كەشە قوسشى قالاسىندا 23 جاستاعى جەدەل جاردەم فەلدشەرى ۇلدانا مىرزۋانمەن قوشتاسۋ ءراسىمى ءوتتى. ءوز ىسىنە ادالدىق پەن ادام ءومىرىن اراشالاۋ جولىندا قازا تاپقان جاس مامان تۋرالى ەستەلىكتەر ەل جۇرەگىن ەلجىرەتتى, دەپ حابارلايدى Egemen.kz.
قارالى جيىن مارقۇمنىڭ قوسشىداعى ءۇيىنىڭ اۋلاسىندا ءوتتى. تۋىستارى, ارىپتەستەرى, كورشىلەرى مەن دوستارى جينالىپ, ادامدارعا كومەكتەمەي قويمايتىن, ءار كەز مەيىرىمىن ايامايتىن سابىرلى ءارى جاناشىر جاندى سوڭعى ساپارعا اقتىق قۇرمەتپەن شىعارىپ سالدى. قارالى شەرۋ الدىندا ونىڭ پورترەتىن قىزمەتتىك فورماداعى ارىپتەستەرى كوتەرىپ جۇرسە, ارتىنان ازالى مارش ويناعان وركەستر ەردى.
استانا قالالىق دەنساۋلىق ساقتاۋ باسقارماسىنىڭ مالىمەتىنشە, ۇلدانانىڭ قىسقا عۇمىرى جاقسىلىق پەن ادامدارعا دەگەن جاناشىرلىققا تولى بولدى. 2002 جىلى وڭتۇستىك قازاقستاندا تۋعان ول مەديتسينا جولىن ەرتە تاڭداعان. 2021 جىلى «دانالىق» مەديتسينالىق كوللەدجىن ۇزدىك اياقتاپ, الدىمەن №5 قالالىق ەمحانادا پەدياتريا بولىمىندە جۇمىس ىستەگەن. كەيىن جەدەل جاردەم قىزمەتىنە اۋىسقان.
2025 جىلدىڭ 30 قىركۇيەگىندە ۇلدانا رەابيليتولوگ-دارىگەر ادىلەت زەينەلگە تۇرمىسقا شىققان. جارىنىڭ جۇرەكتى تەبىرەنتكەن قوشتاسۋ سوزدەرى الەۋمەتتىك جەلىدە كوپشىلىكتىڭ جانىن تەربەتتى.
«شاڭىراعىما ءسان, تىرشىلىگىمە ءمان بولدىڭ... ماڭدايىما سىيمادىڭ با, پەرىشتەم, سەن مەنىڭ ماڭگى جۇرەگىمدەسىڭ. ەشقانداي مەدال دا, ەشقانداي ءسوز دە مەنىڭ جۇرەگىمنىڭ يەسىن ماعان قايتارا المايدى. ۇيىمە نۇر, قۇت جانە بەرەكە اكەلگەن, اللا قوسقان ادال جارىمنىڭ تىلەۋىن تىلەگەن بۇكىل قازاق ەلىنە العىسىم شەكسىز. وسى ۋاقىتقا دەيىن اللادان جۇرەگىمدى امان الىپ قالۋىن سۇراپ, قاسىندا بولىپ, دۇعا ەتتىم. سابىر ساقتاپ, ءبارىن سابىرعا سالدىم. ەندىگى تىلەگىم سوتتىڭ ءادىل ءوتۋى, تەرگەۋدىڭ تازا جۇرگىزىلۋى. قۇداي قوسقان قوساعىمنىڭ جانى تىنىش بولۋى ءۇشىن بۇل ءىستى سوڭىنا دەيىن جەتكىزۋىم كەرەك. جاۋاپتىلار جازاسىن الۋى ءتيىس!», دەدى ول.
ەستەرىڭىزگە سالا كەتەيىك, 8 قاراشا كۇنى استانادا تاۋەلسىزدىك داڭعىلى 24ب مەكەنجايىنداعى توعىز قاباتتى ءۇيدىڭ قاسبەتىنىڭ كىرپىشتەرى قۇلاپ, بىرنەشە ادام جارالانعان. ۇلدانا ءبىرىنشى بولىپ جارالانعان بالا مەن ونىڭ تۋىستارىنا جۇگىرگەن ساتتە ۇستىنە قۇلاعان كىرپىش پەن كونديتسيونەر بەكىتپەسى جاس ماماندى باسىپ قالدى.
بارلىعى بەس ادام زارداپ شەكتى. اۋىر جاراقات العان فەلدشەر 18 قاراشادا اۋرۋحانادا كوز جۇمدى. وقيعا بويىنشا تەرگەۋ جۇمىستارى باستالدى.
سول كۇنى, 18 قاراشادا, قاسىم-جومارت توقاەۆ ۇلدانا مىرزۋاندى ەرلىگى مەن ءوز ىسىنە ادالدىعى ءۇشىن «ەرلىگى ءۇشىن» مەدالىمەن ناگرادتادى. استانا اكىمدىگى ونىڭ وتباسىنا جان-جاقتى كومەك كورسەتىلەتىنىن, ماتەريالدىق قولداۋ مەن بارلىق ءراسىم شىعىندارى وتەلەتىنىن مالىمدەدى.