بيىل كوكتەن ءيىپ, جەردەن بەرىپ, ءوڭىر ديقاندارى مول تابىسقا كەنەلدى. ىرىزدىق جورىعىنا قاتىسقان جىگەرلى جاستار دا از ەمەس. سونىڭ ءبىرى – كومباينشى دياس ءبىلالوۆ. ول وراق ناۋقانى كەزىندە 1 830 گەكتار القاپتىڭ ەگىنىن ورىپ, 4 920 توننا استىق باستىردى, دەپ حابارلايدى Egemen.kz.
تاياۋدا جاس كومباينشى اۋىل شارۋاشىلىعى ەڭبەككەرلەرىنىڭ ەكىنشى فورۋمىندا مەملەكەت باسشىسى قاسىم-جومارت توقاەۆتىڭ جارلىعىمەن «ەرەن ەڭبەگى ءۇشىن» مەدالىمەن ماراپاتتالدى.
ەل يگىلىگىن ەسەلەۋگە ۇلەس قوسقان دياس ءابجان ۇلى «فيرما الماز-اگرو» سەرىكتەستىگىندە ءۇشىنشى جىل ەڭبەك ەتەدى. ورتا ارناۋلى ءبىلىمى بار. كوپتەگەن اۋىل بالالارى ءتارىزدى تەحنيكاعا دەگەن قۇمارلىق ەرتە پايدا بولعان. الدىڭعى تولقىن اعالارىنىڭ جان اياماي جۇمىس ىستەپ جۇرگەنىن كورىپ, ءوزى دە ناق سولارداي بولۋعا تىرىسقان. اسىلىندا الدىنان جۇمىس ۇركىپ وتىراتىن ەڭبەكقور ادامداردىڭ ءىس-قيمىلى كەيىنگى تولقىنعا ادەمى ونەگە.
«بىزدە وزات جۇمىسشىلار وتە كوپ. ولار وزدەرىنە تاپسىرىلعان كەز كەلگەن شارۋانى تاپ-تۇيناقتاي ەتىپ ورىندايدى جانە مەحانيزاتورلاردىڭ كوپشىلىگى تەحنيكانىڭ بارلىق ءتۇرىن تىزگىندەپ, جۇمىس ىستەي بەرەدى. ال كومبايندا ىستەۋ قىزىق ءارى قاستەرلى. كوز الدىڭىزعا ەلەستەتىپ كورىڭىزشى, كۇزگى دالا, ماساقتاعى ءدانىن ازەر كوتەرىپ تۇرعان ەگىن القابى. ءسال عانا جەل كوتەرىلسە تەڭىزدەي تولقيدى. ىرىس تۇنعان, مول داۋلەتكە بوككەن جومارت جەر. ەگەر ەگىستىك القابىندا ءبىر تال ءارامشوپ بولماسا توقتاماي شابا بەرگىڭ كەلەدى. قازىرگى ءبىزدىڭ كورسەتكىشتەرىمىزگە اعا تولقىننىڭ ءسال تاڭىرقاپ قارايتىنى بار. ونىڭ سىرى بەلگىلى. جاڭا زامانعى قۋاتتى تەحنيكالاردىڭ ەڭبەك ونىمدىلىگى وتە جوعارى», دەيدى دياس ءابجان ۇلى.
جاڭاتۇرمىس اۋىلىنىڭ ماڭى قاربالاسى كوپ قوڭىر كۇزدە ەڭبەك جىرىن شەرتىپ تۇرادى. دارحان دالانى ادام كوڭىلىن ەلەگىزەتىن ەڭبەك اۋەنى تەربەتكەن كەزدە سول جورىققا قاتىسقان ەرلەردىڭ دە ەڭسەسى كوتەرىلە تۇسەدى.
«ۇجىم وتە ۇيىمشىل. ءار ءساتى شەشۋشى شاققا اينالعان كوكتەمگى ەگىس, كۇزگى ەگىن وراعى كەزىندە ۋاقىتپەن ساناسپاي ەڭبەك ەتەمىز. مىناۋ سەنىڭ, مىناۋ مەنىڭ جۇمىسىم دەۋ جوق, ءبارى ورتاق. سەرىكتەستىك ەڭبەك ەتۋىمىزگە جاقسى جاعداي جاساپ وتىر. ەڭبەكاقىمىز تولىمدى, ۋاقىتىندا قولىمىزعا تيەدى», دەيدى جاس كومباينشى.
جيىرمادان جاڭا اسقان جاس جىگىتتىڭ ەل ىشىندە ابىرويعا بولەنۋى ادال ەڭبەگىنىڭ ارقاسىندا دەۋىمىز كەرەك. الدا قانشاما عۇمىر بار. سول جولدا قوس قولىتىعىنان كوتەرىپ دەمەيتىن, العا ۇمتىلدىراتىن قۇدىرەت – ءوزىنىڭ بويىنداعى ادال ەڭبەككە دەگەن ۇمتىلىسى.