شورت-ترەكتەن العاشقى جاسوسپىرىمدەر اراسىنداعى الەم كۋبوگى 2023 جىلى ۇيىمداستىرىلعان. سول كەزدە-اق قازاقستان كونكيشىلەر وداعى وسى جارىستى وتكىزۋگە العاشقىلاردىڭ ءبىرى بولىپ ءوتىنىم بەرگەن ەدى. ناتيجەسىندە حالىقارالىق كونكيشىلەر وداعى ەلىمىزگە ءبىر ەمەس, قاتارىنان ەكى كەزەڭدى سەنىپ تاپسىردى. ەكى كەزەڭ دە استانادا وتەدى, دەپ جازادى Egemen.kz.
بۇگىن باستالعان اتالعان سپورت تۇرىنەن الەم كۋبوگىنىڭ ءبىرىنشى كەزەڭى 7-9 قاراشادا, ال ەكىنشى كەزەڭدە وسى ايدىڭ 13-15 كۇندەرى ارالىعىندا «الاۋ» مۇز سارايىندا ۇيىمداستىرىلادى.
ءبىرىنشى كەزەڭگە الەمنىڭ 22 ەلىنەن سپورتشىلار قاتىسادى. جۇلدەلەر ءۇشىن اۋستراليا, كانادا, قىتاي, فرانتسيا, ۆەنگريا, جاپونيا, قازاقستان, وڭتۇستىك كورەيا, موڭعوليا, گەرمانيا, يندونەزيا, گونكونگ, سينگاپۋر, ۇلىبريتانيا, اقش, ءۇندىستان, يتاليا, جاڭا زەلانديا, پولشا, شۆەيتساريا, تايبەي, نيدەرلاند سپورتشىلارى باق سىنايدى.
ۇلتتىق وليمپيادا كوميتەتى قازاقستان قۇراماسىنىڭ تولىق ءتىزىمىن جاريالادى. اتاپ ايتقاندا, ەل نامىسىن قورعايتىندار:
- پولينا ومەلچۋك
- اناستاسيا گالەچينا
- رايانا ماناربەكوۆا
- نۇريا الپىسباي
- گۇلدانا جالمۇحان
- اسىلحان قاسىمبەك
- ماديار ماديحوۆ
- پاۆەل تسوي
- بوگدان ۆەحوۆ
- تاميرلان جولداس
استاناداعى جارىستا 500, 1000, 1500 مەتر قاشىقتىقتارىندا (ۇلدار مەن قىزدار اراسىندا), سونداي-اق ەرلەر, ايەلدەر جانە ارالاس كوماندالىق ەستافەتالاردا جۇلدەلەر ساراپقا سالىنادى.