«قىلمىستى توقتاتۋ» جەدەل-پروفيلاكتيكالىق ءىس-شاراسى اياسىندا پوليتسەيلەر كوشى-قون قىزمەتى جەدەل بولىمشەلەرمەن بىرلەسىپ قوعامدىق تاماقتانۋ ورىندارىندا, بازارلاردا, كولىك جۋ بەكەتتەرىندە جانە جولاۋشىلار تاسىمالى سالاسىندا 40-قا جۋىق قۇقىق بۇزۋشىلىق انىقتادى, دەپ حابارلايدى Egemen.kz.
ەلىمىزدە «قىلمىستى توقتاتۋ» جەدەل-پروفيلاكتيكالىق ءىس-شاراسى ءوتىپ جاتىر.ء ىس-شارانىڭ ماقساتى – كوشى-قون زاڭناماسىن بۇزۋ فاكتىلەرىن انىقتاۋ.
ەكى كۇن ىشىندە شامامەن 40-قا جۋىق قۇقىق بۇزۋشىلىق تىركەلگەن. ونىڭ ىشىندە:
ەلدە بولۋ مەرزىمى اياقتالعاننان كەيىن ۋاقتىلى شىقپاۋ, ۆيزادا كورسەتىلگەن ماقساتقا ساي كەلمەيتىن قىزمەتپەن اينالىسۋ, رۇقساتسىز جۇمىس ىستەۋ دەرەكتەرى انىقتالدى.ماسەلەن, جولاۋشىلاردى ارنايى رۇقساتسىز تاسىمالداعان 32 جاستاعى شەتەل ازاماتى اكىمشىلىك جاۋاپكەرشىلىككە تارتىلدى. وسىنداي قۇقىق بۇزۋشىلىقتار تاكسي جۇرگىزۋشىلەرى, سونداي-اق كولىك جۋ بەكەتتەرى مەن بازارلاردا جۇمىس ىستەيتىندەردىڭ اراسىندا انىقتالدى.
انىقتالعان بارلىق فاكتىلەر بويىنشا زاڭ اياسىندا شارالار قابىلداندى. كوشى-قون پوليتسياسى شەتەلدىك ازاماتتار مەن جۇمىس بەرۋشىلەرگە كوشى-قون زاڭناماسىنىڭ تالاپتارىن ءتۇسىندىرىپ, ەل اۋماعىندا زاڭدى بولۋ جانە ەڭبەك قىزمەتىن جۇزەگە اسىرۋ ءتارتىبى تۋرالى اقپارات بەرۋدە.
مۇنداي ءىس-شارالار قۇقىق بۇزۋشىلىقتاردىڭ الدىن الۋعا جانە قالاداعى قاۋىپسىزدىك دەڭگەيىن ارتتىرۋعا باعىتتالعان.