قوستاناي وبلىسىندا ءوتىپ جاتقان جەدەل الدىن الۋ ءىس-شاراسى اياسىندا پوليتسيا قىزمەتكەرلەرى قامىستى, اۋليەكول اۋداندارىندا جاسالعان بىرنەشە مال ۇرلىعىن اشتى. اتالعان قىلمىسقا قاتىسى بار ادامدار انىقتالىپ, ۇستالدى. ۇرلانعان مالدىڭ ءبىر بولىگى يەلەرىنە قايتارىلدى.
ماسەلەن, 2025 جىلدىڭ ماۋسىم-قىركۇيەك ايلارى ارالىعىندا قامىستى اۋىلى ماڭىندا ءتورت رەت ءىرى قارا مالدىڭ جوعالۋى تىركەلگەن. مال يەلەرىنە كەلتىرىلگەن جالپى شىعىن – 4 ملن 550 مىڭ تەڭگە. اۋەل, جايىلىمنان قىزىل ءتۇستى سيىر جوعالىپ كەتكەن. ودان كەيىن اۋىل تۇرعىنىنىڭ ەكى سيىرى ۇرلانعان. پوليتسيا ونىڭ ءبىرىن اداەۆ اۋىلىنان تاپتى. كۇدىكتى ول سيىردى باسقا ءبىر مالعا ايىرباستاپ جىبەرگەن. ءۇشىنشى جاعدايدا اۋىل تۇرعىنىنىڭ جايىلىمنان ەكى باس مالى جوعالادى. كوپ ۋاقىت وتپەي, تاعى ەكى سيىر ۇرلانعان.
جەدەل ءىس-شارا بارىسىندا پوليتسيا ءتورت ۇرلىققا قاتىسى بار 19 جاستاعى اۋدان تۇرعىنىن ۇستادى. تەرگەۋ مالىمەتىنشە, كۇدىكتى تۇرعىنداردىڭ مالىن جايىلىمنان ايداپ اكەتىپ, اقتوبە قالاسىنا اپارىپ ساتىپ وتىرعان.
ء«ار مەزگىلدە جاسالعان ءتورت ۇرلىققا قاتىستى دەرەكتىڭ ءبارى ءبىر ءوندىرىس شەڭبەرىندە بىرىكتىرىلدى. مال ۇرلىعىن بىرنەشە رەت جاساۋ فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر», دەيدى وبلىستىق پد-نىڭ ءباسپاسوز حاتشىسى ك.بازارباەۆا.
سونداي-اق اۋليەكول اۋدانىندا 14 باس اسىل تۇقىمدى ءىرى قارا ۇرلاعان ازامات ۇستالدى. كۇدىكتى بۇعان دەيىن دە مال ۇرلاعانى ءۇشىن سوتتالعان. ۇرلانعان مالدىڭ جالپى قۇنى 7 ملن تەڭگەگە باعالانىپ وتىر. قازىر ءىرى كولەمدەگى مال ۇرلىعى دەرەگى بويىنشا تەرگەۋ ءجۇرىپ جاتىر.
«مال ۇرلىعى» جەدەل-پروفيلاكتيكالىق ءىس-شاراسى اياسىندا پوليتسيا مال جانە ەت ونىمدەرىن تاسىمالداۋ ەرەجەلەرىن بۇزعان 20, مال جايۋ ەرەجەسىن ساقتاماعان 45 ادامدى انىقتادى.
قوستاناي وبلىسى