قاراۋسىز جانۋارلار جول-كولىك وقيعالارىنا ءجيى سەبەپ بولاتىنى ءمالىم. اباي وبلىسىندا دروندار مالدىڭ باقىلاۋسىز جايىلۋىنا بايلانىستى جول-كولىك وقيعالارىن ازايتۋعا كومەكتەسىپ جاتىر, دەپ جازادى Egemen.kz.
اۋدان اكىمدىكتەرىنىڭ قولداۋىمەن جەرگىلىكتى پوليتسيا بولىمشەلەرى پاترۋلدىك قىزمەت بارىسىندا اۋماقتى تۇراقتى باقىلاۋعا جانە اۆتوجول ماڭىندا ەركىن جايىلىپ جۇرگەن مالدى جەدەل انىقتاۋعا مۇمكىندىك بەرەتىن دروندارمەن جابدىقتالدى. جوعارى اجىراتىمدىلىقتاعى كامەرالارى بار پيلوتسىز ۇشۋ اپپاراتتارى مالدىڭ ورنالاسقان ورنىن ناقتى ۋاقىت رەجيمىندە كورسەتىپ, تەز ارەكەت ەتۋگە جاعداي جاسايدى.
درونداردى پروفيلاكيتيكالىق شارالارمەن ۇشتاستىرۋ – مال يەلەرىنىڭ جاۋاپكەرشىلىك مادەنيەتىن ارتتىرۋعا دا مۇمكىندىك بەرىپ وتىر.
ىشكى ىستەر مينيسترلىگىنىڭ مالىمەتىنشە, مىسالى, اتالعان وبلىستىڭ جاڭاسەمەي اۋدانىندا جۇرگىزىلگەن پروفيلاكتيكالىق رەيدتەر بارىسىندا 59 باس جىلقى انىقتالىپ, ارنايى تۇراققا جەتكىزىلگەن. باقىلاۋسىز جۇرگەن مال – سەمەي-وسكەمەن جانە ومبى-مايقاپشاعاي باعىتتارىنداعى قوزعالىسى ۇلكەن جولداردا ءجيى كەزدەسەتىن قاۋىپ كوزدەرىنىڭ ءبىرى. درونداردى قولدانۋ بۇل تاۋەكەلدەردى ايتارلىقتاي تومەندەتىپ, وڭىردەگى جول قاۋىپسىزدىگى دەڭگەيىن جاقسارتۋعا مۇمكىندىك بەرىپ وتىر.
ستاتيستيكا دا قابىلدانىپ جاتقان شارالاردىڭ تيىمدىلىگىن راستاپ وتىر: جىل باستالعالى پوليتسەيلەر مالدىڭ باقىلاۋسىز جايىلۋىنا قاتىستى 2 284 قۇقىق بۇزۋشىلىقتى انىقتاعان. ارنايى ايىپتۇراقتارعا 9 729 باس مال قويىلىپ, ولاردىڭ يەلەرى اكىمشىلىك قۇقىق بۇزۋشىلىق تۋرالى كودەكستىڭ 408-بابى بويىنشا جاۋاپكەرشىلىككە تارتىلعان.
سونىمەن قاتار اۋىل شارۋاشىلىعى جانۋارلارىن سايكەستەندىرۋ تالاپتارىنىڭ بۇزىلۋىنا قاتىستى 201 دەرەك تىركەلىپ, ماتەريالدار ۆەتەريناريالىق ينسپەكتسياعا جولدانعان.