اقتاۋدا ەكى جىلعا سوزىلعان ۆاۋچەر تاپشىلىعىنا بايلانىستى مىڭداعان بالا سپورت پەن شىعارماشىلىق ۇيىرمەلەرگە قاتىسا الماي وتىر. بۇل جاعداي كوپبالالى وتباسىلاردىڭ تۇرمىسىن قيىنداتىپ جىبەرگەن, دەپ حابارلايدى Egemen.kz.
اتا-انالاردىڭ ايتۋىنشا, ۇيىرمە باعاسى ارزان ەمەس.
«مەنىڭ, مىسالى, ءتورت بالام بار. تەگىن جازدىرعىم كەلەدى. ءبىرى فۋتبولعا, ەكىنشىسى كۇرەسكە بارعىسى كەلەدى. اقىلى ۇيىرمەلەرگە بەرگىم كەلەدى, بىراق قارجى مۇمكىندىك بەرمەيدى. ۆاۋچەرلەر اشىلمايدى, ءسويتىپ بالالارىمىز ۇيىرمەسىز قالدى», – دەپ شاعىمداندى قالامقاس ساندىباي.
قيىن جاعدايعا كاسىپكەرلەر دە تاپ بولعان. قارجىلاندىرۋ بولماعاندىقتان, ولار كوپ بالانى قابىلداي المايدى.
«بىزگە بارلىق مۇمكىندىكتەردى جاۋىپ تاستادى. اتا-انالار ءبىزدى كىنالايدى. ۆاۋچەرلەردى وزدەرىڭىز بەرمەي جاتىرسىزدار دەيدى. بىراق بۇل ءبىزدىڭ قولىمىزدا ەمەس ەكەنىن تۇسىندىرەمىز. ۆاۋچەر بەرۋ جۇيەسى وبلىستىق سپورت باسقارماسىنىڭ باقىلاۋىندا», – دەدى كاسىپكەر قالبيبى جۇماباەۆا.
وبلىستىق سپورت باسقارماسىنداعىلار ەكى جىلدىق كىدىرىستىڭ سەبەبىن مەملەكەتتىك اۋديتپەن تۇسىندىرەدى.
«مەملەكەتتىك اۋديت ءارتۇرلى كاسىپكەرلەرگە شامامەن 50 ملن تەڭگەنى قايتارۋدى ۇسىندى. وسى ۇسىنىستار بويىنشا سوت پروتسەستەرى ءبىر جىلعا جۋىق ۋاقىت ءجۇردى. ءبىز كەمىندە بەس مىڭ ۆاۋچەر بەرۋگە دايىنبىز. بىراق ناقتى بۇگىن بە, ەرتەڭ بە ايتا المايمىز, ويتكەنى ءبارى DamuBala پلاتفورماسىنداعى تەحنيكالىق اقاۋلاردىڭ جويىلۋىنا بايلانىستى», – دەدى ماڭعىستاۋ وبلىسى دەنە شىنىقتىرۋ جانە سپورت باسقارماسىنىڭ باسشىسى ماقسات مۇقاش.
ول قوسىمشا ازىرگە بالالاردى مەملەكەتتىك سپورت مەكتەپتەرىندەگى سەكتسيالارعا تەگىن جازدىرۋعا بولاتىنىن ايتتى. ول ءۇشىن الدىن الا جازىلىپ, كەزەككە تۇرۋ قاجەت.
بۇعان دەيىن وڭىردە جىلىنا 10 مىڭعا دەيىن ۆاۋچەر بەرىلەتىن. الايدا تەكسەرىستەردەن كەيىن بۇل سان ەكى ەسەگە قىسقارۋى مۇمكىن.