16 قاراشادا تۇنگى ساعات 03:00 شاماسىندا تالدىقورعان قالاسىنىڭ پاترۋلدىك پوليتسيا قىزمەتكەرلەرى وبلىس ورتالىعى كوشەلەرىندە قوعامدىق ءتارتىپ پەن جول قاۋىپسىزدىگىن قامتاماسىز ەتۋ بارىسىندا Mitsubishi Pajero اۆتوكولىگىن توقتاتپاق بولدى, دەپ جازادى Egemen.kz.
اتالعان كولىك جوعارى جىلدامدىقپەن قوزعالىپ, قابانباي باتىر كوشەسى بويىندا بىرقاتار قاۋىپتى مانەۆرلەر جاساعان. پوليتسيا قىزمەتكەرلەرىنىڭ زاڭدى تالابىنا باعىنباعان جۇرگىزۋشى جىلدامدىعىن ارتتىرىپ, قاشۋعا ارەكەتتەنگەن. پاترۋلدىك ەكيپاج دەرەۋ قۋ ارەكەتىن باستاپ, باعىت-باعدار مالىمەتىن باسقا ناريادتارعا جەتكىزدى. بىرنەشە مينۋتقا سوزىلعان قۋ بارىسىندا كولىك كوپقاباتتى تۇرعىن ۇيلەردىڭ ءبىرىنىڭ اۋلاسىندا بوگەلىپ, توقتاتىلدى.
– تەكسەرۋ كەزىندە رولدە 2009 جىلى تۋعان, كولىك باسقارۋ قۇقىعى جوق كامەلەتكە تولماعان ءجاسوسپىرىم وتىرعانى انىقتالدى. ءجاسوسپىرىمدى دەرەۋ بولىمشەگە جەتكىزىپ, ونىڭ زاڭدى وكىلدەرىنە حابارلاندى. اۆتوكولىك ارنايى ايىپتۇراققا ەۆاكۋاتسيالاندى. پوليتسيا قىزمەتكەرلەرىنىڭ زاڭدى تالابىنا باعىنباۋ جانە جۇرگىزۋشى كۋالىگىنسىز كولىك باسقارۋ فاكتىلەرى بويىنشا جينالعان ماتەريالدار سوتقا جولداندى, – دەلىنگەن ءىىم اقپاراتىندا.
سونىمەن قاتار ءجاسوسپىرىمنىڭ اتا-اناسىنا كامەلەتكە تولماعاننىڭ تۇنگى ۋاقىتتا قاراۋسىز ءجۇرۋى جانە اتا-انالىق مىندەتىن تيىسىنشە ورىنداماۋى بويىنشا ماتەريال تولتىرىلدى. ودان بولەك, جاسوسپىرىممەن بىرگە بولعان ءۇش كامەلەتكە تولماعان دوسىنىڭ دا انىقتالعانى بەلگىلى بولدى. ولاردىڭ دا اتا-انالارىنا بالالاردىڭ تۇنگى مەزگىلدە زاڭدى وكىلدەرىنىڭ قاراۋىنسىز جۇرگەنى ءۇشىن ءتيىستى شارالر قابىلداندى.
پوليتسيا اتا-انالارعا بالالارىڭىزدىڭ جۇرگەن جەرىن قاداعالاپ, تۇنگى ۋاقىتتا قاراۋسىز قالدىرماۋدى, سونداي-اق كولىكتى باسقارۋعا رۇقساتى جوق كۇيدە جولعا شىقپاۋىن قامتاماسىز ەتۋدى ەسكەرتەدى. بۇل – قاۋىپسىزدىك پەن قۇقىق بۇزۋشىلىقتىڭ الدىن الۋدىڭ باستى شارتى. قوعامدىق ءتارتىپ پەن زاڭدىلىقتى ساقتاۋ – ءاربىر جول قوزعالىسىنا قاتىسۋشىنىڭ قاۋىپسىزدىگىنىڭ كەپىلى.