«جولاۋشىلار تاسىمالى» اق ءباسپاسوز قىزمەتىنىڭ مالىمدەۋىنشە, №119/120 «الماتى - قوستاناي» باعىتىنداعى جاڭا «تالگو» پويىزى 16 جەلتوقساندا جولعا شىعادى, جاڭا پويىز جۇپ كۇندەرى قاتىناپ وتىرادى, دەپ جازادى Egemen.kz.
پويىزدا مۇمكىندىگى شەكتەۋلى جاندار ءۇشىن ارنايى بەيىمدەلگەن ورىندار بولىنگەن, بيلەت قۇنىنا 50 %-عا دەيىن جەڭىلدىك قاراستىرىلعان.
600-دەن استام جولاۋشىنى تاسىمالداي الاتىن پويىز قوستاناي, توبىل, اتباسار, استانا, قاراعاندى, الماتى سياقتى ءىرى قالالار ارقىلى وتەدى.
پويىز تولىقتاي زاماناۋي «تالگو» ۆاگوندارىنان جاساقتالعاندىقتان, بۇل باعىتتاعى وزگە پويىزدارمەن سالىستىرعاندا, جول ۇزاقتىعى 12 ساعاتقا قىسقارادى.
«بۇل شەشىم ەلدىڭ وڭتۇستىك پەن سولتۇستىك وڭىرلەر اراسىنداعى كولىك قولجەتىمدىلىگىن كۇشەيتىپ, قىسقى ماۋسىمدا جولاۋشىلار ءۇشىن جول ءجۇرۋدى ەداۋىر قولايلى ەتەدى», دەلىنگەن حابارلامادا.