OpenAI كومپانياسى جاساندى ينتەللەكتتىڭ جاڭا ۇلگىلەرىن – GPT-5.1 Instant جانە GPT-5.1 Thinking مودەلدەرىن ىسكە قوسقانىن جاريالادى. بۇل جاڭارتۋلار ChatGPT چات-بوتىنىڭ ونىمدىلىگى مەن ءوزارا ارەكەت ساپاسىن ايتارلىقتاي جاقسارتادى, دەپ حابارلايدى Egemen.kz.
كومپانيا مالىمەتىنشە, جاڭا ۇلگىلەر بۇگىننەن باستاپ جۇمىس ىستەي باستايدى. الدىمەن اقىلى جازىلىم يەلەرىنە, كەيىن بارلىق پايدالانۋشىلارعا قولجەتىمدى بولادى.
جاڭارتۋدا ەكى بولەك نۇسقا ۇسىنىلعان:
GPT-5.1 Instant – ChatGPT-دە ەڭ ءجيى قولدانىلاتىن مودەل. ەندى ول «اقىلدىراق بولىپ, پايدالانۋشىنىڭ نۇسقاۋلارىن جاقسىراق تۇسىنەدى».
GPT-5.1 Thinking – ويلاۋ جانە تالداۋ قابىلەتى كۇشەيتىلگەن نۇسقا. ول قاراپايىم تاپسىرمالاردى تەزىرەك ورىندايدى, كۇردەلى جاعدايلاردا تۇراقتىراق جۇمىس ىستەيدى جانە جاۋاپتارىن ناقتىراق بەرەدى.
پايدالانۋشىلار ءۇشىن بۇل — جاۋاپتارداعى «ماشينالىق توننىڭ» ازايۋى جانە ChatGPT-ءدىڭ سويلەۋ مانەرىندەگى يكەمدىلىكتىڭ ارتۋى دەگەندى بىلدىرەدى.
GPT-5 ۇلگىسىنىڭ الدىڭعى نۇسقالارى شامامەن ءۇش اي بويى قولجەتىمدى بولىپ قالادى. پايدالانۋشىلار ەكى نۇسقانى سالىستىرىپ, بەيىمدەلە الادى.