ەكونوميكانىڭ جەدەل دامۋى, تسيفرلىق وزگەرىستەر جانە قارجى ۇيىمدارى اراسىنداعى باسەكە ەلىمىزدەگى بانك جانە قارجىلىق يندۋسترياسىن ايتارلىقتاي ىلگەرىلەتتى. اكتيۆتەر, كليەنتتىك بازا جانە نارىقتىق قۇن ءوسىپ, ەلىمىز ايماقتاعى ماڭىزدى قارجى ورتالىعىنا اينالىپ كەلەدى, دەپ جازادى Egemen.kz.
كASE دەرەگىنە سۇيەنسەك, كاپيتاليزاتسيا جاعىنان قارجى سەكتورىنداعى كوشباسشى Kaspi.kz بولىپ وتىر. كومپانيانىڭ نارىقتىق قۇنى 7,3 ترلن تەڭگەگە جەتىپ, وزگە قارجى ۇيىمدارىنان بىرنەشە ەسە الدا. Kaspi.kz بۇگىندە KASE الاڭىنداعى ەڭ ءىرى ءۇش كومپانيانىڭ قاتارىنا كىرەدى, ونىڭ الدىندا تاۋ-كەن سەكتورىنداعى ەكى الپاۋىت تۇر.
ەكىنشى ورىندا Halyk Bank ورنالاسقان. ونىڭ كاپيتاليزاتسياسى 3,5 ترلن تەڭگە كولەمىندە تىركەلگەن. بۇعان دەيىن ۇزدىك ۇشتىككە Freedom Holding Corp. دا كىرگەن ەدى, الايدا 25 قاراشادا KASE بۇل كومپانيا بويىنشا دەرەكتەردى پلاتفورمادان الىپ تاستادى. العاشقى بەستىك قاتارىنا ForteBank (1,1 ترلن تەڭگە) جانە بانك تسەنتركرەديت (839,8 ملرد تەڭگە) ەنەدى.
كاپيتاليزاتسيانىڭ ارتۋى ينۆەستورلاردىڭ سەنىمىن, نارىقتىڭ تۇراقتى دامۋ قارقىنىن جانە قارجى ۇيىمدارىنىڭ باسەكەگە قابىلەتتىلىگىن كورسەتەدى. كوشباسشى كومپانيالار اشىقتىق, تەحنولوگيالىق تيىمدىلىك جانە كليەنتكە باعدارلاۋ جاعىنان نارىقتىڭ جاڭا ستاندارتتارىن قالىپتاستىرۋدا.
كاپيتاليزاتسيا كومپانيانىڭ بيرجاداعى نارىقتىق قۇنىن بىلدىرەدى. ءبىر اكتسيانىڭ باعاسى اينالىمداعى اكتسيالار سانىنا كوبەيتىلەدى. بۇل كورسەتكىش بيزنەس كولەمىن, ينۆەستورلار سەنىمىن جانە كومپانيانىڭ باسەكەلەستەرى اراسىنداعى ورنىن ايقىندايدى.
ەلىمىزدىڭ قارجى ۇيىمدارىنا شەتەلدىك ينستيتۋتسيونالدىق ينۆەستورلاردىڭ قىزىعۋشىلىعى تۇراقتى ءوسىپ كەلەدى. مۇنداي ينۆەستورلار قاتارىندا الەمدىك حەدج-فوندار, حالىقارالىق بانكتەر جانە ءىرى ينۆەستيتسيالىق قۇرىلىمدار بار. NASDAQ بيرجاسىندا ساۋدالاناتىن Kaspi.kz جانە Freedom Holding Corp. حالىقارالىق نارىقتا ەڭ تانىمال وتاندىق كومپانيالار ساناتىنا كىرەدى.
ينۆەستورلار قۇرىلىمىندا ايقىن ايىرماشىلىق بار. Kaspi.kz كاپيتالىنىڭ 38,98 پايىزى ينستيتۋتسيونالدىق ينۆەستورلارعا تيەسىلى, بۇل كومپانياعا دەگەن سەنىمنىڭ جوعارى ەكەنىن دالەلدەيدى. Freedom Holding Corp. بويىنشا بۇل ۇلەس نەبارى 4,09 پايىز دەڭگەيىندە.
ينستيتۋتسيونالدىق ينۆەستورلار سانى Kaspi.kz بويىنشا 207, Freedom Holding Corp. بويىنشا 152. ينۆەستورلار يەلىگىندەگى اكتسيا كولەمى Kaspi.kz ءۇشىن 74,1 ملن دانا, Freedom Holding Corp. ءۇشىن 2,5 ملن دانا. اكتسيالاردىڭ جالپى قۇنى Kaspi.kz بويىنشا 5,4 ملرد دوللار, ال Freedom Holding Corp. بويىنشا 345 ملن دوللار. NASDAQ دەرەكتەرى وزگەرىسسىز ساقتالعانىمەن, KASE پلاتفورماسى Freedom Holding Corp. تۋرالى اقپاراتتى 25 قاراشادا الىپ تاستاعانىن ەسكەرگەن ءجون.
Kaspi.kz ينۆەستورلارى اراسىندا Baring Fintech Manager Holding Ltd, Baillie Gifford and Co, FIL Ltd, Pzena Investment Management LLC, FMR LLC, Sands Capital Management LLC, Schroder Investment Management Group سياقتى الەمگە ايگىلى ينۆەستيتسيالىق ۇيىمدار بار. ولاردىڭ قاتارىندا BlackRock Inc, HSBC Holdings Plc, JPMorgan Chase and Co, Goldman Sachs Group Inc, Morgan Stanley سىندى جاھاندىق الپاۋىتتار دا كەزدەسەدى.
Freedom Holding Corp. ينۆەستورلارىنىڭ العاشقى قاتارىندا BlackRock Inc, State Street Corp, Morgan Stanley, Vanguard Group Inc, Bank of America Corp سەكىلدى ءىرى حالىقارالىق ويىنشىلار بار. الايدا ينۆەستيتسيا كولەمى بويىنشا ەكى كومپانيا اراسىندا ايىرماشىلىق ايتارلىقتاي. Freedom Holding Corp. ءۇشىن 10 ملن دوللاردان اساتىن ۇلەسكە يە ينۆەستورلار سانى جەتى عانا بولسا, Kaspi.kz بويىنشا مۇنداي ينۆەستورلار سانى 59.
وسى دەرەكتەرگە سۇيەنسەك, ەكى كومپانيا دا حالىقارالىق دەڭگەيدە ۇلكەن نازارعا يە. بىراق Kaspi.kz ينستيتۋتسيونالدىق ينۆەستورلار ءۇشىن اناعۇرلىم تارتىمدى بولىپ وتىر. بۇل ونىڭ بيزنەستىڭ تەحنولوگيالىق مودەلى, نارىقتاعى ورنى جانە تۇراقتى ءوسىم قارقىنى بويىنشا جوعارى باعالاناتىنىن كورسەتەدى.