ورازماعانبەت تۇرماعانبەت ۇلى اتىنداعى ماڭعىستاۋ يندۋستريالدى تەحنيكالىق كوللەدجىنىڭ وندىرىستىك وقىتۋ شەبەرلەرى مەن ستۋدەنتتەرى بىرلەسىپ, «اقىلدى كوللەدج» ستەندىن جاسادى. جوبا قاشىقتان باسقارۋ جۇيەسىنە نەگىزدەلىپ, كوللەدج ىشىندەگى ەلەكتر مەن سۋمەن جابدىقتاۋ جۇيەسىن ءبىر ورتالىقتان اۆتوماتتى تۇردە باقىلاۋعا مۇمكىندىك بەرەدى.
وندىرىستىك وقىتۋ شەبەرىنىڭ ايتۋىنشا, بۇل باستاما – كوللەدجدىڭ ىشكى ينفراقۇرىلىمىن زاماناۋي تەحنولوگيالار ارقىلى ءتيىمدى باسقارۋعا باعىتتالعان.
– ءبىز وسى جوبانى كوللەدجدىڭ ءوز ىشىندە قولدانۋعا ارناپ جاسادىق. مىسالى, عيماراتتا جارىق نەمەسە كونديتسيونەر قوسىلىپ قالسا, ونى كۇزەتشى كوللەدج الدىنداعى ەكراننان كورىپ, ءبىر باتىرما ارقىلى قاشىقتان وشىرە الادى. سول سياقتى اشىق قالعان سۋدى دا اۆتوماتتى تۇردە وشىرۋگە مۇمكىندىك بار, – دەيدى كوللەدجدىڭ وندىرىستىك وقىتۋ شەبەرى سەرىك تۇركمەنباەۆ.
قازىر كوللەدجدىڭ ەنەرگيا تيىمدىلىگىن ارتتىرىپ, رەسۋرستاردى ۇنەمدەۋ ماقساتىندا قولعا الىنعان جوبانى تاجىريبەدەن وتكىزىپ جاتىر.
كوللەدج باسشىلىعى بۇل تەك ەنەرگيانى ءتيىمدى جۇمساۋ عانا ەمەس, قاۋىپسىزدىك دەڭگەيىن ارتتىرۋ, ۋاقىت ۇنەمدەۋ مەن قولايلى جاعداي جاساۋ, زاماناۋي تەحنولوگيانىڭ مۇمكىندىگىن كەڭىنەن قولدانۋ ەكەنىن ايتادى.
ماڭعىستاۋ وبلىسى