ەلىمىزدە كەپىلسىز تۇتىنۋشىلىق نەسيە الۋ قيىندايدى. قارجى نارىعىن رەتتەۋ جانە دامىتۋ اگەنتتىگى بەكىتكەن بۇل قاۋلى 24 قاراشادان باستاپ كۇشىنە ەنەدى, دەپ جازادى Egemen.kz.
مۇندا بانك نەسيەسىن 30 كۇننەن, ال ميكرونەسيەنى 1 كۇننەن اسا ۋاقىتقا كەشىكتىرسە جاڭا نەسيە الۋ قيىندايتىنى جازىلعان. قارجى ساراپشىسى مەرۋەرت قۋانىشبەكقىزى جاڭا ەرەجەنىڭ قوعامعا قالاي ىقپال ەتەتىنىن ايتىپ بەردى.
ساراپشىنىڭ ايتۋىنشا, بۇرىن بيزنەسكە, كولىككە, ۇيگە ارنالعان رەسمي نەسيە مەن تۇتىنۋشىلىق نەسيە مۇلدەم بولەك بولدى. بانكتەردىڭ جەكە تۇلعالارعا ارنالعان سكورينگ جۇيەسىندە تۇتىنۋشىلىق نەسيە كورىنبەيتىن.
– ياعني ادامنىڭ جالاقىسى 500 مىڭ تەڭگە بولسا, رەسمي نەسيەسى 150 مىڭ تەڭگە دەپ كورسەتىلەدى دە, 250 مىڭ تەڭگە تۇتىنۋشىلىق نەسيەسى كورىنبەيتىن ەدى. سوندا 400 مىڭ تەڭگەسى نەسيەگە كەتىپ, وزىنە از قاراجات قالاتىن. سول سەبەپتى قازىر ەكى نەسيە ءتۇرىن قوسىپ, ءبىر جۇيەگە ەنگىزۋى وتە دۇرىس, – دەدى م. قۋانىشبەكقىزى Jibek Joly تەلەارناسىنداعى «بۇگىن. Live» باعدارلاماسىندا.
قوعام ءۇشىن بۇل شەشىم پايدالى بولعانىمەن, ساتۋمەن اينالىساتىن كاسىپكەرلەر ءۇشىن ءتيىمسىز, سەبەبى ولاردىڭ تاۋارلارى ساتىلماي قالۋى مۇمكىن.
– قازىر تاۋارلاردىڭ كوپشىلىگى ءبولىپ تولەۋ ادىسىمەن الىناتىنى جاسىرىن ەمەس. ءبولىپ تولەۋ دەپ اتالعانىمەن, بۇل دا نەسيەنىڭ ءبىر ءتۇرى. ونداعى جاسىرىن پايىزىن بانككە كاسىپكەردىڭ ءوزى تولەيدى نەمەسە كاسىپكەر سول شىعىندى تاۋاردىڭ قۇنىنا قوسىپ قويادى, – دەيدى باعدارلاما قوناعى.
ماماننىڭ پىكىرىنشە, قازاقستاندا نەسيەسىز ءومىر سۇرۋگە بولادى. ول ءۇشىن قارجىلىق جوسپار قۇرىپ, ءيمپۋلسيۆتى ساۋدا جاساماي, ماركەتينگ قۇربانى بولماي, قوسىمشا تابىس كوزىن كوبەيتۋگە تىرىسۋ كەرەك.
– شەتەلدە كەرىسىنشە, تۇتىنۋشىلىق نەسيە از. بيزنەس ءۇشىن الىنعان نەسيەلەر كوپ. قازىر نەسيەسىن تولەي الماي جۇرگەن ازاماتتاردىڭ 90 پايىزى – كەپىلسىز نەسيە العاندار. بۇل جەردە سىن-قاتەر دەڭگەيىن بولجاي الماعان, كليەنتتىڭ تولەم قابىلەتىن, جالاقىسىن تەكسەرمەگەن بانكتەر دە كىنالى. سويتە تۇرا, بورىشكەردىڭ مۇلكىن الىپ قويىپ, ەسەپشوتتارىن بۇعاتتايدى, كاسىبىن دوڭگەلەتىپ اكەتۋگە مۇمكىندىك بەرمەيدى. سوندىقتان كەپىلسىز نەسيەنى ازايتىپ, شەكتەۋلەر ەنگىزۋ قوعامداعى قارىز جۇكتەمەسىن ازايتادى, – دەدى م. قۋانىشبەكقىزى.