«اتامەكەن» ۇكپ جانىنداعى مادەنيەت جانە كرەاتيۆتىك يندۋستريالار جونىندەگى كىشىكوميتەتتىڭ الاڭىندا زياتكەرلىك مەنشىككە قاتىستى قابىلدانعان تۇزەتۋلەردىڭ نەگىزگى تەتىكتەرى جاريا ەتىلدى. جيىنعا سەنات پەن ءماجىلىس دەپۋتاتتارى, ادىلەت مينيسترلىگىنىڭ وكىلدەرى جانە كاسىپكەرلەر پالاتاسى قاتىستى, دەپ جازادى Egemen.kz.
باستى جاڭالىق – ۇجىمدىق قۇقىقتاردى باسقارۋعا ارنالعان بىرىڭعاي تسيفرلىق پلاتفورما. جاڭا جۇيە اۆتورلىق شىعارمالاردىڭ پايدالانىلۋىن, كەلىسىمشارتتار مەن سىياقى تولەمدەرىن ءبىر ورتالىققا جيناقتاپ, اشىق ءارى قولايلى تەتىك قالىپتاستىرماق.
ادىلەت ۆيتسە-ءمينيسترى بوتاگوز جاقسەلەكوۆانىڭ ايتۋىنشا, بۇل قادام شىعارماشىلىق يەلەرىنە تيەسىلى سىياقىنىڭ ءادىل جينالۋىنا جانە ۋاقتىلى بولىنۋىنە جول اشادى.
كەزدەسۋگە كرەاتيۆتىك يندۋستريا, وڭىرلىك پالاتالار, تەاترلار, فيلارمونيالار, اۆتورلار مەن كاسىپكەرلەردەن قۇرالعان 200-دەن استام قاتىسۋشى كەلىپ, جاڭا پلاتفورمانىڭ جۇمىس مەحانيزمىن تالقىلادى. قاتىسۋشىلار تسيفرلاندىرۋدىڭ ەنگىزىلۋى سالاداعى اشىقتىقتى كۇشەيتىپ, شىعارماشىلىق ورتاعا سەنىمدىلىك پەن تيىمدىلىك قوسا تۇسەتىنىن اتاپ ءوتتى.