قىزىلوردادا وتكەن «Inno Fest Qyzylorda − 2025» يننوۆاتسيالىق IT جوبالار سايىسى تاعى ءبىر اۋىل بالاسىنىڭ تالابىن تانىتتى. سىرداريا اۋدانى شاعان اۋىلىنداعى №37 مەكتەپ-ليتسەيىنىڭ 7-سىنىپ وقۋشىسى نۇريسلام ايبەك ۇلى 1600 جاس قاتىسقان جارىستا «Software Dev» باعىتىندا توپ جارىپ, 1 ميلليون تەڭگە سىياقىعا يە بولدى.
يننوۆاتورلار سايىسىندا جوباسىن ءساتتى قورعاعان نۇريسلام 12 جاستا. ينفورماتيكا, اعىلشىن جانە فيزيكا پاندەرىن ەرەكشە ۇناتاتىن ول ءار تاقىرىپتان وزىنە كەرەكتى مالىمەت الاتىنىن ايتادى.
نۇريسلام ازىرلەگەن «Extrnos» جوباسىنىڭ يدەياسى اعىلشىن باعدارلاماشىسى تەرري دەۆيس جاساعان وپەراتسيالىق جۇيەدەن باستالىپتى. ۇيالى تەلەفوندارعا ارنالعان قاۋىپسىز وپەراتسيا جۇيەسىن جاساپ شىعۋعا نۇريسلام 7 اي جۇمساعان. «Android» پەن iOS-قا قاراعاندا مىقتى ءارى قاۋىپسىز بۇل جۇيە تەلەفوندى حاكەرلىك شابۋىلداردان قورعاپ, بايلانىس قۇرالىنىڭ جۇمىسىن جىلدامداتۋعا مۇمكىندىك بەرەدى.
وقۋشىسىنىڭ تالابىن ۇشتاعان مۇعالىمى ونىڭ ىنتاسىن ارتتىرىپ, ءپان وليمپيادالارى مەن ءتۇرلى بايقاۋلارعا قاتىسۋىنا ىقپال ەتىپتى. كەيىننەن قىزىلوردا ستارتاپتار مەن ءىت وڭىرلىك حابىنىڭ جەتەكشىسى جانارىس تۇبەكباەۆتان ساباق الىپ, جاڭا تەحنولوگيانىڭ قىر-سىرىنا قانىقتى.
«جۇيەنى ورناتۋ ءۇشىن تەلەفوندا «Android», «Raspberry Pi», «ARM64» ارحيتەكتۋراسى بولۋى كەرەك. تەلەفونعا ونى كومپيۋتەر ارقىلى ورناتامىز. جوبا اياقسىز قالمايدى, ءالى جۇمىس اتقارامىز. تولىق اياقتاۋعا ءالى دە ۋاقىت قاجەت», دەيدى جاس ونەرتاپقىش.
قىزىلوردا