ماڭعىستاۋ وبلىسىنداعى ADVANTA.KZ جەكەمەنشىك مەكتەپ-ليتسەيىنە 108 ملن تەڭگەدەن استام قارجى اۋدارىلدى. بۇل – قارجى مينيسترلىگىنىڭ e-Qazyna پلاتفورماسىنداعى جاڭا OrtaBilim تسيفرلىق سەرۆيسى ارقىلى قارجىلاندىرۋدى العاش بولىپ العان وتاندىق ءبىلىم ۇيىمى, دەپ حابارلايدى Egemen.kz.
جاڭا سەرۆيس مەكتەپتەردى قارجىلاندىرۋ جۇمىسىن بارىنشا اشىق ەتۋگە باعىتتالعان. بۇعان دەيىن جۇرگىزىلگەن اۋديتتەر قاعاز جۇزىندە وقۋشىلار سانىن اسىرىپ كورسەتۋ, شتاتتا بار بولىپ كورىنگەنىمەن ءىس جۇزىندە جۇمىس ىستەمەيتىن قىزمەتكەرلەردىڭ تىركەلۋى, مەكتەپ عيماراتىنىڭ تالاپقا ساي بولماۋى سەكىلدى كوپتەگەن زاڭبۇزۋشىلىقتى انىقتاعان ەدى. كەي وڭىرلەردە وقۋشىلار تويحانا سەكىلدى ورىنداردا ءبىلىم العان جاعدايلار دا تىركەلگەن.
OrtaBilim سەرۆيسى وسى ماسەلەلەردى جويۋدى كوزدەيدى. ەندى ءاربىر مەكتەپتىڭ بيۋدجەتى, وقۋشى سانى, كەزەگى, وتىنىمدەرى تسيفرلىق جۇيەدە اشىق كورسەتىلەدى. جۇيە اۆتوماتتى فورماتتا لوگيكالىق تەكسەرىستەر جۇرگىزەدى. مىسالى, وقۋشىنىڭ نەمەسە مۇعالىمنىڭ جسن بىرنەشە مەملەكەتتىك دەرەكتەر بازاسىمەن سالىستىرىلىپ, ونىڭ ناقتى تىركەلگەن-تىركەلمەگەنى بىردەن انىقتالادى. وقۋشىلار تۋرالى دەرەكتەر «ەلەكتروندى كۇندەلىك» جۇيەسىمەن بىرىكتىرىلگەن, سوندىقتان مالىمەتتەر اۆتوماتتى تۇردە جاڭارىپ وتىرادى. ناتيجەسىندە اقشا ناقتى وقىپ جاتقان بالالار سانىنا سايكەس تولەنەدى.
قازىر بيۋدجەت ۇلىتاۋ, قىزىلوردا جانە اقمولا وبلىستارىنان باسقا بارلىق وڭىردە جاريالانعان. ال جەرگىلىكتى مەكتەپتەر قارجىلاندىرۋعا ءوتىنىش بەرمەس بۇرىن وڭىرلىك ءبىلىم باسقارمالارى بيۋدجەتتەردى اشىق جاريالاۋى قاجەت.
ۆەدومستۆونىڭ مالىمەتىنشە, جەكەمەنشىك مەكتەپتەر ەلىمىزدىڭ ءبىلىم بەرۋ جۇيەسىندە ماڭىزدى ءرول اتقارادى. ولار مەكتەپ تاپشىلىعىن ازايتۋعا كومەكتەسەدى جانە بيۋدجەتكە تۇسەتىن جۇكتەمەنى جەڭىلدەتەدى. دەگەنمەن, بولىنەتىن قاراجاتتىڭ ءتيىمدى ءارى ءادىل جۇمسالۋى قاتاڭ باقىلاۋدى تالاپ ەتەدى. سوندىقتان كەلەشەكتە وسى سالاداعى باسەكەلەستىكتى ارتتىرۋ ءۇشىن ۆاۋچەرلىك جۇيە ەنگىزۋ جوسپارلانىپ وتىر.
OrtaBilim – قارجى مينيسترلىگىنە قاراستى «اقپاراتتىق-ەسەپتەۋ ورتالىعى» اق ازىرلەگەن وتاندىق تسيفرلىق ءونىم. بۇل ورتالىق – قازاقستانداعى ەڭ تاجىريبەلى IT ۇيىمدارىنىڭ ءبىرى. بيىل ونىڭ قۇرىلعانىنا 32 جىل تولدى. 1993 جىلى 2 قاراشادا قر مينيسترلەر كابينەتى قاۋلىسىمەن قۇرىلعان ورتالىق وسى ۋاقىت ىشىندە مەملەكەتتىك م ۇلىك ءتىزىلىمى, استىق قولحاتتارى جۇيەسى, قارجى ەسەپتىلىك دەپوزيتاريى, ازاماتتاردىڭ بانكروتتىعى, مەملەكەتتىك شەكاراداعى ەلەكتروندى كەزەك, CarGoRuqsat جانە CarGoAlem, بيزنەسكە ارنالعان مەملەكەتتىك قولداۋ شارالارىنىڭ بىرىڭعاي ءتىزىمى, مۇناي جانە الكوگول ونىمدەرىن ەسەپكە الۋ جۇيەلەرى, جەر قويناۋىن پايدالانۋدىڭ بىرىڭعاي پلاتفورماسى سياقتى كوپتەگەن ماڭىزدى اقپاراتتىق جۇيەنى ازىرلەپ, ولاردى تۇراقتى تۇردە قولداپ كەلەدى. ورتالىقتىڭ بارلىق سەرۆيستەرى دەرەكتەردىڭ قاۋىپسىزدىگى بويىنشا مىندەتتى اتتەستاتتاۋدان ۋاقتىلى ءوتىپ وتىرادى.