ەلەۋسىز نارىقتاعى ەرەكشە ءوسىم: ۇساق-تۇيەكتى جوندەيتىن ماماندار ۇتىپ تۇر

كومپيۋتەرلەردى, جەكە تۇتىنۋ زاتتارى مەن تۇرمىستىق بۇيىمداردى جوندەۋ قىزمەتتەرى تۇرمىستىق سەرۆيستىڭ شاعىن, بىراق تۇراقتى بولىگىن قۇرايدى. باعالاردىڭ ءوسۋى جانە حالىقتىڭ ناقتى تابىسىنىڭ تومەندەۋى ءۇي تۇرمىسىنا قاجەتتى زاتتاردى قالپىنا كەلتىرۋگە دەگەن سۇرانىستى كۇشەيتتى. بيىلعى جىلدىڭ قاڭتار–ماۋسىم ايلارىندا اتالعان ساناتتاعى جوندەۋ قىزمەتتەرىنىڭ كولەمى 45,8 ملرد تەڭگەگە جەتىپ, 2024 جىلدىڭ سايكەس كەزەڭىمەن سالىستىرعاندا 18,5%-عا ارتتى. ءبىر جىل بۇرىن ءوسىم 7% بولعان. سوڭعى بەس جىلدا بۇل سەكتورداعى قىزمەت كولەمى 2,5 ەسە, ال ون جىلدا 3,8 ەسە ۇلعايدى.

ايماقتار بويىنشا قىزمەت كولەمىنىڭ جارتىسىنان استامى الماتى مەن استاناعا تيەسىلى – تيىسىنشە 15,8 ملرد جانە 7,8 ملرد تەڭگە. سونداي-اق ايتارلىقتاي كولەم قاراعاندى (3,9 ملرد تگ), اتىراۋ (2,9 ملرد تگ) جانە اقتوبە (2 ملرد تگ) وبلىستارىندا تىركەلدى.

سالانىڭ ەڭ بەلسەندى دامىپ جاتقان بولىگى – كومپيۋتەرلەر مەن پەريفەريالىق قۇرىلعىلاردى جوندەۋ. بيىلعى قاڭتار-ماۋسىمدا بۇل سەگمەنتتىڭ كولەمى 21,8 ملرد تەڭگەنى قۇراپ, ءبىر جىلدا 10,1%-عا ءوستى. نەگىزگى سۇرانىس بولشەكتەردى اۋىستىرۋعا, مەحانيكالىق زاقىمدانۋدى قالپىنا كەلتىرۋگە, باعدارلامالىق اقاۋلاردى جويۋعا جانە سەرۆيستىك قىزمەت كورسەتۋگە بايلانىستى.

ەلەكتر تۇرمىستىق تەحنيكانى جوندەۋ قىزمەتتەرى تۇراقتى ءوسىم كورسەتىپ كەلەدى. ەلەكتروندىق تۇرمىستىق تەحنيكانى جوندەۋ كولەمى 34,6%-عا ءوسىپ, 7,6 ملرد تەڭگەگە, ال تۇرمىستىق, ءۇي جانە باقشا جابدىقتارىن جوندەۋ كولەمى 18,4%-عا ارتىپ, 2,3 ملرد تەڭگەگە جەتتى.

ەلەۋلى كولەمدەر بايلانىس جابدىقتارىن جوندەۋدە (4 ملرد تگ), تىگىن جانە توقىما بۇيىمدارىن جوندەۋدە (2,5 ملرد تگ), جيھاز بەن ينتەرەر زاتتارىن (2,2 ملرد تگ), اياق كيىم جوندەۋدە (2 ملرد تگ) بايقالدى.

وتكەن جىلمەن سالىستىرعاندا ەڭ جوعارى ءوسىم كەلەسى سالادا تىركەلدى:

تون, بىلعارى بۇيىمدارى مەن باس كيىمدەردى جوندەۋ – 5,1 ەسە,

جيھاز جانە ينتەرەر زاتتارى – 3,9 ەسە,

اياق كيىم جوندەۋ – 2,8 ەسە.

سونىمەن قاتار كەيبىر سالالاردا كۇرت تومەندەۋ بايقالدى:

ۆەلوسيپەد جوندەۋ – 12,7 ەسە,

مۋزىكالىق اسپاپتار – 10,1 ەسە,

ساعاتتار – 2,5 ەسە,

تەرى جانە گالانتەرەيا بۇيىمدارى – 2 ەسە.

2025 جىلدىڭ قازان قورىتىندىسى بويىنشا:

تۇرمىستىق تەحنيكا جوندەۋ قۇنى 10,4%-عا ءوستى (وتكەن جىلى بۇل 2 ەسە تومەن بولعان),

كيىمدى تازالاۋ جانە جوندەۋ باعاسى 13,5%-عا قىمباتتادى,

اياق كيىم جوندەۋ — 8,9%-عا (وتكەن جىلى — 11,5%) قىمباتتادى.

جوندەۋ قىزمەتتەرى نارىعىنداعى باعانىڭ ەكى تاڭبالى قارقىنمەن ءوسۋى بۇل سالانىڭ وزەكتىلىگى مەن تۇراقتىلىعىن ايقىندايدى.

نارىق ءوسىمىن جالعاستىرىپ وتىر, اسىرەسە قالالىق جەرلەردە تەحنيكا مەن تۇرمىستىق بۇيىمداردى قالپىنا كەلتىرۋگە دەگەن سۇرانىس ارتىپ كەلەدى.