ينتەرنەت الاياقتىعى كۇرت كوبەيدى. الاياقتار حالىقتى الداۋ ءۇشىن ءتۇرلى ءتاسىل قولدانادى. سول سحەمالاردىڭ ەڭ ءجيى تاراعانى – دروپپەرلەردى پايدالانۋ, دەپ جازادى Egemen.kz.
اباي وبلىسى پوليتسيا دەپارتامەنتىنىڭ كيبەرقىلمىسقا قارسى كۇرەس باسقارماسىنىڭ جەدەل ۋاكىلى اسەت ەگەۋباەۆ دروپپەرلىكتىڭ قانداي قاۋىپ توندىرەتىنىن ءتۇسىندىرىپ بەردى.
«دروپپەر دەگەنىمىز – ءوز اتىنا بانك كارتاسىن نەمەسە ونلاين ءاميان اشىپ, ونى بوتەن ادامعا پايدالانۋعا بەرەتىن تۇلعا. بۇل كارتالار كوبىنە ۇرلانعان اقشا مەن زاڭسىز وپەراتسيالاردى جاسىرۋ ءۇشىن قولدانىلادى. كوپ ادام كارتا بەرۋدى قاراپايىم كومەك دەپ قابىلدايدى. بىراق كارتاڭىزدى بوتەن ادامعا بەرسەڭىز, ءسىز سول ادامنىڭ جاساعان قارجىلىق قىلمىسىنا قاتىسقان بولاسىز. بۇل جاي عانا ابايسىزدىق ەمەس, تىكەلەي قىلمىستىق سحەماعا قوسىلۋ» دەدى ول.
دروپپەر بولۋدىڭ سالدارى اۋىر. قولدانىستاعى زاڭ بويىنشا كارتاسىن بەرگەن ادام مىندەتتى تۇردە جاۋاپكەرشىلىككە تارتىلادى. تەرگەۋ بارىسىندا دروپپەردىڭ ارەكەتى الاياقتىققا كومەكتەسۋ, اقشانى زاڭداستىرۋعا قاتىسۋ نەمەسە قىلمىستىق توپتىڭ ءبىر بولىگى رەتىندە قارالۋى مۇمكىن. قانداي جاعدايدا دا ءىس قىلمىستىق سيپاتتا بولادى جانە جازانىڭ ءتۇرى جەڭىل ەمەس. ايىپپۇل كولەمى ۇلكەن بولۋى ىقتيمال. سونىمەن بىرگە بوستاندىعىن شەكتەۋ جازاسى نەمەسە اۋىر جاعدايدا باس بوستاندىعىنان ايىرۋ جازاسى دا قولدانىلادى.
«كارتاڭىزدى پايدالانۋعا بەرسەڭىز, ول كارتا ارقىلى جاسالعان كەز كەلگەن زاڭسىز اۋدارىم ءسىزدىڭ اتىڭىزعا تىركەلەدى. تەرگەۋ الدىمەن كارتا يەسىن تابادى. سول كەزدە ەشتەڭەدەن حابارسىزبىن دەۋ جاۋاپكەرشىلىكتەن قۇتقارمايدى. بۇل وتە اۋىر سالدارى بار ارەكەت. مۇقيات بولۋ كەرەك. بوتەن ادامنىڭ وتىنىشىمەن كارتا اشۋ, دايىن كارتاڭىزدى بەرۋ, شوتىڭىزدى پايدالانۋعا رۇقسات ەتپەڭىز. نەعۇرلىم قاۋىپسىز شەشىم – كارتاڭىزدى ەشكىمگە بەرمەۋ, كۇماندى ۇسىنىستاردان باس تارتۋ جانە قارجىلىق دەرەكتەرىڭىزدى قورعاۋ. بانك كارتاسى تەك سىزدىكى. ونى بوتەن ادامعا بەرۋ ءوز بولاشاعىڭىزعا قاۋىپ توندىرۋمەن تەڭ», دەپ ءتۇسىندىردى ءا. ەگەۋباەۆ.