اباي وبلىسىندا دروندار ورىستە باعۋسىز جايىلعان مالعا بايلانىستى جول-كولىك وقيعالارىن ازايتۋعا كومەكتەسىپ جاتىر.
بۇگىندە دالالى جەرلەردە جول قاۋىپسىزدىگىن تۋدىراتىن نەگىزگى ماسەلەلەردىڭ ءبىرى – مالدىڭ كولىك جولدارىنا جاقىن ماڭدا جايىلىپ, ءارى-بەرى وتۋىندە بولىپ وتىر. اسىرەسە, ءتۇن ۋاقىتىندا ءوز اياعىمەن جايىلاتىن ورىستەگى ءىرى-قارا ءجيى جول-كولىك شىرعالاڭىنا سەبەپ بولىپ, جۇرگىزۋشىلەر مەن جولاۋشىلاردىڭ ومىرىنە قاۋىپ توندىرەدى.
اباي وبلىسىندا بۇل ماسەلەنى شەشۋ ءۇشىن زاماناۋي تەحنولوگيالار ەنگىزىلە باستادى. اۋدان اكىمدىكتەرىنىڭ قولداۋىمەن جەرگىلىكتى پوليتسيا بولىمشەلەرى پاترۋلدىك قىزمەتى بىرلەسىپ, اۋماقتى تۇراقتى باقىلاۋعا جانە اۆتوجول ماڭىندا ەركىن جايىلىپ جۇرگەن مالدى جەدەل انىقتاۋعا مۇمكىندىك بەرەتىن دروندارمەن جابدىقتالدى. جوعارى ساپالى كامەراسى بار پيلوتسىز العىر اپپاراتتار مالدىڭ جۇرگەن جەرىن انىقتاپ, ناقتى ۋاقىت رەجىمىندە كورسەتىپ, تەز ارەكەت ەتۋگە جاعداي جاسايدى.
ماسەلەن, جاڭاسەمەي اۋدانىندا جۇرگىزىلگەن باقىلاۋ جۇمىستارى بارىسىندا 59 باس جىلقى انىقتالىپ, جول جيەگىنەن الىستاتىلعان. مامانداردىڭ ايتۋىنشا, قاراۋسىز جۇرگەن مال سەمەي – وسكەمەن جانە ومبى – مايقاپشاعاي باعىتتارىنداعى قوزعالىسى كوپ جولداردا ءجيى كەزدەسكەن. درونداردى قولدانۋ بۇل قاۋىپ-قاتەردى ايتارلىقتاي تومەندەتىپ, وڭىردەگى جول قاۋىپسىزدىگى دەڭگەيىن جاقسارتۋعا مۇمكىندىك بەرمەك.
ستاتيستيكا دا بۇل جۇمىستىڭ تيىمدىلىگىن راستاپ وتىر. ماسەلەن, جىل باسىنان بەرى پوليتسيا قىزمەتكەرلەرى مالدىڭ قاراۋسىز جايىلۋىنا قاتىستى 2 284 قۇقىق بۇزۋشىلىقتى انىقتاعان. ارنايى ايىپتۇراقتارعا 9 729 باس مال جەتكىزىلىپ, ولاردىڭ يەلەرى اكىمشىلىك قۇقىق بۇزۋشىلىق تۋرالى كودەكستىڭ 408-بابى بويىنشا جاۋاپكەرشىلىككە تارتىلعان.
ارينە, بۇل دا وڭاي شارۋا ەمەس. اياقتى ماق ۇلىق قاۋىپ-قاتەر دەگەندى قايدان ۇقسىن, وت قۋالاپ جايىلا بەرەدى. ول ءۇشىن مال يەسىنىڭ ايىپپۇل ارقالاۋى دا داۋ تۋدىرماي تۇرمايتىن جايت. وسى رەتتە جاڭا تەحنولوگيانىڭ مۇمكىندىكتەرىن ءتيىمدى پايداعا اسىرۋ – قاي تاراپقا دا قۇبا-قۇپ ءىس بولىپ وتىر.
«سونىمەن قاتار اۋىل شارۋاشىلىعى جانۋارلارىن سايكەستەندىرۋ تالاپتارىنىڭ بۇزىلۋىنا قاتىستى 201 دەرەك تىركەلىپ, ماتەريالدار ۆەتەريناريالىق ينسپەكتسياعا جولداندى. زاماناۋي تەحنولوگيالاردى پروفيلاكتيكالىق ءىس-قيمىلدارمەن ۇشتاستىرۋ پوليتسياعا وقىس وقيعالاردىڭ الدىن الۋعا عانا ەمەس, مال يەلەرىنىڭ جاۋاپكەرشىلىك مادەنيەتىن ارتتىرۋعا دا مۇمكىندىك بەرەدى. وسىنداي كەشەندى ءتاسىل اباي وبلىسىنىڭ جولدارىن ءۇشىن اناعۇرلىم قاۋىپسىز ەتۋگە ءوز ۇلەسىن قوسىپ جاتىر», دەيدى وبلىستىق پوليتسيا دەپارتامەنتىنىڭ ءباسپاسوز قىزمەتى.
اباي وبلىسى