وبلىس باسشىلىعى مەن اۋىلدىق وكرۋگ اكىمدەرى اراسىنداعى ديالوگ مازمۇندى ءارى ناقتى سيپاتقا يە بولۋدا. بۇگىندە اۋىل اكىمدەرى ماسەلەلەردى عانا ەمەس, ولاردى شەشۋدىڭ تياناقتى ۇسىنىستارىن, ەسەپتەرى مەن ناقتى تەتىكتەرىن ۇسىنادى, دەپ جازادى Egemen.kz.
وسى باعىتتاعى جۇيەلى جۇمىسقا قوناەۆ قالاسىندا جۇزەگە اسقان «اكىمدەر مەكتەبى» جوباسى ەلەۋلى ۇلەس قوستى. جوبا اۋىل اكىمدەرىنە زاماناۋي باسقارۋ قۇرالدارىن مەڭگەرۋگە مۇمكىندىك بەرىپ, پىكىر الماسۋدىڭ جانە ءتيىمدى شەشىمدەر ىزدەۋدىڭ الاڭىنا اينالدى. سونىڭ ناتيجەسىندە مۇنداي كەزدەسۋلەردىڭ ساپاسى ەداۋىر ارتتى.
وبلىستىق اكىمدىكتە ءوڭىردىڭ توعىز اۋدانىنىڭ اۋىلدىق وكرۋگ اكىمدەرى باس قوستى. ولار – وكرۋگتەردىڭ دامۋىنا جاۋاپتى, تىكەلەي داۋىس بەرۋ ارقىلى سايلانعان باسشىلار.
الماتى وبلىسىنىڭ اكىمى مارات سۇلتانعازيەۆ: «اۋىل – ءوڭىر ەكونوميكاسىنىڭ نەگىزى. ماسەلەنى وبلىسقا جەتكىزبەي, جەرگىلىكتى جەردە شەشۋ ماڭىزدى. ەگەر ۇسىنىس اۋىل تۇرعىندارىنىڭ جاعدايىن جاقسارتۋعا باعىتتالعان بولسا, ءبىز ونى قولداۋعا دايىنبىز», – دەگەندى اتاپ ءوتتى.
كەزدەسۋدە جەرگىلىكتى ءوزىن-ءوزى باسقارۋ تەتىكتەرىن كۇشەيتۋ قاجەتتىلىگى ايتىلدى. ونىڭ ىشىندە اكىمدەردىڭ سايلاۋالدى باعدارلامالارىن ورىنداۋ بويىنشا حالىق الدىندا تۇراقتى ەسەپ بەرۋ پراكتيكاسىن زاڭمەن بەكىتۋ ۇسىنىلدى. بيۋدجەت ماسەلەلەرى دە كەڭىنەن تالقىلاندى. اۋىل اكىمدەرىنە كولىك يەلەرى تۋرالى اقپاراتقا قول جەتكىزۋ, جىلجىمايتىن م ۇلىكتى نارىقتىق قۇن بويىنشا باعالاۋ جانە جەكە تابىس سالىعىن جۇمىس ورنى بويىنشا تولەۋ قاعيداتىن ەنگىزۋ جونىندە ۇسىنىستار جاسالدى. بۇل اۋىل بيۋدجەتتەرىنىڭ كىرىس بولىگىن نىعايتۋعا مۇمكىندىك بەرەدى.
اۋىل شارۋاشىلىعى ونىمدەرىن وڭدەۋ ينفراقۇرىلىمىنىڭ دامۋى — بيزنەس ءوسىمىنىڭ ماڭىزدى شارتى. اكىمدەر شاعىن تسەحتار, سويۋ پۋنكتتەرى مەن قويمالاردى وڭىرلىك ستاندارتتاردىڭ مىندەتتى ەلەمەنتى رەتىندە ەنگىزۋدى دە قاپەرگە الدى.
«اۋىل اماناتى» جوباسىن ىسكە اسىرۋ كەزىندە كەپىل ماسەلەسىنىڭ وزەكتى بولىپ وتىرعانى ايتىلدى. قاتىسۋشىلار «دامۋ» قورى ارقىلى كەپىلدىك بەرۋ جانە تاۋارلىق نەسيە جۇيەسىن ەنگىزۋ باستامالارىن قولدادى. سونداي-اق اۋىلدار مەن كووپەراتيۆتەردىڭ ماماندانۋىن ناقتى ەسەپكە الۋ قاجەتتىلىگى كوتەرىلدى.
اكىمدىك اپپاراتتارى قىزمەتكەرلەرىنىڭ ەڭبەكاقىسىن ارتتىرۋ جانە جاڭا KPI ازىرلەۋ ماسەلەلەرى تالقىلاندى. باسەكەگە قابىلەتتى جالاقى مەن ناقتى كورسەتكىشتەردىڭ بولماۋى كادرلاردى تارتۋدى قيىنداتاتىنى اتاپ ءوتىلدى. وسىعان بايلانىستى وكرۋگتەردىڭ جەكە دامۋ باعدارلامالارىن جاساپ, اكىمدىكتەردىڭ ناقتى مۇمكىندىكتەرىنە ساي KPI بەلگىلەۋ ۇسىنىلدى.
پىكىرتالاس بارىسىندا جايىلىم تاپشىلىعى, جەر ۋچاسكەلەرىنە قاتىستى اقپاراتتىڭ قولجەتىمسىزدىگى, اۋىلدىق اپپاراتتاردا مامانداردىڭ جەتىسپەۋشىلىگى سياقتى ماسەلەلەر كوتەرىلدى. جەر جانە ۆەتەريناريا ماماندارىنىڭ شتاتتىق بىرلىكتەرىن ەنگىزۋ, سونداي-اق قاتتى تۇرمىستىق قالدىقتار پوليگوندارىنا ارنالعان ۇلگىلىك جوبالاردى ازىرلەۋ ۇسىنىلدى.
تسيفرلاندىرۋ سالاسىنداعى كەدەرگىلەر دە ايتىلدى. مەملەكەتتىك دەرەكتەر بازالارىنا قول جەتكىزۋدىڭ شەكتەۋلىلىگى الەۋمەتتىك-ەكونوميكالىق مونيتورينگ جۇرگىزۋدى قيىنداتادى جانە شالعاي اۋىلداردا جەدەل جاردەم شاقىرۋى مەن كەزبەلىك جانۋارلاردى ۇستاۋ جۇمىستارىنىڭ ۇيلەسىمدىلىگىنە اسەر ەتەدى.
بارلىق ۇسىنىستار جۇيەلەنىپ, ءتيىستى مەملەكەتتىك ورگاندارعا جولداناتىن بولادى. الداعى ۋاقىتتا اۋىل اكىمدەرى مەملەكەت باسشىسىنىڭ قاتىسۋىمەن وتەتىن رەسپۋبليكالىق ديالوگ الاڭىندا ءوز باستامالارىن تانىستىرادى.
«بۇگىندە اۋىل باسشىلارى كەزدەسۋلەرگە شاعىممەن ەمەس, يدەيامەن كەلەدى. بۇل – ولاردىڭ كاسىبي ءوسۋىنىڭ جانە ناتيجەگە باعىتتالعان جۇمىستىڭ كورسەتكىشى. ءبىزدىڭ مىندەت – وسى قارقىنعا قولداۋ كورسەتىپ, ءتيىمدى جۇمىس ىستەۋگە قاجەتتى قۇرالدارمەن قامتاماسىز ەتۋ», – دەدى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتى وبلىسى بويىنشا فيليالىنىڭ ديرەكتورى قازىبەك داۋتاليەۆ.
الماتى وبلىسى.