2023 جىلدىڭ 30 قاراشاسىندا 13 ادامنىڭ ءومىرىن قيعان حوستەلدەگى ورتكە قاتىستى اپەللياتسيالىق سوت ءوتتى, دەپ جازادى Egemen.kz.
ءىس ءبىرىنشى ساتىدا قىلمىستىق كودەكستىڭ 292-بابىنىڭ 3-بولىگى (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءورت قاۋىپسىزدىگى تالاپتارىن بۇزۋ) بويىنشا قارالىپ, ALA Hostel ديرەكتورى ادىلبەك مۇحامەدياروۆ 5 جىلعا, «گيدسەرۆيس» كومپانياسىنىڭ يەسى الەكساندر پەكەلنيك 4 جىلعا باس بوستاندىعىنان ايىرىلعان بولاتىن.
اپەللياتسيالىق كەزەڭدە ايىپتالۋشىلاردىڭ قورعاۋشىلارى سوت ۇكىمىمەن كەلىسپەيتىنىن ايتىپ, سوتتالۋشىلاردى اقتاۋدى سۇراعان. ولار وزدەرى كەلتىرگەن ۋاجدەر سوت شەشىم شىعاراردا ەسكەرىلمەگەنىن العا تارتتى.
ال مەملەكەتتىك ايىپتاۋشى العاشقى شەشىمنىڭ كۇشىن ساقتاۋدى سۇرادى.
ناتيجەسىندە ادىلبەك مۇحامەدياروۆقا قاتىستى ۇكىم وزگەرىسسىز قالدىرىلىپ, الەكساندر پەكەلنيكتىڭ جابىرلەنۋشىلەر ا. جانە ا. ەسىمدى ازاماتتار پايداسىنا 7 ميلليون تەڭگە تولەۋ تۋرالى شەشىم كۇشىن جويدى.