جاقىندا ماڭعىستاۋ وبلىسىندا «نوۆىە ترۋبنىە تەحنولوگي» جشس-نىڭ ەكى جاڭا وندىرىستىك تسەحى اشىلدى. اقتاۋ قالاسىنىڭ ونەركاسىپ ايماعىندا ورنالاسقان وندىرىستىك الاڭداردىڭ اشىلۋىنا ماڭعىستاۋ وبلىسىنىڭ اكىمى نۇرداۋلەت قيلىباي, ءوڭىردىڭ جەتەكشى مۇناي-گاز كومپانيالارىنىڭ وكىلدەرى قاتىستى.
جوبانىڭ ءبىرى – يكەمدى پوليمەرلى ارماتۋرالانعان قۇبىرلار شىعاراتىن يننوۆاتسيالىق تسەح. 3,5 ملرد تەڭگە كولەمىندە ينۆەستيتسيا سالىنعان بۇل جوبا ەلىمىزدەگى العاشقى لوكاليزاتسيالانعان ءوندىرىس ورنى. مۇناي-گاز, حيميا ونەركاسىبىنىڭ قاجەتتىلىكتەرىنە باعىتتالعان تسەحتىڭ وندىرىستىك قۋاتى جىلىنا 300 شاقىرىمعا دەيىن قۇبىر وندىرۋگە مۇمكىندىك بەرەدى. بولات پەن سوراپ-كومپرەسسورلىق قۇبىرلاردىڭ ىشكى بەتىنە انتيكورروزيالىق جابىن جاعۋعا ارنالعان ەكىنشى تسەحتىڭ جوبالىق ينۆەستيتسيا كولەمى – 5 ملرد تەڭگە, وندىرىستىك قۋاتى جىلىنا 600 شاقىرىمعا دەيىن قۇبىر وندىرۋگە مۇمكىندىك بەرەدى. ءونىم مۇناي, گاز بەن جوعارى قىسىمداعى حيميالىق سۇيىقتىقتاردى تاسىمالداۋ كەزىندە پايدالانىلادى.
– مۇنداي ءوندىرىس ورىندارىنىڭ اشىلۋى ءوڭىردىڭ ەكونوميكالىق دامۋىنا سەرپىن بەرەدى. بۇل – جاڭا جۇمىس ورىندارى مەن جەرگىلىكتى كادرلاردىڭ دامۋىنا مۇمكىندىك. ەڭ باستىسى, وتاندىق ءوندىرىستى دامىتۋ ارقىلى ەلىمىزدىڭ ونەركاسىپتىك تاۋەلسىزدىگىن نىعايتامىز, – دەدى وبلىس اكىمى.
ەكى جاڭا جوبا اياسىندا 125 جاڭا جۇمىس ورنى قۇرىلدى, ءوندىرىس تولىق ىسكە قوسىلعاندا تاعى 25 ادامدى جۇمىسقا ورنالاستىرۋ جوسپارلانىپ وتىر.
ماڭعىستاۋ وبلىسى