيتىن مەملەكەتتىك قىزمەتشى. بۇل – وتە جاۋاپتى جۇمىس. اۋىل اكىمى اۋىلدىڭ بولمىسىن, اۋىلداعى اعايىننىڭ ءومىرىن جەتە تۇسىنەتىن ناعىز ىسكەر مامان بولۋى كەرەك. جاڭا عانا بىرنەشە اكىمنىڭ ءسوزىن تىڭدادىق. ايتىلعان وي-پىكىرلەردى جانە ۇسىنىستاردى مۇقيات زەردەلەپ, جۇمىس بارىسىندا مىندەتتى تۇردە ەسكەرۋ قاجەت», دەدى قاسىم-جومارت توقاەۆ.
پرەزيدەنت 2020 جىلى حالىققا جولداۋىندا اۋىل اكىمدەرىن تىكەلەي سايلاۋ باستاماسىن كوتەرگەن ەدى. بۇگىنگە دەيىن وسى نەگىزدە 2334 اۋىل اكىمى سايلانعان.
«2020 جىلى حالىققا جولداۋىمدا اۋىل اكىمدەرىن تىكەلەي سايلاۋ تۋرالى باستاما كوتەرگەنىمدى بىلەسىزدەر. بۇل مەملەكەتتى باسقارۋ ءىسىن تۇبەگەيلى جاڭعىرتۋ جولىنداعى اسا ماڭىزدى قادام بولدى. سەبەبى جەرگىلىكتى اكىمدەر بۇكىل بيلىك جۇيەسىنىڭ تىرەگى سانالادى.
سوندىقتان ءبىز ورىنسىز اسىعىستىققا جول بەرگەن جوقپىز, اۋىل اكىمدەرىن سايلاۋ جۇمىسىن 5 جىلدىڭ ىشىندە بىرتىندەپ جۇزەگە اسىردىق. بۇكىل ەلىمىز بويىنشا 2334 اۋىل اكىمى سايلاندى. ولاردىڭ ورتاشا جاسى – 43 جاس. جاڭادان سايلانعان اكىمدەردىڭ ۇشتەن ءبىرى – بۇرىن مەملەكەتتىك قىزمەتتە بولماعان ازاماتتار», دەدى مەملەكەت باسشىسى.