بۇگىن جۋرناليستەر الماتى قالالىق پەريناتولوگيا جانە بالالار كارديوحيرۋرگياسى ورتالىعىندا بارىپ ساپارى كەزىندە 3 ايدان 3 جاسقا دەيىنگى ەرەكشە كۇتىمدى قاجەت ەتەتىن بالالار زاماناۋي حالىقارالىق ادىستەمە ارقىلى ەرتە وڭالتۋدان وتە باستاعانىنا كۋا بولدى, دەپ جازادى Egemen.kz.
مەديتسيناداعى جاڭا باعىتتىڭ ىسكە قوسىلۋى جىل سايىن تاعى دا 600-دەي بالاعا ەرتە باستان ەمدەۋگە جول اشىپ وتىر.
وڭىرلىك كوممۋنيكاتسيالار قىزمەتى مەن الەۋمەتتىك مەديتسينالىق ساقتاندىرۋ قورىنىڭ قالالىق بولىمشەسى ۇيىمداستىرعان ءباسپاسوز تۋرىندا جۋرناليستەرگە جاڭا ورتالىقتىڭ جۇمىسىن, ماماندار قولداناتىن ادىستەر مەن كومەكتى كەڭەيتۋگە مۇمكىندىك بەرەتىن وزگەرىستەر جاعىن تانىستىردى.
وڭىردە بالاماسى جوق, قالاداعى العاشقى «قامقورلىق» ەرتە وڭالتۋ ورتالىعى پەريناتولوگيا جانە بالالار كارديوحيرۋرگياسى ورتالىعىنىڭ بازاسىندا 2025 جىلدىڭ تامىزىندا اشىلعان بولاتىن. از ۋاقىتتا مۇندا 57 بالا قولداۋ الدى. وڭالتۋ جاعى تولىق ءمامس ەسەبىنەن جۇرگىزىلەدى, جەڭىلدىك ساناتىنداعى بالالار مەديتسينالىق كومەكتىڭ بارلىق ءتۇرىن تەگىن الادى.
ەرتە ارالاسۋ ورتالىعىنىڭ مەڭگەرۋشىسى شامشىگۇل قۇداجانوۆانىڭ ايتۋىنشا, ورتالىق دتسپ, داۋن سيندرومى, ءتىلى مەن پسيحوموتورلىق دامۋدىڭ كەشەۋىلدەۋى, ورتالىق جۇيكە جۇيەسىنىڭ پەريناتالدى زاقىمى مەن تىرەك-قيمىل جۇيەسىنىڭ تۋا بىتكەن اقاۋى بار بالالارعا باعىتتالعان.
اتا-انالار «قامقورلىق» ورتالىعىنا جولدامانى وزدەرى تىركەلگەن ەمحانادان الادى. ءبىز بالا مەن اتا-اناسىن العاشقى قادامىنان باستاپ قولداۋعا تىرىسامىز, ەرتە ارالاسقاندا دامۋىن دا تۇبەگەيلى وزگەرتۋگە بولادى», دەيدى مامان.
وسى ورتالىق مەديتسينالىق قانا ەمەس, الەۋمەتتىك, ءبىلىم بەرۋ جاعىنان قولداۋعا دا ەرەكشە نازار اۋدارعان.
«مۇندا ءبىز بالانىڭ دامۋىنا, قابىلەتىن اشىپ, اينالاسىمەن قارىم-قاتىناس جاساپ ۇيرەنۋىنە مۇمكىندىك بەرەتىن كەڭىستىك قۇرامىز. ابيليتاتسيا, دامىتۋ وقىتۋ, كوگنيتيۆتى, موتورلىق جانە كوممۋنيكاتيۆتىك داعدىلاردى جەتىلدىرۋ ارقىلى ءبىز بالالاردىڭ ۇيلەسىممەن ءوسىپ-جەتىلۋىنە جاعداي جاساپ جاتىرمىز», دەيدى بالالاردىڭ مەديتسينالىق پسيحولوگى انەل ءجۇنىسوۆا.
مۇندا شۋنگيت پەن تۇزدى بولمە, سەنسورلىق بولمە, سونداي-اق يممەرسيالىق ۆاننا دا بار. ءار بالاعا جەكە باعدارلامانى مۋلتيديستسيپلينارلىق كوماندا – نەۆرولوگ, رەابيليتولوگ, كلينيكالىق پسيحولوگ, نەوناتولوگ, فيزيوتەراپەۆت, لفك دارىگەرى, لوگوپەد جانە دەفەكتولوگتار ازىرلەپ بەرەدى.
مامانداردىڭ ايتۋىنشا, اسەرى العاشقى اپتادان-اق بايقالىپ, بالالار وتىرا باستايدى, العاشقى قادامىن جاساپ, سويلەيدى, ەپتىلىگى مەن اينالاسىمەن ءتىل تابىسۋ داعدىلارىندا ايتارلىقتاي ىلگەرىلەۋ بايقالادى.
ءباسپاسوز تۋرىندا جۋرناليستەر ورتالىقتا جاتقان بالالاردىڭ اتا-انالارىمەن تىلدەستى. ناۋقاستىڭ اجەسى ولگا يگيشەۆا: ء«بىز ورتالىققا ءبىر اپتادان بەرى بارىپ ءجۇرمىز, وزگەرىس بار. بالا بەلسەندى, جيناقى بولا باستادى, بۇرىن ايتپاعان دىبىستاردى ايتاتىن بولدى. جايلى جاعداي جاسالعان, ماماندارى دا مىقتى», دەيدى.
وسىعان ۇقساس وڭدى وزگەرىستى سىزدىقباەۆتار وتباسى دا بايقايتىنىن ايتادى.
«ەكى اپتادا قىزىمىز دىبىس شىعارىپ, بۇلشىقەتتەرى بەكىپ, ەركىن ءجۇرىپ, سەكىرە باستادى. بىزدە داۋن سيندرومى بولعاندىقتان, بۇرىن ول تايعاناقتاپ, قۇلاپ قالا بەرەتىن. مۇندا ماسساج الادى, لوگوپەدپەن, پسيحولوگپەن جۇمىس ىستەيدى. وتە ريزامىز ورتالىقتاعىلارعا», دەدى اكەسى دىنمۇحاممەد سىزدىقباەۆ.
ايتا كەتەيىك, 2019 جىلى ءمامس ەنگىزىلگەنگە دەيىن الماتىدا بالالارعا ءتورت ورتالىقتا عانا رەابيليتاتسيالىق كومەك كورسەتىلەتىن, جىلىنا 481,8 ملن تەڭگەدەي قارجى ءبولىندى بۇعان. قازىر جاعداي تۇبەگەيلى وزگەردى: 2025 جىلدىڭ 9 ايىندا وڭىردە 400 مىڭنان استام رەابيليتاتسيالىق ءىس-شارا جۇرگىزىلىپ, قارجىلاندىرۋ كولەمى قازىر 2025 جىلعا 4 ملرد تەڭگەدەن اسىپ ءتۇستى.
«بالالار رەابيليتاتسياسى بۇرىن تەگىن مەديتسينالىق كومەكتەر پاكەتىنە كىرەتىن, بىراق قارجىلاندىرۋ شەكتەۋلى بولعاندىقتان قاجەتتى قارقىنمەن دامي المادى. ءمامس ەنگىزىلگەلى بەرى قىزمەت كولەمى مەن ساپاسى ايتارلىقتاي ارتىپ, جاڭا تەحنولوگيالار ەنگىزىلدى. بالالار بارلىق كومەكتى بۇرىنعىداي تەگىن الادى, جارنانى مەملەكەت تولەيدى», دەدى قور وكىلى شىنار ءالجانوۆا.
الماتىدا قازىر 18 جاسقا دەيىنگى بالالارعا قىزمەت كورسەتەتىن وسىنداي 53 مەديتسينالىق ۇيىم جۇمىس ىستەيدى. كىشكەنتاي پاتسيەنتتەردىڭ ساۋىعىپ, جاڭا, دەنى ساۋ ومىرگە قادام باساتىن مۇمكىندىگى دە جىل سايىن ارتىپ كەلەدى.