كيبەرقىلمىس پەن ينتەرنەتتەگى الاياقتىقپەن كۇرەسۋ ءۇشىن جاڭا تسيفرلىق شەشىم كەڭىنەن قولدانىلىپ جاتىر. كۇدىكتى ترانزاكتسيالاردى اۆتوماتتى تۇردە انىقتايتىن الگوريتمدەر جاساندى ينتەللەكت كومەگىمەن قولدانىلادى. سونىمەن قاتار ۇلتتىق بانك پەن ىشكى ىستەر مينيسترلىگىنە ورتاق «انتيفرود-ورتالىق» جۇيەسى الاياقتىق ترانزاكتسيالارىن دەر كەزىندە بۇعاتتاۋعا مۇمكىندىك بەرىپ وتىر. وسى باعىتتا «KazDream», «Seven Hills of Kazakhstan» مەكەمەلەرى جاساعان باعدارلامالاردىڭ دا كومەگى كوپ.
دەگەنمەن ينتەرنەتتى پايدالاناتىن الاياقتار دا ايلاسىن اسىرىپ, ازاماتتاردان اقشا جىمقىرۋدىڭ جاڭا تاسىلدەرىن ويلاپ تاۋىپ وتىر. پوليتسەيلەر وسىدان دا ۇيالى تەلەفون ۇستاعان كەز كەلگەن ادام الاياقتاردىڭ ارباۋىنا ءتۇسۋى مۇمكىن ەكەنىن ايتادى. عالامتور جەلىسىنە جۇرگىزىلگەن مونيتورينگ ناتيجەسىندە زاڭعا قايشى بەلگىلەرى بار 5,5 مىڭنان اسا سايت پەن سىلتەمە انىقتالىپ, بۇعاتتاۋ ءۇشىن «كيبەرقاداعالاۋ» جۇيەسىنە ەنگىزىلدى. قۇزىرلى ورگاندار حالىق اراسىندا ساقتىق شارالارىن ۇنەمى ەسكەرتىپ, ناتيجەلەرىن الەۋمەتتىك جەلىلەردە كەڭىنەن جاريالاپ تا كەلەدى. سوعان قاراماستان, جيعان قارجىسىن الاياقتارعا ۇستاتىپ, امالى قۇرىپ وتىرعاندار از ەمەس.
بيىلعى 9 ايدا وبلىس كولەمىندە ينتەرنەتتەگى الاياقتىق قىلمىستىڭ 454 دەرەگى تىركەلىپ, وتكەن جىلدىڭ وسى كەزەڭىمەن سالىستىرعاندا 128%-عا ءوسىپتى. بايقوڭىر قالاسىندا جۇرگىزىلگەن جەدەل-ىزدەستىرۋ ءىس-شارالارى ناتيجەسىندە 24 جاستاعى تۇرعىننان ۇيالى بايلانىس جۇيەلەرىن زاڭسىز پايدالانۋ ارقىلى ابونەنتتىك نومىرلەرمەن ءبىر مەزەتتە جاپپاي قوڭىراۋ شالۋعا ارنالعان 32 سلوتتى «Sim-بوكس» قۇرىلعىسى تابىلدى. ونىڭ باسپاناسىن ءتىنتۋ بارىسىندا «Sim-بوكس» قۇرىلعىسىنان بولەك, 2 نوۋتبۋك, مودەم جانە بانكتىك تولەم كارتالارى انىقتالىپ, ايعاق زات رەتىندە تاركىلەنگەن.
الماتى مەن تۇركىستان قالالارىندا جۇرگىزىلگەن وپەراتسيالار ناتيجەسىندە كوپتەن بەرى ازاماتتاردىڭ قاراجاتىن الاياقتىق جولمەن جىمقىرىپ, تابىس كوزىنە اينالدىرىپ كەلگەن قىلمىستىق توپتىڭ جولى كەسىلدى. ولار «Instagram» جەلىسىندە «نەسيە الۋعا كومەكتەسەمىز!» دەگەن جالعان جارناما جاريالاپ, قىزىعۋشىلىق تانىتقان ازاماتتاردى الداپ, اتتارىنا نەسيەلەر راسىمدەتىپ, قاراجاتتارىن بۋكمەكەرلىك كەڭسەلەرى ارقىلى زاڭسىز يەمدەنىپ وتىرعان. تەرگەپ-تەكسەرۋ بارىسىندا وسى قىلمىستى ۇيىمداستىرۋشى 24 جاستاعى تۇركىستان قالاسىنىڭ تۇرعىنى الماتى قالاسىنان ۇستالدى. كۇدىكتىدەن قىلمىستىق ماقساتتا قولدانىلعان 3 ۇيالى تەلەفون, 14 SIM كارتا, بانكتىك تولەم كارتالارى جانە 2 پاكەتكە سالىنعان ەسىرتكى زاتىنا ۇقساس اق ءتۇستى ۇنتاق ايعاق زات رەتىندە تاركىلەندى. قىلمىستىق سحەمانىڭ قالعان 4 قاتىسۋشىسىنا قاتىستى تەرگەپ-تەكسەرۋ ارەكەتى جۇرگىزىلىپ جاتىر. بۇعان دەيىن 131 ەپيزودتى ينتەرنەتتەگى الاياقتىق قىلمىسىن جاساعان استانا قالاسىنىڭ 30 جاستاعى تۇرعىنى قۇرىقتالىپ, وعان قاتىستى قىلمىستىق ىستەردىڭ بارلىعى سوتقا جولدانعان ەدى.
«كيبەرقاداعالاۋ» اقپاراتتىق جۇيەسىنىڭ الەۋمەتتىك جەلىدە جۇرگىزگەن مونيتورينگى ارقاسىندا الاياقتىقتان بولەك سينتەتيكالىق ەسىرتكىنى جارنامالاپ كەلگەن 1 120 سايتتىڭ جۇمىسى توقتاتىلىپتى. جالپى, ەسىرتكى قىلمىسىن بولدىرماۋ باعىتىندا جىل باسىنان بەرى 237 قۇقىق بۇزۋشىلىق انىقتالىپ, زاڭسىز اينالىمنان 1 توننا 570 كيلوگرامم ەسىرتكى زاتتارى تاركىلەنگەن.
قىزىلوردا