...مەشىتتە نۇرسۇلتان بوبەكتىڭ تۇساۋى كەسىلدى
ەڭبەكشىقازاق اۋدانى ەسىك قالاسىندا ءبىر مەزگىلدە 500 ادام ءمىناجات ەتەتىن جاڭا مەشىت اشىلدى. اتالعان شاراعا قازاقستان مۇسىلماندارى ءدىني باسقارماسىنىڭ ءتوراعاسى, باس ءمۇفتي, شەيح ءابساتتار قاجى دەربىسالى قاتىسىپ, يسلام ءدىنىنىڭ قاعيداتتارىن ۋاعىزدادى, يسلام ءدىنىنىڭ باستى باعىتى – ۇلتقا, ناسىلگە بولىنبەي, بىرلىك پەن ىنتىماقتا بولىپ, ءوزارا دوستىقتى بەرىك ۇستانۋ ەكەندىگىن ورتاعا سالدى.مەملەكەت باسشىسى نۇرسۇلتان نازارباەۆتىڭ قالاۋى مەن ساياساتى دا وسى. دەمەك, ورتاق شاڭىراقتاعى وسى قۇندىلىقتاردان اينىمايىق دەگەن نيەتپەن باتا بەردى.
جۇرتشىلىق بەسىن نامازىنان سوڭ ءبىر جاسقا كەلگەن نۇرسۇلتان ءبوبەكتىڭ تۇساۋىن كەسىپ, اق جول تىلەدى. كىشكەنتاي بوبەك اپىل-تاپىل باسىپ, العاشقى قادامىن اللا ءۇيىنىڭ اق تابالدىرىعىنان باستادى.
كۇمىسجان بايجان, الماتى وبلىسى.
...ديىرمەن كەشەنى اشىلدى
قوستاناي قالاسىنىڭ ىرگەسىندە اشىلعان “التىن ماي” ديىرمەن كەشەنى – وبلىستا بيىل جۇزەگە اساتىن 11 ينۆەستيتسيالىق جوبانىڭ العاشقىسى. مۇندا ورناتىلعان شەتەلدىك جابدىق تاۋلىگىنە 300 توننا بيداي تارتا الادى. كاسىپورىن جۇزدەن اسا ادامعا جۇمىس ورنىن ۇسىنىپ وتىر. ديىرمەن كەشەنىن سالۋ 1 ميلليارد 300 ميلليون تەڭگەگە ءتۇستى. بۇل – وبلىستىڭ اۋىل شارۋاشىلىعى سالاسىنداعى ينۆەستيتسيالىق جوبالارعا بولىنگەن ەڭ كولەمدى قارجى.
جوعارى ساپالى ۇن وندىرەتىن ديىرمەن وبلىس ەكونوميكاسىنا سەرپىن بەرەدى. ال ونىڭ ءونىمى ەكسپورتقا شىعارىلاتىن بولادى. كەشەندە, سونىمەن قاتار, زىعىر مايى دا ءوندىرىلەدى. ول ەل رىنوگىنداعى وتاندىق تاۋارلاردىڭ ۇلەسىن ارتتىرماق.
ءنازيرا جارىمبەتوۆا, قوستاناي.
...پوشتا بايلانىسى قىزمەت كورسەتەدى
چكالوۆ اۋىلىندا پوشتا بايلانىسىنىڭ جاڭا عيماراتى بوي كوتەردى. ول ۇكىمەتتىڭ 2004-2010 جىلدارعا ارنالعان اۋىلدىق اۋماقتاردى دامىتۋ باعدارلاماسى بويىنشا ءجۇزەگە اسىرىلدى. كەڭسە ءۇيىنىڭ جوباسىن “قازپوشتا” اق دايىندادى. مۇندا پوشتا قىزمەتكەرلەرىنىڭ تالاپقا ساي جۇمىس ىستەپ, ساپالى قىزمەت كورسەتۋىنە قولايلى جاعداي تۋعىزىلعان. جۇمىس ورىندارىنىڭ كومپيۋتەرلەندىرىلۋى, وندىرىستىك ۇدەرىستەردىڭ كورپوراتيۆتى باسقارۋ جۇيەسىنە قوسىلۋى ءىستىڭ اتقارىلۋىن جەڭىلدەتە تۇسكەن. كليەنتتەر بانكومات قىزمەتىن دە پايدالانا الادى. مەكەمە قىزمەتكەرلەرى 851 زەينەتكەر مەن الەۋمەتتىك جاردەماقى جانە 471 جالاقى الاتىن ادامدارعا ءوز قىزمەتتەرىن ۇسىنادى.
اتالمىش باعدارلاما شەڭبەرىندە قىزىلجار, ايىرتاۋ, م.جۇماباەۆ اۋداندارىندا وسىنداي ۇلگىلى جوبالار قولعا الىناتىن بولادى.
ءومىر ەسقالي, سولتۇستىك قازاقستان وبلىسى, تايىنشا اۋدانى.
...بالاباقشا 45 كۇندە سالىندى
تەمىر اۋدانىنىڭ قۇمقۇدىق اۋىلىندا ەلباسى نۇرسۇلتان نازارباەۆتىڭ بيىلعى جولداۋىندا كورسەتىلگەن “بالاپان” باعدارلاماسى اياسىندا 25 ورىندىق “بالاپان” بالاباقشاسى پايدالانۋعا بەرىلدى. بالاباقشا قۇرىلىسىنا كورەي ۇلتتىق مۇناي كورپوراتسياسى قارجىلاي دەمەۋشىلىك جاسادى. عيماراتتىڭ قۇرىلىسىن “كازپرومسترويگرۋپپ” جشس نەبارى 45 كۇندە سالىپ ءبىتىردى. بۇل – وسى اۋىلدا سوڭعى وتىز جىل ىشىندە سالىنعان العاشقى جاڭا قۇرىلىس نىسانى.
عيماراتتىڭ اشىلۋ سالتاناتىنا اۋدان اكىمى باۋىرجان قانيەۆ, كورەي ۇلتتىق مۇناي كورپوراتسياسى باس ديرەكتورىنىڭ ورىنباسارى ليم گىنمۋك جانە باسقالارى قاتىسىپ, بالاباقشانىڭ ءىشى سابيلەردىڭ شاتتىق كۇلكىسىنە تولى بولسىن دەگەن تىلەكتەرىن ءبىلدىردى. اۋىل تۇرعىندارى قازاقى داستۇرمەن وسىنداعى الەۋمەتتىك ماسەلەلەردى شەشۋگە ۇدايى اتسالىسىپ كەلە جاتقان ليم گىنمۋكتىڭ يىعىنا شاپان جاۋىپ, استىنا ات مىنگىزدى.
ساتىبالدى ءساۋىرباي, اقتوبە وبلىسى.