تۇركىستان وبلىسىنداعى ءورتتىڭ سەبەبى انىقتالىپ جاتىر

وقيعا ورنىنا قابىلدانىپ جاتقان جەدەل شارالار تۋرالى توتەنشە جاعدايلار ءمينيسترى شىڭعىس ءارىنوۆ, ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اسقاربەك ەرتاەۆ, دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ, ىشكى ىستەر ۆيتسە-ءمينيسترى سانجار ءادىلوۆ, ەنەرگەتيكا ۆيتسە-ءمينيسترى قايىرحان تۇتقىشباەۆ, وقۋ-اعارتۋ ۆيتسە-ءمينيسترى اسىلبەك احمەتجانوۆ جانە «QazaqGaz Aimaq» اق باس ديرەكتورى باۋىرجان اسقاروۆ, تۇركىستان وبلىسىنىڭ اكىمى نۇرالحان كوشەروۆ بايانداما جاسادى.

قازا تاپقان ازاماتتاردىڭ وتباسىلارىنا بارلىق قاجەتتى كومەك كورسەتىلىپ جاتىر. اۋرۋحاناعا تۇسكەن ءۇش ادامنىڭ جاعدايى اۋىر, ولار جانساقتاۋ بولىمىندە. قۇتقارۋشىلار كەلگەن ساتتە زارداپ شەككەندەردىڭ ءبىرى, 1986 جىلى تۋعان ازامات ۇيدەن ءوز كۇشىمەن شىعىپ ۇلگەرگەن. ونىڭ جاعدايى اۋىر دەپ باعالانىپ وتىر, دەنەسىنىڭ 12%-ىن كۇيىك شالعان. تاعى ەكى زارداپ شەگۋشى – 1991 جانە 2018 جىلى تۋعان ازاماتتار دا, دەنەسىنىڭ 30% جانە 11% كۇيىگىمەن شۇعىل تۇردە اۋرۋحاناعا جەتكىزىلدى, قازىر ولار ءوجج اپپاراتىنا قوسىلعان. جەدەل مەديتسينالىق كومەك كورسەتۋ ءۇشىن شىمكەنتتەن سانيتارلىق اۆياتسيا بريگاداسى ۇشىپ شىقتى.

ۆيتسە-پرەمەر اكىمدىككە جانە ەڭبەك جانە حالىقتى الەۋمەتتىك قورعاۋ مينيسترلىگىنە قازا تاپقانداردىڭ وتباسىلارىنا قاجەتتى ماتەريالدىق كومەكتى تولىق كولەمدە كورسەتۋدى تاپسىردى. دەنساۋلىق ساقتاۋ مينيسترلىگىنە زارداپ شەككەندەردىڭ جاعدايىن تۇراقتى باقىلاۋدا ۇستاۋ, قاجەت بولعان جاعدايدا سانيتارلىق اۆياتسيانى پايدالانا وتىرىپ, ولاردى استانا قالاسىنا جەتكىزۋدى ۇيىمداستىرۋ جۇكتەلدى. ىشكى ىستەر مينيسترلىگىنە ادامداردىڭ قازا بولۋىنا قاتىستى سوتقا دەيىنگى تەرگەۋدىڭ بارىسىن ەرەكشە باقىلاۋعا الۋ تاپسىرىلدى. توتەنشە جاعدايلار مينيسترلىگىنە وڭىرلەردىڭ اكىمدىكتەرىمەن بىرلەسىپ, تۇرعىن ۇيلەر, اسىرەسە ءحاوت جاتاتىن وتباسىلاردىڭ ۇيلەرىنە, جاتاقحانالار مەن حوستەلدەرگە رەيد جۇرگىزۋ تۋرالى تاپسىرما بەرىلدى. رەيد بارىسىندا پەش جۇيەلەرىنىڭ جاعدايى تەكسەرىلىپ, اقاۋلار انىقتالسا, ولاردى جەدەل تۇردە جويۋ قاجەت.