اقتوبە قالاسىندا دەمەۋشىلەردىڭ قولداۋىمەن بيىل 15 ساياباق پەن سكۆەردى اباتتاندىرۋ جوبالارى جۇزەگە اسىرىلىپ, ولاردىڭ كوبى بۇرىن بوس جاتقان اۋماقتاردا سالىنىپ جاتىر, دەپ جازادى Egemen.kz.
قالا تۇرعىندارىنا قولايلى ورتا قالىپتاستىرۋ باستاماسىنا قوسىلعان ءىرى ينۆەستورلار: «زەردە كەراميكا» جشس, «انۆار» جشس, «BS Holding» جشس, «اليحان-ويل» جشس, «اقتوبە مىس كومپانياسى» جشس, «Center Group» جشس, «ماكسيمۋس» جشس, «تسەنتركرەديت بانك» اقف, «Gorilla Asia» جشس, «Rakhmet Group» جشس, «Dastan Group» جشس جانە «GRANT ADAL» جشس.
7 نىسان پايدالانۋعا بەرىلگەن, ال قالعاندارىنا اباتتاندىرۋدىڭ سوڭعى كەزەڭى جۇرگىزىلىپ جاتىر.
وبلىس اكىمدىگىنىڭ مالىمەتىنشە, جۋىردا اياقتالعان جوبالاردىڭ ءبىرى – قاراشا ايىندا كارعالى تۇرعىن الابىندا اشىلعان جاڭا سكۆەر. ونىڭ قۇرىلىسىنا اقتوبە وبلىستىق ءماسليحاتىنىڭ دەپۋتاتى, «انۆار» جشس-نىڭ باس ديرەكتورى تالعات سالفيكوۆ دەمەۋشىلىك جاسادى. سكۆەردىڭ جالپى اۋدانى – 1,3 گەكتار. اۋماعىندا شاعىن فۋتبول الاڭى, اتكەنشەكتەر, ىڭعايلى ورىندىقتار جانە بالالارعا ارنالعان اتتراكتسيوندار ورناتىلعان. وتباسىلىق دەمالىس ءۇشىن قولايلى جاعداي جاسالعان.