جاعىمدى جاڭالىقتى ءماجىلىس دەپۋتاتى مۇران ابەنوۆ الەۋمەتتىك جەلىدەگى پاراقشاسىندا جاريالادى. دەپۋتات بۇعان دەيىن وسى ماسەلەنى ءماجىلىس مىنبەرىندە بىرنەشە رەت كوتەرگەن بولاتىن, دەپ جازادى Egemen.kz.
ول ءوز ۇسىنىستارىنىڭ ىشىنەن تومەندەگى 5 پۋنكت قولداۋ تاپقانىن جەتكىزدى:
1) ەندى بانكتەر ءتورت تسيفرلىق پارول بويىنشا نەسيە بەرمەيدى. بۇل ءراسىم تەك بيومەتريا ارقىلى جۇزەگە اسادى; 2) بيومەتريا دۇرىس وتپەسە كريديتتى بانك قارىز تىزىمىنەن شىعارۋعا مىندەتتى; 3) كەز كەلگەن كرەديت 24 ساعات بويى «سالقىنداتۋ» مەرزىمىنەن وتەدى. وسى ۋاقىت ارالىعىندا «ە-gov» ارقىلى قاجەتتى تەكسەرۋ شاراسى جۇرگىزىلەدى; 4) زەينەتكەرلەرگە جانە 21 جاسقا تولماعان ازاماتتارعا ونلاين كرەديت شەكتەلگەن; 5) 24 ساعات تەكسەرىلمەي كرەديت بەرىلسە وندا قارىزدى بانك ءوزى جابادى. ءوز كەزەگىندە قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا ازاماتتاردىڭ اتىنا الاياقتىق جولمەن راسىمدەلگەن نەسيەلەر قانداي جاعدايدا جابىلاتىنىن ءتۇسىندىردى.«ەگەر نەسيە كليەنتتىڭ رۇقساتىنسىز بەرىلسە جانە ول بيومەتريالىق تەكسەرۋدەن وتپەسە, وندا قارىزدى سوتتان تىس تارتىپتە ەسەپتەن شىعارۋعا بولادى. بۇل تۇرعىدا قىلمىستىق قۋدالاۋ ورگاندارىنا ءوتىنىم تاپسىرۋ كەرەك. ولار نەسيە الاياقتىق جولمەن بەرىلگەن دەگەن قاۋلى شىعارادى. وسىنىڭ نەگىزىندە قارىزدى ەسەپتەن شىعارۋعا بولادى», دەدى ءمادينا ابىلقاسىموۆا.
اگەنتتىك توراعاسىنىڭ ايتۋىنشا, كەيىنگى ەكى جىلدا بانكتەر جالپى سوماسى 1,9 ملرد تەڭگە بولاتىن 1 500 نەسيە بويىنشا 1 400 قارىز الۋشىنىڭ بەرەشەگىن سوتتان تىس ەسەپتەن شىعارعان.
ءمادينا ابىلقاسىموۆا بۇعان دەيىن بيومەتريا ءتارتىبىن اينالىپ ءوتىپ, جالعان نەسيەلەر تىركەلگەنىنە دە نازار اۋداردى.
«مۇنداي جاعدايعا تاپ بولعان ازاماتتار الاياقتىقتى سوت ارقىلى دالەلدەۋ كەرەك. وسى ورايدا سوت تارتىبىندە قارىزدى ەسەپتەن شىعارۋ نەگىزدەرىن ايتارلىقتاي كەڭەيتتىك. ەگەر نەسيە تولىعىمەن كليەنتتىڭ كەلىسىمىنسىز بەرىلسە, ول مىندەتتى تۇردە سوتتىڭ قاراۋىنسىز ەسەپتەن شىعارىلۋى شارت. ءتيىستى نورما بار, ونى ىسكە اسىرۋ ءتارتىبى ىشكى ىستەر مينيسترلىگىمەن بىرلەسىپ بەكىتىلدى», دەدى قارجى نارىعىن رەتتەۋ جانە دامىتۋ اگەنتتىگىنىڭ توراعاسى.