وسكەمەننىڭ ىرگەسىندەگى گلۋبوكوە كەنتىندە تۇراتىن تولەۋحان اۋلەتى شەتىنەن مەرگەن. سوناۋ كورەيادا وتكەن ءداستۇرلى ساداق اتۋدان الەم كۋبوگىندە قازاقستان نامىسىن قورعاعان اياش قابدوللاەۆا جامبى اتۋدان ءبىرىنشى ورىندى يەلەنسە, ونىڭ كەلىنى پۇت نىساناسى بويىنشا اجار تولەۋحانوۆا ءۇشىنشى ورىن تۇعىرىنان كورىندى.
شىعىستا ەڭ العاش ساداق اتۋ ءداستۇرىن قايتا جاڭعىرتقان – وسى اجار تولەۋحانوۆا. ول گلۋبوكوە كەنتىندە مەرگەندەر مەكتەبىن اشىپ, شاكىرت تاربيەلەۋدى قولعا العان. ءا دەگەندە-اق ادىرنا تارتۋعا قىزىققاندار كوپ بولدى. مەكتەپ وقۋشىلارى قىزىعىپ قانا قويماي, رەسپۋبليكالىق جارىستاردا جۇلدەدەن جۇلدە قويمادى. كەيىن اجار ءوزى كەلىن بولىپ تۇسكەن ءۇي ءىشىن دە ساداق اتۋعا باۋلىعان. قازىر وبلىستاعى كىل مەرگەندەر وسى اۋلەتتەن شىعادى. بۇل ءسوزىمىزدى كۇنى كەشە ساداقتى سانگە تارتاتىن ساق حانشايىمدارىنىڭ بۇگىنگى بەينەسىندەي ارۋلار تاعى ءبىر مارتە دالەلدەدى. ءتىپتى سوناۋ تۇكپىردەگى تۇبەكتە وتكەن دودادا قازاقتىڭ قىزدارى 535 سپورتشى قاتىسقان سىننان سۋىرىلىپ العا شىقتى. جۇلدەگەرلەر ەلگە كەلىسىمەن جانكۇيەرلەرى اياقتارىن جەرگە تيگىزبەي كۇتىپ الدى. مۇنداي قوشەمەتكە يە بولعان جۇلدەگەرلەر دە ريزاشىلىقتارىن ءبىلدىرىپ جاتتى.
– بۇل جارىس ءبىز ءۇشىن وڭاي بولا قويمادى. 32 ەلدەن مەرگەندەردىڭ مەرگەنى كەلىپ باق سىنادى. قازاقستان قۇراماسىنان 34 ساداقشى ەل نامىسىن قورعادى. وسىنداي جارىستا جەڭىپ شىعامىن دەپ ويلامادىم. مەنى قولداعان جەرلەستەرىمە, وتباسىما, كۇتىپ الىپ جاتقان جانكۇيەرلەرگە كوپ راحمەت. ال ساداق تارتۋعا قىزىقتىرعان كەلىنىم اجارعا مىڭ العىس, – دەدى جەڭىمپازىمىز اياش قابدوللاەۆا.
ايتا كەتەيىك, اياش قابدوللاەۆا كوپ جىل گلۋبوكوە كەنتىندەگى ورالحان بوكەي اتىنداعى ورتا مەكتەپتە ۇستازدىق ەتەدى. ۇستازدىق ەتە ءجۇرىپ, مەرگەندىك ونەردى بەرتىن مەڭگەردى. سونىڭ وزىندە بيىك بەلەستەردى باعىندىرىپ ءجۇر. ءيا, ساداق تارتۋ جاس تالعامايدى. كەڭ عيمارات بولسا – بولعانى. اجار اشقان مەرگەندەر مەكتەبى مۇنىمەن توقتاپ قالماق ەمەس. جۇلدە قورجىنى ءالى تالاي التىن مەن كۇمىسكە تولارى انىق.
شىعىس قازاقستان وبلىسى