جاقىندا عانا جارىق كورگەن فوتوالبوم “نۇرسۇلتان نازارباەۆ. فوتوسۋرەتتەر” دەپ اتالادى. مۇندا حالقىنىڭ قادىرلى ازاماتى, تاۋەلسىز مەملەكەتىمىزدىڭ ىرگەتاسىن قالاپ, بۇگىنگى كەمەل شاعىنا جەتكىزگەن ەلباسى – تۇڭعىش پرەزيدەنتىمىزدىڭ جۇمىلىپ جۇدىرىق, بىرىگىپ بىلەك بولعان, بەرەكە-بىرلىككە ۇيىپ, تۋىستىقتى تۋ ەتىپ كوتەرىپ, اعايىندىقتى باۋىرلاستىققا ۇلاستىرعان ۇلت پەن ۇلىس وكىلدەرىمەن ءار كەزدەگى جۇزدەسۋلەرى بەينەلەنىپتى.
فوتوسۋرەتتەرگە كوز جىبەرىپ وتىرعاندا, بۇكىل قازاق ەلىنىڭ دالاسى مەن قالاسى, جىلدىڭ ءتورت مەزگىلىندەگى تابيعات-انانىڭ سان ءتۇرلى كورىنىستەرى, پرەزيدەنت قاتىسقان رۋحاني الەمدەگى تاريحي وقيعالار, ەلىمىزگە كەلگەن شەتەلدىك مارتەبەلى مەيماندارمەن ەمىن-ەركىن ديدارلاسۋلار, جىلى شىرايلى جۇزدەسۋلەر, اعىنان جارىلعان ۇلكەن-كىشىنىڭ نۇرسۇلتان ابىش ۇلىمەن ءبىر داستارقان باسىندا باسقوسۋى, بۇكىل ەلدىگىمىزدىڭ 20 جىلعا تاياۋ ۋاقىت ىشىندەگى بەل-بەلەسى ءبىر كىتاپتىڭ ءون بويىنان ورىن الىپتى. ۇلت كوشباسشىسىنىڭ تابيعي بولمىسى, كۇش-جىگەرى, قارىم-قابىلەتى ءار سۋرەتتەن ايقىن اڭعارىلادى.
فوتوالبومنىڭ ءبىر ەرەكشەلىگى ءار بەتتەگى سۋرەتتەردىڭ ورتاق ويىن ءبىلدىرەتىن ءبىر سويلەم جازۋ ارقىلى كوپ ماعىنا بەرە العان. مىسالى, ەلباسىنىڭ ۇلى وتان سوعىسىنىڭ قاھارماندارىمەن كەزدەسۋىندە “ەرلىك رۋحى وشپەيدى” دەسە, ارداقتى قاۋىممەن, اقساقالدى اتالارمەن ءجۇزدەسۋ ساتىنە “سالەم – ءسوزدىڭ اناسى” دەلىنىپتى. ءبىر سوزبەن ايتقاندا, فوتوسۋرەتتەردەن الار تاعىلىم دا, ۇيرەنەر ۇلگى دە, دەرەك تە جەتىپ ارتىلادى.
سۇلەيمەن مامەت.