قوستانايدا بەس قاباتتى تۇرعىن ۇيدە شىققان ورتتەن بەس ادام, ونىڭ ىشىندە ءبىر بالا قۇتقارىلدى. ءورت از ۋاقىت ىشىندە تولىق ءسوندىرىلدى, دەپ حابارلايدى Egemen.kz.
112 قىزمەتىنە كوپقاباتتى ءۇيدىڭ ءتورتىنشى قاباتىنداعى پاتەردەن ءورت شىققانى تۋرالى اقپارات تۇسكەن سوڭ, وقيعا ورنىنا تجم ءورت سوندىرۋشىلەرى مەن مەديتسيانلىق جەدەل جاردەم بريگادالارى دەرەۋ جەتكەن.
قىزىل جالىن پاتەر ءىشىن تەز شارپىعاندىقتان, قۇتقارۋشىلار ءبىرىنشى كەزەكتە ادامداردى ەۆاكۋاتسيالاۋعا كىرىستى.
قۇتقارۋشىلار باسپالداقپەن ءتورت ادامدى, سونىڭ ىشىندە ءبىر بالانى قاۋىپسىز جەرگە شىعاردى.
تاعى ءبىر ەر ادامدى ءورت ءسوندىرۋ اۆتوساتىسىنىڭ كومەگىمەن تەرەزە ارقىلى ەۆاكۋاتسيالادى.
بارلىق زارداپ شەككەن ادام جەدەل جاردەم دارىگەرلەرىنە تاپسىرىلدى.
تجم ءورتتى از ۋاقىتتىڭ ىشىندە تولىق سوندىرگەنىن حابارلادى. قازىر ماماندار ءورتتىڭ ناقتى شىعۋ سەبەبىن انىقتاپ جاتىر.
ماماندار تۇرعىندارعا ەلەكتر قۇرىلعىلارىن پايدالانعاندا, جىلىتۋ قۇرىلعىلارىن قوسقاندا, ۇيدە جالعىز بالالاردى قالدىرعاندا ءورت قاۋىپسىزدىگىن مۇقيات ساقتاۋدى ەسكەرتەدى.
«وسىنداي قاراپايىم تالاپتاردى ورىنداماۋ قايعىلى جاعدايلارعا اكەلۋى مۇمكىن», – دەيدى ولار.