قوستانايدا كورەيا – «تاڭعى شىق» ەلىنىڭ مادەنيەت فەستيۆالى ءوتتى. كورول سەدجون اتىنداعى ينستيتۋت ۇيىمداستىرعان مەرەكە اياسىندا قالا تۇرعىندارى كارىس حالقىنىڭ ءداستۇرلى تاعامدارىنان ءدام تاتىپ كورىپ, ۇلتتىق ويىن تۇرلەرىمەن تانىستى.
وسىدان ەكى جىل بۇرىن احمەت بايتۇرسىن ۇلى اتىنداعى قوۋ جانىنان اشىلعان ينستيتۋت جەرگىلىكتى تۇرعىندارعا تەگىن ءتىل ۇيرەتەدى. سونداي-اق مۇندا كارىس حالقىنىڭ سالت-ءداستۇرى مەن مادەنيەتى جونىندە كەڭ ماعلۇمات الۋعا بولاتىن تانىمدىق ءىس-شارالار ءوتىپ تۇرادى.
«بۇگىنگى فەستيۆالدى ءبىرىنشى رەت ۇيىمداستىرىپ وتىرمىز. جاستاردى كوبىرەك شاقىردىق. مەرەكەلىك ءىس-شارا اياسىندا كارىس حالقىنىڭ ۇلتتىق بيىنە اۋەستەنىپ جۇرگەن ونەر توپتارىنىڭ بايقاۋى وتەدى. بايقاۋ جەڭىمپازدارىنا باعالى سىيلىقتار دايىنداپ قويدىق. سونداي-اق كوپشىلىك ۇلتتىق تاعام رامەن جەۋدەن جارىسادى. ءبىز وڭتۇستىك كورەيادان حامبوك دەپ اتالاتىن ادەمى ۇلتتىق كيىمدەر ساتىپ العانبىز. فەستيۆال قوناقتارى سول كيىمدەردى كيىپ كورىپ, فوتوسۋرەتكە تۇسە الادى», دەيدى قوستانايداعى كورول سەدجون اتىنداعى ينستيتۋتتىڭ ديرەكتورى ناعيما ماناسباەۆا.
فەستيۆال بارىسىندا كارىس ەتنومادەني بىرلەستىگىنىڭ وكىلدەرى كوپشىلىككە چەگيچحاگي, پەنيچحيگي, پەسوكچحيگي, كونگينوري, تتاكچي دەپ اتالاتىن ۇلتتىق ويىن تۇرلەرىن تانىستىردى. مىسالى, چەگيچحاگي ويىنى بالا كەزىمىزدە ءبارىمىز جارىسا ويناعان كادىمگىجارماققا ۇقسايدى. ال پەسوكچحيگيدىڭ ەرەجەسى اسىق ويىنىنا كەلەدى. سودان با, جاستاردىڭ كوبى بۇل ويىن تۇرلەرىن تەز ءىلىپ اكەتىپ, جارىسا ويناپ جاتتى.
ءىس-شارانى ۇيىمداستىرۋشىلاردىڭ سوزىنشە, كورول سەدجون حV عاسىردا كارىستىڭ ءالىپبيىن تۇزگەن. بۇگىندە الەمنىڭ 50 شاقتى ەلىندە تۇلعانىڭ اتىندا ينستيتۋت بار. ونىڭ ەكەۋى قوستاناي مەن شىمكەنتتە جۇمىس ىستەپ جاتىر.
قوستاناي وبلىسى