ەلوردا مەن ەلباسى – ەگىز ۇعىم
تۋعان كۇنىڭمەن, ەڭسەسى بيىك ەلوردا!
تۋعان كۇنىڭىزبەن, ەلى سۇيگەن, ەلىن سۇيگەن ەلباسى!
اسقاق رۋح پەن ەلدىكتىڭ ايبىندى نىشانى بولىپ تابىلاتىن مەملەكەتتىك تۋ “اتامەكەن” ەتنو-مەموريالدى كەشەنىندە شىلدەنىڭ 4-ىندە ەلباسىنىڭ قاتىسۋىمەن كوكتە جەلبىرەدى. تۋدى كوتەرۋ سالتاناتتى ءراسىمى استانا كۇنىن مەرەكەلەۋدىڭ رەسمي تۇردە باستالعانىن ءبىلدىردى.
– مەملەكەتتىك تۋ قاشاندا ايرىقشا ماڭىزدى وقيعانىڭ قۇرمەتىنە كوتەرىلەدى. باس بايراعىمىزدىڭ بۇگىن ەلوردا كوگىنە شارىقتاي كوتەرىلۋى – استانا كۇنىنە ارنالعان مەرەكەلىك شارالاردىڭ رەسمي تۇردە باستالۋىن بىلدىرەدى. استانانىڭ 10 جىلدىق مەرەكەسىنەن بەرى بۇل ىزگى شارا يگى داستۇرگە اينالىپ كەلەدى. ءبىز بۇگىن وسى جەردەن اسقاق استانامىزدىڭ ون ەكى جىلدىق مەرەكەسىن رەسمي تۇردە باستاعالى تۇرمىز. جىل – ون ەكى ايدان تۇرادى. بابالار ۇستانعان جىل قايىرۋ ءداستۇرى بويىنشا, ون ەكى جىل – ءبىر مۇشەلدى قۇرايدى. حالقىمىز باعزىدان مۇشەل جاسقا ەرەكشە ءمان بەرگەن. بۇگىن, مىنە, استانا وسى مۇشەل جاسىنا جەتتى! تۇپتەپ كەلگەندە, ون ەكى جىل – تاريح ءۇشىن تىم قىسقا ۋاقىت. ون ەكى جاسقا تولعان بالا مۇشەل جاسقا ەندى جەتىپ, وڭ-سولىن جاڭا تاني باستايدى, – دەپ باستادى ءسوزىن ەلباسى.
ال استانا وسى جىلدار ىشىندە ساۋلەتىنە داۋلەتى كەلىسكەن ىرگەلى ورتالىققا, الەمدىك ساياسات پەن رۋحانياتتىڭ قۇتتى ورداسىنا اينالدى.
تۋ – تاۋەلسىزدىك پەن تۇتاستىقتىڭ تۇعىرلى ولشەمى, ازاتتىقتىڭ ايرىلماس بولشەگى! سوندىقتان ول ەجەلدەن ەلدىكتىڭ باستى بەلگىسى بولىپ ەسەپتەلگەن! وسى باس بايراقتىڭ استىندا قازاقستان قارۋلى كۇشتەرىنىڭ جاس ساردارلارىنا جاڭا اسكەري شەندەر تاپسىرىلادى. مۇنىڭ دا سيمۆولدىق ءمانى زور, دەپ جالعادى ءسوزىن پرەزيدەنت. تۋدى كيە تۇتىپ, ايرىقشا قاستەرلەۋ – ارعى اتالارىمىزدان تامىر تارتقان ارنالى ءداستۇر. ءسۇيىنباي اقىن ايتقانداي, باتىر بابالارىمىز ء“بورىلى بايراق” استىندا باس قوسىپ, بولىنبەس ەلدىڭ بىرلىگىن بەكەمدەگەن. ۇلى جورىقتاردا ارۋاقتى باتىرىنا بايراعىن ۇستاتقان. تۋعا قاراپ جاۋىنگەرلەر جىگەرىن جانىعان, نامىسىن قايراعان. جەلبىرەگەن جالاۋ جاۋجۇرەك باتىرلاردىڭ رۋحىن وياتقان. بۇل بۇگىنگى ۇرپاققا ونەگە بولۋى ءتيىس. ەگەمەن ەلدىڭ ەرلەرى كوك بايراقتىڭ قادىر-قاسيەتىن جەتە سەزىنۋلەرى قاجەت. التىن كۇن استىندا ازات قىرانى قالىقتاعان كوك بايراقتىڭ اشىق اسپانىمىزدا جەلبىرەۋى بۇگىنگى باتىرلارىمىزعا ەرەكشە كۇش بەرەتىنى انىق. تۋ – ەل ءبىرلىگىنىڭ سيمۆولى. حالقىمىز قانداي كەزەڭدە دە ءبىر تۋدىڭ توڭىرەگىنە توپتاسىپ, ەرلىك پەن ەلدىكتىڭ جاسامپاز ۇلگىسىن كورسەتكەن. بايراعىن جىقپاي, ەلى مەن جەرىن ۇرپاقتان ۇرپاققا اماناتتاعان.
1998 جىلى ەلوردا بارشا الەمگە پاش ەتىلگەنىن تىلگە تيەك ەتكەن ەلباسى قازىر استانانىڭ تانىماستاي وزگەرگەنىن ەرەكشە ماقتانىش سەزىمىمەن ايتتى. ءار كۇن سايىن مۇندا استانانى كورۋ ءۇشىن قازاقستاندىقتار مەن شەتەلدىكتەر كەلۋدە. ورتالىق ازيانىڭ نەگىزگى مەگاپوليسى بولىپ تابىلاتىن ەلوردادا جاھاندىق حالىقارالىق كەزدەسۋلەر, قۇرىلتايلار مەن كونفەرەنتسيالار وتكىزىلۋدە. وسى رەتتە مەملەكەت باسشىسى قالانىڭ ەلىمىز ەكونوميكاسىنداعى ۇلەسىنىڭ ارتقانىن اتاپ وتە كەلىپ, جالپى وڭىرلىك ءونىم 1 تريلليون 300 ميلليارد تەڭگەگە جەتكەنىن العا تارتتى. وندىرىستىك ءونىم كولەمى 9 ەسە, ال نەگىزگى كاپيتالعا سالىنعان ينۆەستيتسيا 18 ەسە ءوسىپ, قۇرىلىس كولەمى دە وسىنشاما ەسە ارتقان, دەدى نۇرسۇلتان ءابىش ۇلى. شىنىندا دا, ەلدى يندۋستريالاندىرۋ باعدارلاماسى جۇزەگە اسىرىلۋدا. ەڭ باستىسى – قازاقستاننىڭ تۋى مەن ءانۇرانىن بارلىق الەم تانيدى. ەلباسى وسى ورايدا ەلىمىزدىڭ تانىمال بولۋى حالىقارالىق باستامالارىمىز بەن ەقىۇ سياقتى بەدەلدى ۇيىمعا توراعا بولۋىمىزدا ەكەندىگىن دە ەسكەرتە كەتتى.
ون ەكى جىل ىشىندە ەلوردا ارقا توسىندە وركەن جايىپ, تامسانا قارايتىن كورىكتى شاھارعا اينالدى. ءزاۋلىم عيماراتتار قالا تۇرعىندارى مەن كەلۋشىلەردىڭ كوزايىمى بولىپ وتىر. ال كوك بايراعىمىز وسىنداي اسەم استانامىزدىڭ كەز كەلگەن جەرىنەن كورىنەدى. توبەمىزدە جەلبىرەگەن كوك بايراق ءاربىر قازاقستاندىقتىڭ بويىنا زور ماقتانىش پەن رۋح ۇيالاتىپ قانا قويماي, وسكەلەڭ ۇرپاققا وتانسۇيگىشتىك قاسيەت تە دارىتادى.
نۇرسۇلتان نازارباەۆ قر ۇقك اسكەري ينستيتۋتىنىڭ ۇلگىلى تۇلەكتەرىنە لەيتەنانت پوگونىن تابىس ەتتى.
اسقار تۇراپباي ۇلى.