قوستاناي وبلىسىنىڭ جانگەلدين اۋدانىندا براكونەرلىك جاسادى دەگەن كۇدىكپەن ءۇش ادام ۇستالدى. پوليتسيا ولاردىڭ اۆتوكولىگىنەن زاڭداستىرىلماعان مىلتىق, جانۋاردىڭ قىلشىعى جابىسقان پىشاق تاپقان. سونداي-اق, جاقىن ماڭنان وققا ۇشىپ ولگەن اقبوكەننىڭ دەنەسى تابىلعان, دەپ جازادى Egemen.kz.
اتالعان وقيعاعا قاتىستى قىلمىستىق كودەكستىڭ 339-1-بابى بويىنشا قىلمىستىق ءىس قوزعالدى.
«وقيعا «براكونەر» رەسپۋبليكالىق جەدەل الدىن الۋ ءىس-شاراسى اياسىندا تىركەلدى. 20 قازاننان 19 قاراشاعا دەيىن ەل كولەمىندە ءوتىپ جاتقان ءىس-شارا بارىسىندا تەك قوستاناي وبلىسىنىڭ وزىندە 800-گە جۋىق رەيد وتكىزىلدى.
ناتيجەسىندە 150 قۇقىقبۇزۋشىلىق انىقتالدى, ونىڭ 78-ءى – اڭشىلىق ەرەجەسىن, 28-ءى – بالىق اۋلاۋ ءتارتىبىن بۇزۋعا قاتىستى. براكونەرلەرگە قارسى كۇرەس جالعاسادى. ال ەلىمىزدىڭ تابيعي بايلىعىنا قول سۇققان ءاربىر ادام زاڭ الدىندا ءتيىستى جازاسىن الادى», دەپ مالىمدەدى وبلىستىق پد-نىڭ ءباسپاسوز قىزمەتى.
قوستاناي وبلىسى