ۇكىمەت وتىرىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين 2027-2028 جىلدارى ەڭ تومەنگى جالاقىنى كوتەرۋ ماسەلەسى قاراستىرىلعانىن ايتتى, دەپ حابارلايدى Egemen.kz.
مينيستر اتاپ وتكەندەي, حالىقتىڭ تابىسىن قولداۋعا باعىتتالعان جۇمىستى جالعاستىرۋ جوسپارلانىپ وتىر. ەكونوميكالىق بەلسەندىلىگى تومەن وڭىرلەرگە ەرەكشە كوڭىل بولىنەدى, الەۋمەتتىك تولەمدەردىڭ اشىقتىعى مەن اتاۋلىلىق باعىتىن ارتتىرۋ شارالارى قابىلدانادى. سونىمەن قاتار تسيفرلىق تەحنولوگيالاردى پايدالانۋ ارقىلى الەۋمەتتىك قولداۋدىڭ تيىمدىلىگىن ارتتىرۋ كوزدەلگەن.
«2027-2028 جىلدارى ەڭ تومەنگى جالاقىنى كوتەرۋ ماسەلەسى قارالادى. 2026-2028 جىلدارى حالىقتىڭ ناقتى تابىسىنىڭ ءوسۋى جىلىنا ورتا ەسەپپەن 2-3 پايىزدان تومەن ەمەس بولادى», دەدى سەرىك جۇمانعارين.
مينيستر ۇكىمەت كۆازيمەملەكەتتىك سەكتوردى وڭتايلاندىرۋ بويىنشا جۇمىستى جالعاستىراتىنىن دا مالىمدەدى. 2026 جىلدىڭ سوڭىنا دەيىن كۆازيمەملەكەتتىك سەكتور سۋبەكتتەرىن قۇرۋعا موراتوري قولدانىلادى.
«بيىل جەكەشەلەندىرۋدىڭ 2021-2025 جىلدارعا ارنالعان كەشەندى جوسپارىن ىسكە اسىرۋ اياقتالۋدا. ودان ءارى وڭتايلاندىرۋعا ۇسىنىلاتىن مەملەكەتتىك وبەكتىلەردىڭ جاڭا تىزبەسى قالىپتاستىرىلدى. وعان بالانستىق قۇنى 2 ترلن تەڭگەدەن اساتىن 500-گە جۋىق كومپانيا كىردى. وڭتايلاندىرۋ ءۇش كەزەڭدە جۇزەگە اسىرىلادى. بۇدان باسقا, «كازاقتەلەكوم» اكتسيونەرلىك قوعامى مەن «Qazaq Green Power PLC» اكتسيالارىن IPO/SPO-عا شىعارۋ جوسپارلانىپ وتىر», دەدى ۆيتسە-پرەمەر.
سەرىك جۇمانعارين ماكروەكونوميكالىق تۇراقتىلىقتى قامتاماسىز ەتۋ ءۇشىن ۇكىمەت پەن ۇلتتىق بانكتىڭ اقشا-كرەديت جانە سالىق-بيۋدجەت ساياساتىن ۇيلەستىرۋدى جالعاستىراتىنىن ايتتى.
«باعدارلامانى ىسكە اسىرۋدىڭ باستى ناتيجەسى حالىقتىڭ ناقتى تابىسىنىڭ ءوسۋى بولۋى ءتيىس. جالپى, باعدارلامانى ىسكە اسىرۋ ەكونوميكانىڭ تۇراقتىلىعىن ارتتىرۋعا, قارجىلىق ورنىقتىلىقتى نىعايتۋعا جانە ورتا مەرزىمدى پەرسپەكتيۆادا تۇراقتى جانە ساپالى ءوسۋ ءۇشىن جاعداي جاساۋعا مۇمكىندىك بەرەدى», دەپ تۇيىندەدى مينيستر.