مادەنيەت جانە اقپارات ءمينيسترى ايدا بالاەۆا حالىقارالىق ارەناداعى ماڭىزدى مادەني جوبالاردىڭ تابىستى جۇزەگە اسۋى مەتسەناتتار مەن سەرىكتەستەردىڭ قولداۋىنا تىكەلەي بايلانىستى ەكەنىن اتاپ ءوتتى, دەپ جازادى Egemen.kz.
ءمينيستردىڭ ايتۋىنشا, جۋىردا تاشكەنتتە وتكەن «حان سۇلتان. التىن وردا» وپەراسىنىڭ پرەمەراسى ۇلكەن جەتىستىككە جەتتى. بۇعان شىعارماشىلىق سالانى قولداۋعا ۇلەس قوسقان Halyk قايىرىمدىلىق قورى, Samruk-Kazyna Trust, «قازاقستان حالىق بانكى» اق جانە Freedom Holding Corp كومپانياسىنىڭ ەڭبەگى زور.
ساپار بارىسىندا ايدا بالاەۆا ارمەنياداعى قازاقستاننىڭ مادەنيەت كۇندەرى اياسىندا ەرەۆانداعى راديو ۇيىنە بارىپ, قازاق كومپوزيتورلارىنىڭ سيرەك ارحيۆتىك جازبالارىمەن تانىستى. ارميان تارابى ۇسىنعان تاريحي اۋديوماتەريالدار نەگىزىندە مينيسترلىك Halyk قورىنىڭ قولداۋىمەن ەرەكشە جوبانى ىسكە اسىرعان. قازاق وپەرا جانە ەسترادا ونەرىنىڭ شەبەرلەرى ەرمەك سەركەباەۆ, الىبەك دىنىشەۆ, روزا رىمباەۆا جانە باسقا دا مايتالمانداردىڭ ورىنداۋىنداعى تۋىندىلار جيناقتالعان ارنايى ۆينيل سەرياسى جارىققا شىقتى.
«اتالعان سەريا – ۇلتتىق مادەني مۇرامىزدى ساقتاۋ ىسىنە قوسىلعان ماڭىزدى ۇلەس ءارى قازاق مۋزىكا ونەرىنىڭ اسىل قازىناسىن كەلەر ۇرپاققا جەتكىزۋگە باعىتتالعان ەرەكشە جوبالاردىڭ ءبىرى», دەدى مينيستر Facebook الەۋمەتتىك پاراقشاسىندا.
ايدا بالاەۆا ۇلتتىق ونەردى ساقتاۋ ءارى حالىقارالىق دەڭگەيدە تانىتۋ ىسىنە اتسالىسىپ جۇرگەن بارلىق سەرىكتەستەرگە العىس ءبىلدىرىپ, وسىنداي جوبالاردىڭ جاس ۇرپاققا رۋحاني مۇرا قالدىرۋداعى ماڭىزىن جەتكىزدى.