ورتا ازياداعى ەڭ ءىرى مەديا اپتالىق Astana Media Week 2025 بۇگىن دە جالعاستى. توعىزىنشى رەت ۇيىمداستىرىلعان فورۋمنىڭ ەكىنشى كۇنىندە 1 000-نان استام مەديامامان, ساراپشى سپيكەر مەن ەل وڭىرلەرىنەن كەلگەن باق وكىلدەرى جۋرناليستيكاداعى كاسىبي شەبەرلىكتى شىڭداۋ مەن جاڭا بەتبۇرىس جولدارىن باعامدادى. ورتالىق ازيا, ەۋروپا, ازەربايجان مەن قىتايدان كەلگەن ساراپشىلار دا ءوز ەلدەرىندەگى سالانىڭ جاڭاشىلدىقتارىن تاقىرىپقا تۇزدىق ەتتى, دەپ جازادى Egemen.kz.
كورەرمەن كوڭىلىنەن شىعاتىن كونتەنت جاساۋ مەن دايىن ءونىمدى جەتكىلىكتى دەڭگەيدە نازارعا ۇتىمدى ۇسىنۋ – تيىننىڭ ەكى بەتى سەكىلدى بولەك ءىس. العاشقى ساتىدان وتكەن شىعارماشىلىق ۇجىم ەكىنشى باسپالداققا تاياعاندا تەجەلۋى مۇمكىن. ويتكەنى مەدياونىمدى قاي جولمەن جارنامالاۋ, قانداي پلاتفورمادا كورسەتۋ, جوباعا كەتكەن شىعىندى ءوندىرۋ سەكىلدى ساۋالدار وسى تۇستا تۋادى. كەيىنگى جىلدارى تاۋەلسىز باستاماشىلاردىڭ وسى مازمۇنداعى جۇگىن ستريمينگ پلاتفورمالار جەڭىلدەتىپ وتىر. ولار ءوز كەزەگىندە ءونىمدى ساتىپ الىپ, سايكەسىنشە جەكە پلاتفورمالارىندا عانا كورسەتۋدى كوزدەيدى. فورۋم اياسىندا مەدياونىم وندىرۋشىلەر مەن ستريمينگ يندۋستريا وكىلدەرى ءىس جۇزىندە كەزىگىپ وتىرعان كەدەرگىلەردى اشىق تالقىلادى. سونداي-اق قاتىسۋشىلار كورەرمەن تالعامىنىڭ وزگەرۋى, پلاتفورمالار اراسىنداعى باسەكە جانە جاڭا مونەتيزاتسيا مودەلدەرى جايلى دا پىكىر الماستى.
پانەلدىك سەسسيانىڭ قاتىسۋشىسى, «Qulaqsal» كرەاتيۆتى ستۋدياسىنىڭ باس پروديۋسەرى نۇرتىلەۋ امانگەلدى وتاندىق ستريمينگ پلاتفورمالاردىڭ شىعارماشىلىق ۇجىمدارعا ۇسىناتىن قارجىسى كوڭىل كونشىتپەيتىنىن اتاپ ءوتتى.
«تاۋەلسىز كرەاتيۆتى ستۋديالارعا كينو-سەريالداردى ءتۇسىرىپ, ستريمينگ پلاتفورمالارعا ۇسىنۋ الدەقايدا جەڭىل. دەگەنمەن ءبىزدىڭ تاجىربيەمىزدە جاڭادان اشىلعان پلاتفورمالار ەڭبەگىمىزدى لايىقتى باعالاي قويمادى. ماسەلەن, كينو تۋىندىنى تۇسىرۋگە 60 ميلليون شىعىنداساق, نارىقتاعى باعادان تومەن ەتىپ 20 ميلليون ۇسىنىپ جاتادى. سوندىقتان ءبىز سەكىلدى شىعارماشىلىق ۇجىمدارعا التەرناتيۆتى جول ىزدەۋگە تۋرا كەلەدى. مەنىڭشە, تىڭ يدەيامەن كينويندۋسترياعا قادام باسقان تالانتتى قولداۋ تەتىكتەرىن ەنگىزۋ كەرەك. بۇل ۇسىنىسقا ستريمينگ پلاتفورمالار دا مۇددەلى بولسا قوس تاراپ تا ۇتار ەدى», دەدى نۇرتىلەۋ امانگەلدى.
قازىر ەلىمىزدەگى ستريمينگ پلاتفورمالار جۇيەسى اياقتان نىق تۇرماعانى تۇسىنىكتى. دەسە دە كينوپويسك, Movie service پەن وسى جىلدىڭ قىركۇيەگىندە تۇساۋى كەسىلگەن UNICO Play ۇلتتىق ستريمينگتىك پلاتفورمالارى سالاعا سەرپىن بەرىپ كەلەدى. پلاتفورما وكىلدەرىنىڭ قازىرگى كوزدەگەنى ونلاين كينو الاڭدى ازاماتتاردىڭ قولدانۋىنا ىڭعايلى ەتۋ جانە ءوزارا باسەكەلەستىك ارقىلى كەمشىن تۇستى تۇزەۋ ەكەن. بۇل تۋرالى وتاندىق تۆ+ ونلاين پلاتفورماسىنىڭ كونتەنت-ديرەكتورى ساندۋعاش راحىمجانوۆا تىلگە تيەك ەتتى.
«كەيىنگى جىلدارى الەمدە Netflix, Amazon prime, Ivi سياقتى پلاتفورمالار ءجيى قولدانىلىپ ءجۇر. اسا تانىمال Netflix-كە جازىلۋشىلار سانى ميلليوننان اسىپ جىعىلادى. Netflix بۇعان دەيىن شىعارىلعان فيلمدەر ۇسىناتىن مەدياتەكا عانا ەمەس, ءوزى دە فيلمدەر ءتۇسىرۋدى قولعا الىپ وتىر. ءبىز دە وسى ۇلگىنى قولدانامىز. سونىمەن بىرگە, قولدانۋشىلاردىڭ پلاتفورمانى پايدالانۋ دەڭگەيى ىڭعايلى بولۋ ءۇشىن ءبىرشاما تاۋەكەلگە بارىپ وتىرمىز. كەي جۇيەلەر, ءتىپتى جەكە دەرەكتەردى تەرمەي-اق, كۇردەلى فۋنكتسيالاردى ورىنداماي-اق قولجەتىمدى. سايكەسىنشە, مەدياونىمگە قولجەتكىزۋ مۇمكىندىگىن سىيلايتىن تىركەلۋ قۇنى دا 4 500 تەڭگە شاماسىنداعى سيمۆولدىق باعا», دەگەن تۆ+ ونلاين پلاتفورماسىنىڭ كونتەنت-ديرەكتورى ساتىپ الۋشى كونتەنتتىڭ كولەڭكەلى الاڭداردا تارالىپ كەتپەۋىنە دە كۇش سالاتىنىن ايتتى.
«جاھاندانۋ كەزەڭىندە كينوتۋىندىلاردىڭ ءتۇرلى تەلەگرام ارانالار ارقىلى پيراتتىق جولمەن تارالىپ كەتۋ قاۋپى جوعارى. بۇل ءوز كەزەگىندە كينو اۆتورلارىنىڭ دىتتەگەن قارجىسىنا قول جەتكىزۋىنە ايتارلىقتاي كەدەرگى كەلتىرەدى. ال ستريمينگ پلاتفورمالار بۇل قاۋىپتى بولدىرماۋعا كەپىلدىك بەرەدى. سوندىقتان پلاتفورمالار تاراپىنان جاسالاتىن ۇسىنىستار ءوندىرۋشى كەزىگەتىن كەدەرگىلەردىڭ الدىن الۋدى كوزدەيدى», دەدى سپيكەر.
سالا ماماندارى جوعارىدا اتالعان ازدى-كوپتى تۇيتكىلدەر بار بولعانىمەن ەلىمىزدە ونلاين كورەرمەندەردىڭ سانى ارتىپ جاتقانىن اتاپ ءوتتى. دەمەك, ساپالى, سۇرانىستاعى كينو-سەريالدى ۇيدەن شىقپاي تاماشالاۋعا مۇمكىندىك بەرەتىن پلاتفورمالار نارىعىنا ءالى تالاي كومپانيالار كەلۋى بەك مۇمكىن.